¹ Di kare oko tuno, kame wan oko pokere kede gi, di wan oko kwang ka oriere paka tuno Kosi, oru mere di oko tuno Rodes, di oko yai kikuno doko tuno Patara. ² Di oko udo emeri kame tie ngolo loko Poenisia, di wan oko donyo iye di oko yai. ³ Nan do kakame oneno kede Supuro, oko nace kibad tetungodal, di oko kwang pakatuno Siria, di oko wok kiye edoket me Taya, pien kikuno oudo oyaro kwanyo yec mogo kame odio emeri. ⁴ Di oko udo jo koyei, oko bedo kuno pi ceng kanyare. Tipo kacil oko telo gi di waco ne Paulo be kur eot paka Yerusalem. ⁵ Kakame wan otieko kede ceng gi, wan oko yai di oko mede kede ot wa, gin dedede kiko nyamaro wa, kiton mon kede idwe tuno kakame wan donyo kede oko me bomba. Dido wan dedede oko riondiko piny, idog nam, oko lego. ⁶ Di wan oko moto dano acel acel kikom gi, oko donyo iye emeri, di gida kiko dok imiere gi. ⁷ Kakame wan otieko kede gi oterowa Taya, di oko tuno Potolemai, di oko moto Imiegu kede amiegu, di oko bedo kede gi pi ceng acel. ⁸ Di oru mere, wan jo oudo tie iye ekodet a Paulo oko yai, di oko tuno Sisiria, di oko donyo i ot ka Pilipo kobedo ngatuc ejiri, obedo ngat acel kikom jo kanyare ka, kame wan oko bedo kede. ⁹ Di icuo acel nono tie papa me anyira ongwon kalikame pwodi onyomere do di kitimo imurai. ¹⁰ Di wan oko mede bedo kuno pi ceng mogo, dido dano moro oko bino ipiny me Judea obedo enabi, anyinge Agabus. ¹¹ Di kakame ebino kede but wa eko gamo ausi a Paulo, di eko tweno cinge kede tiene eko waco be, "Tipo kacil waco be, 'iye epwone noni, Iyudayan me Yerusalem bino tweno won ousi noni kamane, di oko mine icing jo kalikame Iyudayan." ¹² Di kakame wan owinyo kede kamano, wan karacel kede jo me piny nono, oko ngangao Paulo be kur eot Yerusalem. ¹³ Di Paulo oko dwoko negi be, "Nyo amio wun itie nu koko, di iturunu cuny ango? Pien ango atieko yei likame pi twena kenekene, do pi to da ki Yerusalem pi nying Rwot Yesu." ¹⁴ Do kitakame oneno kede be edagi, wada oko weke, di owaco ne be, "wek mit ka Rubanga cobere." ¹⁵ Di ingei ceng mogo, wada oko udo nwang cuny di oko ot paka Yerusalem. ¹⁶ Kikano wan oko ot kede jomogo ace ko yei me Sisiria, di kiko tero wa paka ki ot ka Masasoni, icuo kame tie anywali me Supuro ngat kame bin ogeo lubo Yesu sek, ngat kame wan opore bedo kede. ¹⁷ Di kakame wan otuno kede Yesrusalem, Imiegu kede amiegu oko gamo wa kede kilel. ¹⁸ Di oru mere Paulo oko upere kede wan ot but Yakobo, oko udo jo adongo dongo dedede tie kuno. ¹⁹ Di kakame en etieko moto gi kede, Paulo oko cako tatamo ne gi kiyore kiyore kope dedede kame Rubanga bin otimo idiere me jo kame likame obedo Iyudayan di lubo ejiri ²⁰ Di kakame kiwinyo kede, gin kiko mino deyo but Rubanga, di ki waco ne be, "Neni ngo ber omin wa, jo adi kame tie tutumian me Iyudayan otieko yei. Do pwodi kitek lubo Iswil? ²¹ Di omio gi ngec kikomi be in itie pwonyo Iyudayan dedede kame bede karacel kede jo kalikame tie Iyudayan pi dagi lubo Iswilia ka Musa, di kiwaco be, likame poore kepo idwe gi, arabo lubo itok wa. ²² Nan do otim benyo? Jo atot oyaro bino cokere karacel, pien gin ki yaro winyo be in ibino. ²³ Do pimano wan otie waco ni kaman. Wan otie kede cuo ongwon kame tie kede kwong kikom gi. ²⁴ Ter jo nogo di ikounu lonyere karacel kede gi, di iko culo gi, wek tetekeny kiko lielo wi gi. Dido jo dedede kobino ngeno be, kop kame oudo otatamo kikomi dedede oudo likame kop me ateni. Pien ida itie kede wa, di ilubo Iswil wa. ²⁵ Kop kame mako jo kalikame Iyudayan ko yei, wan ocwao negi baluwa di omoko be kur kilub kop acal amagi, kwanyo kenekene gin pore kibed tenge kikom jame kame oyalo kede cal jwogi, kede camo remo, camo gi kame odeo adea, kede tim me caro." ²⁶ Di Paulo oko tero cuo nogo oru mere, di kiko ot lonyere karacel kede gi. Dido kiko donyo itempulo, pi nyuto anyut me kita kame ceng me lonyere bino tiek kede, di oko mino gi ayala pi ngat acel acel kikom gi. ²⁷ Dido ceng me kanyare oyapuno tiek, Iyudayan kame koyai ki Esia, kakame gin ki neno kede Paulo itempulo, di kiko supo jo dedede, di oko make. ²⁸ Di kilelemo itek, "Jo me Isirael, konyunuwa, icuo ni en kame tie pwonyo jo dedede kikabedo lung pi dagi wa, iswil, kede kabedo ni. Di medo iwi mano ekelo jo Gurik da Itempulo, di eko munao kabedo kacil noni dedede." ²⁹ Pien gin oudo inene sek ibomba di etie kede Toropuni nga Epeso, kame gin kitamo be Paulo oudo okelo Itempulo. ³⁰ Di bomba dedede oko rubere, di jo ko ringo karacel, di kiko mako Paulo. Di oko wane oko me Tempulo, di kiko cengo i keros awakawaka. ³¹ Di kakame bin do itie mito neke kede, kop oko tuno but ngadwong me Isirilalen, be Yerusalem lung otieko rubere. ³² En awakawaka eko kwanyo isirikalen kede jo tic mege, di eko ringo kunono but gi. Di kakame gin kineno kede ngadwong atelo isirikalen kede isirikalen mege, kiko weko bungo Paulo. ³³ Ngadwong me Isirikalen oko bino ingete, di oko tere, di eko woto twer me twene kede irikoi are. Di eko mito nyang be en ebedo ngai, di nyo kame etimo. ³⁴ Di mogo lelemo kede kop ni. mogo lelemo kede kope ace kikom ekodet. Di en likame eko twero niang nyo kikome kokelo atotolun, en eko woto twer be tere ipaco me Isirikalen. ³⁵ Di kakame en etuno kede ka yito malo me ot, dido isirikalen oko tinge atinga pi gero me jo. ³⁶ Pien ekodet me jo oudo lubo gi, di kilelemo be, "rwenyunu kede!" ³⁷ Di kitekame oudo tero kede Paulo ipaco me isirikalen, en eko yamo kede ngadwong me isirikalen be, "iyei na yamo kede gi?" ngadwong me isirikalen oko waco be, "ida itwero yamo kileb gurik? ³⁸ Likame in dano me Misiri, kame nyoro nyoro ni okelo aruba aruba, di kiko kelo cuo itim aromo tutumia ongwon obedo jo nek?" ³⁹ Di Paulo oko waco be, "Ango icuo obedo nga Yudaya me Taruso, kibomba me Cilicia. Dano kame likame yai kibomba atitidi. Ango akwai ki peko na ni me wek ayam kede jo." ⁴⁰ Di kakame oko mine kede twer, Paulo di oko cungo kayito malo, di eko didio jo kede cinge, dido jo oko ling titi, en eko yamo kede gi kileb Eburania. Di ewaco be,