¹ . "Imiegu kede joapapi, winyunu pido ne atie inyim wu nan." ² . Do kakame kiwinyo kede be en eyamo kede leb Eburania, gin kiko ling kalamo. Eneko waco be: ³ . Ango ateteni abedo Ngayudaya, anywali me Tarusi me Silisia, do adongo i bomba noni itien Gamaliel, audo pwonyere di lubere kede teko me iswil ka papa wa, dodi oudo aketo cunya ikom Rubanga kame wuda dedede itimunu kede tin. ⁴ . Ango atidilo yongayo noni kede to di atweo kede tero cuo kede mon i ot kol. ⁵ . Di ngasaseredoti adwong da bedo ijura nango, kede kansulo dedede me jodongo, kame oudo ango audo iye baluwan pi imiegu, di ako ot Damasiko pi kelo paka jo audo tie Yerusalem di itie irikoi pi gin udo alola. ⁶ . Nan eko timere, di ango atie iyongayo ot di do ayapuno tuno Damasiko esawa kanyape me idier iceng, cucuto nono di lero ager kowok i malo oko rieny rimaro ango. ⁷ . Ango ako poto piny di ako winyo dwan di waco na be, "Saulo, Saulo, pinyo omio in itie tidilo ango?" ⁸ . Ango do ako dwoko be, 'in en ngai, Rwot?" En eko waco na be, "Ango en Yesu me Nasaret, kame in etie tidi lo." ⁹ . Ateteni jo audo tie keda oko neno lero kido bedo iwor, do likame kiko winyo dwan ngat audo tie yamo keda. ¹⁰ . Ango do ako yamo be, "Rwot atim do nyo?" Di Rwot oko yamo na be, " Yai malo iko ot Damasiko, dido ikuno oyaro yamoni gi dedede kame oiko ne in timmo? ¹¹ . Do pien oudo lika atwero neno pi deyo me lero ca, di oudo jo audo tie konono keda tie tera di imako cinga, ango ako bino Damasiko. ¹² . Dido ngatmoro anyinge Anania, icuo audo omire di lubere kede iswil, di etie kede caden aber inyim Joyudaya dedede audo bedo kano. ¹³ . Oko bino but a, eko cungo di eyamo na be, "Omin Saulo, udi yabere me wangi' i esawa nono ango ako kiaro wannga malo bute. ¹⁴ . Dido en eko yamo be, "Rubanga ka joapapi wan oyen be in ipoore ngeno mit mere, di iko neno ngat kopoore, kede winyo dwan me doge. ¹⁵ . Pien iyaro bedo ijura mere but jo dedede pi gikame ineno kede winyo. ¹⁶ . Do nan itie kuno pinyo? Yai malo obatiso in, di oko iwongo dub ni tenge, di ilwongo nying Rwot. ¹⁷ . "Nan do eko timere be, kame adwogo kede Yerusalem di atie ilega i tempulo ako udo ilek. ¹⁸ . Di ako nene di ewaco na be yai oti tenge me Yerusalem awakawaka, pien lika gi iyaro yei caden nin kana. ¹⁹ . Ako yamo be, "Rwot, kingeo be isinagoga acelacel ango atweo ako bungo jo audo koyei. ²⁰ . Do kakame oonyo kede remo ka Stepano, audo obedo ijura nin, ango da oudo atie cungo i konono di atie pwoyo pi to mere, di atie gwoko igoen ka jo audo tie neke. ²¹ . Dido en eko waco na be yai ioti, pien ango amito oon ka kabor ikame but jo kalika obedo Iyudayan." ²² . Di kiko winyo kop mere tuno kede ikop noni, di kiko kiaro dwan gi malo di iwaco be kwanyunu dano bala man tenge me lobo, pien likame epoore kuo!? ²³ . Dido kakame kiwoto kede koko di kinyinyilo igoen gi ikikiro apua malo. ²⁴ . Ngadwong me isirikalen oko woto be poore pepenyo en di odae en amotoko me etwero ngeno gi komio kiwoc ne. ²⁵ . Dido kakame kitwee kede aunoi, Paulo oko waco ne ngatel me isirikalen kaudo tie cungo konono be, iswil yei ne in bungo dano obedo ngaroma, di likame oturo ne raco? ²⁶ . Kakame ngadwng me isiikalen owinyo kede kop ni, en eko ot but ngatel me isirikalen eko yamo ne be, "Gwokere kede gikame itie timo, piento icuo ni obedo anywali me Roma. ²⁷ . Di do ngatel me isirikalen oko bino bute eko pen ye be, "Yamo ber, in ibedo anywali me Roma?" En eko dwoko be "Eba." ²⁸ . Ngatel oko dwoko be, Ango aculo sente atot twatwal pi udo tie na ni be bedo anywali me Roma." ²⁹ . Cucuto nono di jo audo poore pepenyo en oko ayiko tenge kibute, di ngatel me isirikalen oko udo iworo kakame engeo kede be en oudo ebedo anywali me Roma, di dokon oudo emio otwee. ³⁰ . Oru mere do, piento oudo en emito ngeno ateteni pinyo omio joYudaya opide, en eko gonye i atwea mere no, di eko mino cik but jodongo me josaseredoti kede kansulo gi dedede to bino, di eko kelo Paulo cungo inyim gin.