¹ Pi mano, di do Pilato oko tero Yesu di eko mino kodae. ² Di isirikalen oko cweno odolo me okuto kiko keto i wie, di kiko ngapo ne ekanso akwakwar. ³ Di kiwaco ne be, “Yoga, Abaka me Iyudayan,” di kibape. ⁴ Pi mano, Pilato bobo oko dok ooko, di eko waco ne gi be, “Nenunu, ango atie kele butu, wek ingeunu be ango likame audo gimoro arac ibute.” ⁵ Di Yesu oko wok ooko, di engapo odolo me okuto i wie kede da di engapo ekanso akwakwar. Pilato oko waco ne gi be, “Nenunu, icuo no ine.” ⁶ Kakame jodongo me josaseredoti kede isirikalen onene kede, gin kiko lelemo be, “Gure nu, gure nu!” Pilato oko waco ne gi be, “Terenu igurenu wun kikomu, pien ango likame audo raco moro ibute.” ⁷ Iyudayan oko dwoko ne be, “Wan otie kede iswil wa, iswil nono yei ne to, pien en emire be ebedo Wot ka Rubanga.” ⁸ Kakame Pilato owinyo kede kope nogo, lworo oko medo make. ⁹ Di en bobo eko donyo i agola me ngolo kop, di eko penyo Yesu be, “In iwok i tuai?” ¹⁰ Di do Pilato oko penye be, “Likame imito yamo keda? likame ingeo be ango atie kede akarinikin me gonyi kede me guri i kom musalaba?” ¹¹ Yesu oko dwoko ne be, “Oudo likame iromo bedo tie kede akarinikin i koma, ka koto di likame oudo komii i malo; pi mano, ngat okela i cingi en kame tie kede dub kame dwong.” ¹² Geeno esawa no, Pilato oko mono epone me gonyo Yesu, do Iyudayan oko lelemo di kiwaco be, “Ka in igonyo icuo ni, udo in likame ibedo ngawot Kaisari; pien ngat acelacel kame waco be en ebedo abaka udo piemo kede Kaisari.” ¹³ Kakame Pilato owinyo kede kope go, en eko kelo Yesu ooko, di eko bedo i kom mere me ngolo kop, i kabedo kame kolwongo be “Etem me kide kame Konapo.” (I leb Eburania olwongo be Gabeta.) ¹⁴ Oudo ebedo ceng me iikere me camo ebaga me Bwot; di do esawa oudo romo bala kanyape me iceng; en eko waco ne Iyudayan be, “Nenunu abaka wu ino!” ¹⁵ Do gin kiko lelemo be, “Rweny kede, rweny kede, gure!” Pilato oko waco ne gi be, “Agur Abaka wu?” Jodongo me josaseredoti oko dwoko be, “Wan oli kede abaka, kwanyo Kaisari kenekene.” ¹⁶ Pi mano, Pilato oko jalo Yesu mino i cing gi pi ot gure. Di do gin kiko tero Yesu, kiko tere ooko. ¹⁷ Di do en etie riongo musalaba mere, di eko ot paka kakame kolwongo be Kabedo me Cogowic, kame kolwongo kede leb Eburania be Gologota. ¹⁸ Kakame gin kiko gure iye i kom musalaba kede jo are apat; ngat acel tetucel kede ocelu da tetucel, di Yesu en atie i diere gi. ¹⁹ Di Pilato oko wandiko kop di eko name i wi musalaba kame somere be, “YESU ME NASARET, ABAKA ME IYUDAYAN.” ²⁰ Iyudayan atot di ko somo iwandik noni, pien kakame bin koguro iye Yesu oudo iyapi kede bomba; doko oudo kowandiko i leb Eburania, Gurik kede Latin. ²¹ Di jodongo me josaseredoti, kame oudo obedo Iyudayan, oko waco ne Pilato be, “Kur iwandiko be ‘Abaka me Iyudayan’ do be, ‘En eyamo be, Ango abedo Abaka me Iyudayan.’ “ ²² Pilato oko dwoko be, “Gikame ango atieko wandiko, wandiko.” ²³ Di do kakame isirikalen oko tieko guro kede Yesu i kom musalaba, kiko tero igoen mege kiko popoko tien ongwon, sirikale acelacel otero dul; oko tero kiton ekanso mere da: ekanso mere oudo likame kororopo, oudo en etie acel abor kame kokedo ausin mege cako ki malo kiton piny. ²⁴ Gin kiko poro kop ken gi ken gi be, “Kur onyinyilunu nu en, do oucunu alulu pi neno ngat kame winyo bino mako di en eko tero. “Man otimere pi mino iwandik kacil cobere kakare be, “Kipopoko giangapa na, di kiko uco alulu pi ekanso na, isilikalen oko timo gigi.” ²⁵ Do toto me Yesu, kede amime toto mere, kede Maria dako ka Kulopas kede Maria Magadalina, oudo tie cungo i nget musalaba mere. ²⁶ Kakame Yesu oneno kede toto mere karacel kede ngasiao kame en oudo emaro di kitie cungo i ngete, en eko waco ne toto mere be, “Dakoni, neni wodi ino!” ²⁷ Di en eko waco ne ngasiao da be, “Neni, toto ni ino.” " Cako ceng no ngasiao nono oko tero toto me Yesu ture. ²⁸ Ingei mano, Yesu di do otieko ngeno be gi dedede oudo do otieko timere, me wek iwandik kacil cobere en eko waco be, " “Orio oneka,” ²⁹ Kanono oudo tie iye opoko me bwini awac di epong, gin kiko luto ecango i bwini awac i wi tir, di kiko cwano ne i doge. ³⁰ Kakame Yesu otieko jwijwio kede bwini awac noni, en eko waco be, “Otiek do.” " Di do en eko luro wie, eko jalo cuny eko to. ³¹ Pi mano, kite kame ceng no oudo obedo kede ceng me iikere, Iyudayan oko kwano Pilato be tuturo tien jo kame oudo koguro nogo, di oko kwanyo gi tenge pi mino kur kom gi dong i kom musalaba i Ceng me Sabato, pien Ceng Sabato oudo do otuno. " ³² Isirikalen oko bino di kiko tuturo tien dano me agege kede me ocelu ikom jo kame oudo koguro kede Yesu i musalaba ceng no. ³³ Do kakame kituno kede but Yesu, kiko neno be en oudo etieko to, gin likame kiko turo tiene. ³⁴ Do sirikale acel oko cobo ngete kede tong; cucuto di remo kede pii oko wok kiye. ³⁵ (Ngat koneno gini di timere en oko mino ijura, doko ijura mere tie me ateni, doko eda engeo be eyamo kop me ateni, me wek uda iyeunu.) ³⁶ Pien gigi otimere tetekeny iwandik kacil cobere, kame waco be, “Likame tie cogo mere moro kame kobino turo.” ³⁷ Bobo iwandik ace waco be, “Gin kibino geno ngat kame gin kicobo.” ³⁸ Ingei mano, Yosepu me Arimatea, kame oudo obedo ngasiao ka Yesu, oko tero kwac but Pilato i mung pien en oudo elworo Iyudayan, di ekwao be mie ekwany kom Yesu eter tenge; Pilato oko mine akarinikin, di do en eko bino di eko kwanyo kom Yesu. ³⁹ Di Nikodemu da, dano kame oudo ber ogeo bino but Yesu iwor, oko bino di ekelo yat kame ngwe kur kame onyalo pi gwoko kom jo oto, oudo ebedo maya kede aloe, kame peko mere romo bala kilo ot adek. ⁴⁰ Di gin kiko kwanyo kom Yesu di kiko bone kede esuka aliamaliam kede yat angwe kur naca, di lubere kede ekite kame itok me Iyudayan me ayika tie kede. ⁴¹ Inget kakame oudo tie koguro iye Yesu; poto oudo tie kame ates anyen kalikame pwodi oudo koyiko iye ngatamoro. ⁴² Kanono en kame gin kiko yiko kom Yesu iye, pien ceng no oudo obedo ceng kame Iyudayan iikere kede, doko ates oudo tie kakame iyapiyapi.