¹ . Ingei cengere kany, Anania, nga Saseredot amalo oko wokun karacel kede idongia, kede dokon ngayamo ariek moro kame kolwongo be Tertulu, kame omio kope kereco but gabuna ikom Paulo. ² . Dokon kakame kolwonge kede, Tertuu oko geeno piido Paulo di ewacobe, Neningo di beo kibutin, wan onumunumo anapakin adwong twatwal, dokon tice kabeco otimere ne ateker ni beo ki apugan nin. ³ . Wan ogamo tice ni didik ika bedere dedede kede pwoc me pone dedede. okwe yin nga pug kame kite mere ber, Feliks. ⁴ . Di likame amito be, akel oolo buti, do akwai be tim wa ber iwiny kope wa anonok kame okello buti. ⁵ . Pien wan oudo be dano ni obedo nga kel peko, kede ngat kame supo jo pi piem kede apugan, idiere diere me iyudayan, ika dedede me piny dokon en kame ebedo nga tel wi ekodet kame kolwongo be Nasarene. ⁶ . Dokon en noni en kame ebedo rimo piny di edubo nying Tempulo: en kame wan oko maake di oko teere pi ngolo ne kop koto di olubo kede iswil wa. ⁷ . Do Laisia kapten adwong oko bino maane icing wan kede gero atek twatwal di eko teere tenge. ⁸ . Di en ecikakino be, kame tie jo kame tie kede kop ikome bin butin: kame da yin itwero ngingico kope nogi in ikomi di iko wudo tien kop omio wan otie piide. ⁹ . Iyudayan da diko mooko yamo noni di ki waco be, kope nogo tie kamanono. ¹⁰ . Kakame gabuna oko gwegweto kede Paulo pi yamo, Paulo diko dwooko di ewaco be, Bala kame ango angeo kede be in ibedo nga ngol kop me ateker ni pi mwakini katot, mio ango adwoko kope pira kede yom cuny. ¹¹ . Piento yin ipore niang be, oromo nan do cengere tomon ki wie are, geeno kakame ango aoto kede Iyerusalem pi wooro. ¹² . Jogi likame oko udango itempulo di atie piem kede ngatamoro, amotoko nat di atie loolo ngatamoro, arabo ika cokere amotoko kii bomba. ¹³ . Dokon joogi likame twero mooko kope kame gin ki tie pidango iye gi. ¹⁴ . Do ango atuco man butin, be, ango aworo Rubanga me jo akwaari na iye epone kame joogi iwongo be yongayo koparao, di ayei kede gi dedede kame kowandiko ii tabun me iswil karacel kede me inabino. ¹⁵ . Dokon di atie kede gen but Rubanga iyepone kame gida kiyei kede be, iyarun me jo ko too bino bedo tie, di eribaro jo kabeco, kede jo kreco da. ¹⁶ . Epone noni en kame ango atie tinao kede koma, tetekeny wek abed kede kuo kame raco liki ye inyim Rubanga karacel kede ibut jo da. ¹⁷ . Nan do icen ngei mwakini atot, en kame ango ako bino kede pi keelo gia mia kede irabu but ateker na. ¹⁸ . Ikanono da en kame iyudayan mogo kowok i Asia ouda kede di atie lonyere kii tempulo di likame atie kede ekodet, amotoko aruba ruba. ¹⁹ . Kame nan twero bedo tie inyim kan, pi piem kede gi kame ango ayamo, kame di ki tie kede kop moro ikoma. ²⁰ . Arabo wek jogo nogo yam kope gi nan di ango pwodi atie cungo inyim kansulo kan, kame di gin ki wudo tice kareco ikoma. ²¹ . Kene kene, ango angeo be, kop me dwan kame ango aredo kede di acungo idiere gi, di ayamo kop kamako iyarun me jo ko too, en ko mio iceng atini okela ngo inyimi kan. ²² . Kakame Feliks owinyo kede kopenogi, di dokon en oudo etie kede ngec ka ber ikom yongayo nono, en eko Sarakiono gi di ewaco be, ango ayaro bino ngeeno tuto me kop wu di Laisa kapten kadwong obino. ²³ . Di en eko cikakino ngat kame ioo wi ikean pi gwooko Paulo, di eyei ne bedo kede alajara dokon kur egeng jo awotino meege pi konye, arabo bino bute. ²⁴ . Ingei cengere mogo, Feliks oko bino kede dako mere Durusila, kame obedo a yudayat, di en eko iwoongo Paulo, di eko wiinye pi kop kamako yei kame tie ii Kurisito. ²⁵ . Di Paulo oko geeno yamo ikom kop ka mako poore, pugo komi ke de ngolo kop, Feliks kome oko miel, di eko dwoko be, dok ber kong pi esewa ni, kakame ango ayaro wudo kede kare kibecakina ayaro iwoongi. ²⁶ . Doko en oudo etie kede gen be, Paulo oudo pore miine sente moro, di en eko goonye: kop nono en ko mio en eko cwaano dano moro pi oot poro kop kede Paulo. ²⁷ . Do ingei mwakini are, Porsio Festo oko bino lunyo ka wang Feliks dokon pien Feliks oudo mito yoomo cuny iyudayan en bin eko weeko Paulo odong di otweere.