¹ . Ingei gigi dedede, Paulo oko yai kii Asenes di eko bino Ikorinti. ² . Di eko udo Eyudayat moro kame ko iwongo be Akwila, kame konywalo Pontas, di owokun inonono inonono, kede dako mere Purisila; (pien bin Kuladio ocikakino Iyudayan dedede pi yai tenge ki piny Roma:) di en eko bino but gi. ³ . Dokon pien oudo en etie kede tic kacal kede mer gi, en do eko ber bedo kede gi, di etimo tic: pien gin oudo ki bedo jo nyong iauni adi lubere kede tic gi me iman. ⁴ . Do en eko bedo leeno tam kede gi i Sinagoga buli ceng me sabato. Di en oudo ewao cuny Iyudayan kede jo Gurik ikom yei. ⁵ . Do Kakame Sila kede Temeseo oko wokun kede kii Mekadonia, banya atek oko mulo cuny Paulo, di en eko mino mujura but Iyudayan be Yesu en kame obedo Kuristo. ⁶ . Do Kakame gin kiko piem kede kope go, di ki yamo kope me acae, en eko lakaro egwe mere, di ewaco ne gi be, Remo u bino dong iwi u; Ango do acil, geno nan oot anyim ango do amito oot but Abilere alikame Iyudayan. ⁷ . Di en eko geno ikanono, eko donyo ii ot me icuo moro, kame nyinge Jastas dano kame oudo woro Rubanga, kame jo me i ode dedede oudo okitokin itek bedo i Sinagoga. ⁸ . Dokon icuo kame kolwongo be Kurispas, kame oudo obedo ngapug Sinagoga. Oko yei Rwot karacel kede i ode dedede; di jo atot kame oudo tie ipiny me Korinti Kakame owinyo kede rwonge go, oko yei di oko batiso gi. ⁹ . Rwot oko yamo kede Paulo i wor ki itapai be; kur ibed kede iworo do mede kede yamo, kur iweki. ¹⁰ . Pien ango atie kedi, dokon likame dano moro oyaro musungo in: Pien ango atie kede jo na tot ibomba ni twatwal. ¹¹ . Di en eko medo bedo kunono pi mwaka acel kede dwete kanayape di epwonyo kop ka Rubanga kii diere gi. ¹² . Kakame Galio oudo bin tie kede nga lub ngapug me Acaia, Iyudayan oko kello kolo gi ikom Paulo kede tam acel, di kiko kele inyim kom me ngolo kop. ¹³ . Di ki Waco be, icuo ni tie wano cuny jo pi woro Rubanga i epone kame lika upere kede iswil. ¹⁴ . Kakame Paulo oudo tie yabo kede doge me yamo Galio diko Waco ne Iyudayan be, koto di oudo ebedo tim karac amoto me ecejo. Okwe un Iyudayan, oudo koto ango acungo kede u iye. ¹⁵ . Do kite kame ebedo kede kope me nying, kede kame mako iswil un tiekunu mago, pien ango likame abedo angol kop me kopek a cal ka mago. ¹⁶ . Dido en eko riamo gi tenge inyim kom me ngolo kop. ¹⁷ . Iyudayan dedede di ko kwanyo Sosenes kame obedo nga dwong kame loo Sinagoga di kiko daane inyim kom me ngolo kop. Do Galio lika me oko paro gimoro Atwal. ¹⁸ . Ingei kope go, Paulo pwodi oko mede bedo kunono pi kare moro abeber, dido eko yai weko imiegu, en eko kwang oot loka Siria, di eupere kede Purisila kede Akwila; di en oudo etieko lielo yer wie i piny me kenkerea: pien bin oudo etimo ikwong. ¹⁹ . Di en eko tuno i Epeso di eko weeko gi kuno. Do en ikome eko oot donyo i Sinagoga: di eko geno nyam tam kede Iyudayan. ²⁰ . Kakame gin kiko kwane kede be koto ebebedo ber kede gi pi kare abor, en likame eko yei timo kamanono. ²¹ . Do en eko moto gi di ekwao ne gi dong kiber, di ewacobe, ango miero aoti amak ebaga kame bino bedo Iyerusalem: do ayaro dwogo butu dokon, kame di Rubanga oyei. En dokon eko kwang yai kii Epeso. ²² . Kakame en eko wok kede idog nam me kaeserea, di eko donyo malo me kunono, en eko moto kanisa, di eko tulor donyo Antiokia. ²³ . Ingei en tero kare moro kunono, eko dokon yai di eko oot mamano piny me Galatia kede Purigia ii anapeta di ecuko cuny jo ka lubo Yesu dedede. ²⁴ . Eyudayat moro kame olwongo be Apollo, kame bin konywalo ipiny me Aleksanduria, kame bin osomo itek twatwal, di engeo gi awandik ki tek twatwal, oko bino ii Epeso. ²⁵ . Icuo ni bin oudo opwonyere itek twatwal iyongayo ka Rwot; dokon kite kame oudo etie kede tek cuny, omio eko yamo di epwonyo itek twatwal kopek a Rwot, do en oudo engeo ibatisimu ka Yokana kenekene. ²⁶ . Dokon en eko geno yamo kede tek cuny kii Sinagoga: Kakame Akwila kede Purisila owinye kede, gin bin kiko kelle but gi, di gin kiko medo nyano ne ngec me yongayo ka Rubanga i epone ki becokina. ²⁷ . Kakame do bin oko jalakino en kede pi oot beo kii Achaia, imiegu oko wandiko di cuko cuny jo lub Yesu pi game, Kakame en eko tuno kede, eko bedo me kony k dwong twatwal but jo kame bin oyei di beo kii kisa. ²⁸ . Pien en bin eko waano cuny Iyudayan kede teko ka dwong twatwal, di dokon enyuto negi gi awandik kame moko be Yesu en Kuristo di iwak me jo oudo tie winyo.