¹ Di do kakame Paulo gini oko ot kede di kibeo ki Amipipoli kede Apolonia, gin kiko tuno Tesalonika, kakame oudo sinagoga me Iyudayan tie iye. ² Paulo oko donyo i ot bala kite kame oudo enare timo kede, en eko donyo piem kede gi pi Sabaton adek di ejuro ki iwandik kacil. ³ En di egonyo ne gi dwong kop me iwandik kacil, di enyuto ne gi be Krisito miero oudo nen can di eko yaruno kikom jo oto; kede be, “Yesu kame ango atie tatamo ne wu kop i kome ni, en kame obedo Krisito.” ⁴ Jo mogo ikom gi oko yei, di kiko donyo but Paulo kede Sila, kede Jogurik kame bin woro Rubanga, ekodet me jo karacel kede mon atot kame oudo koworo. ⁵ Do nyeko oko mako Iyudayan oudo odagi yei, omio kiko ot raro jo mogo kame kite gi reco, di kiko coko gi i ekodet; di do kiko mino woo atek obedo i bomba dedede, kiko ot suro paco ka Yasoni di oudo kimito be kiwot Paulo kede Sila ooko but jo. ⁶ Do bala kame likame kiko twero udo gi kede, gin kiko mako Yasoni karacel kede jo mogo oudo oyei, kiko tero gi i nyim jotel me bomba di kiwaco be, “Cuo kototolo piny ige, doko kibino naka kan da, ⁷ Kame Yasoni ogamo, gin dedede kitie timo gi kalikame upere kede iswil ka Kaisari, pien gin kiwaco be abaka ace bobo tie kame nyinge Yesu.” ⁸ Gin kimio jo karacel kede jotel me bomba wi gi ototolun kakame kiwinyo kede kope nogi. ⁹ Kiko mino Yasoni kede jo icegun kwanyo cul kame oudo mitere pi gonyo gi, di kiko weko gi kioto. ¹⁰ Jo koyei Krisito oko cwano Paulo kede Sila Berea iwor nono: kakame kituno kede kuno, gin kiko ot donyo i sinagoga me Iyudayan. ¹¹ Iyudayan me Berea oudo obedo jo kame beco kalamo Iyudayan me Tesalonika, pien gin kigamo kop ka Rwot kede cuny gi lung, di kingingico iwandik kacil ceng dedede pi mito niang ka gigo oudo tie kop me ateni. ¹² Pi mano, omio jo atot kikom gi oko yei, kede mon atot kame oworo me Jogurik kede cuo da. ¹³ Do kakame Iyudayan me Tesalonika oko winyo kede be Paulo oudo odonyo tuco kop ka Rubanga i Berea, gin kiko ot kuno da kiko rubo wi jo di kisupo gi. ¹⁴ Cucuto nono imiegu oyei Krisito oko peruno Paulo ooto naka i dog nam, do Sila kede Temeseo oko ber dong Berea. ¹⁵ Di jo kame bin onyamaro Paulo oko upere kede naka tuno Asene. Paulo oko ciko gi be miero kel Sila kede Temeseo bin bute awakawaka, di do gin kiko dok. ¹⁶ Di do Paulo oudo tie kuro Sila kede Temeseo i Asene, cunye oko bedo kede iturur pi niang be jo me bomba nono oudo woro caljwogi. ¹⁷ Pi mano Paulo oko donyo piem kede Iyudayan i sinagoga kede jo kame oudo woro Rubanga; da ceng acelacel i atale en oudo epiemo kede jo kame oudo bino bute. ¹⁸ Jo osomo isoma amalo kame bin tie i ekodet me Epicuria kede Sitoik oko oot riamo kede Paulo. Mogo kikom oudo waco be, “Nyo en kame icuo kame yamo atatai ni da mito?” Icegun oko waco be, “Ineno bala etie tatamo kop i kom rubangan mogo me kumbor.” Gin kiyamo kamano pien Paulo oudo tie pwonyo kop i kom Yesu kede iyarun. ¹⁹ Gin kiko make di kiko tere i nyim kansulo me Areopaga, di kiko waco ne be, “Mi wa ongei dwong me pwony anyen kame in ikelo ni. ²⁰ Pien in ikelo gimogo anyen kame wan lem pwodi likame owinyo, pi mano, wan omito ngeno dwong me kop gi.” ²¹ Pien oudo jo me Asene karacel kede jokumbor kame oudo bedo kuno, bin oudo tero kare gi bedo abeda, pi tatamo kede winyo kope anyen nogi. ²² Di Paulo oko cungo i diere me kansulo me Areopaga di eko waco be, “Wun jo me Asene, ango atieko niang be ikom kope dedede, wun ibedunu jo me edini. ²³ Pien kakame ango abedo bebeo kede di ako ngingico gikame wun imiunu cunyu iye, audo alutari kame tie kede iwandik kame waco be, ‘BUT RUBANGA KALIKAME NGERE.’ gikame wun iworunu abongo ngec no en ine kame ango atie tuco ne wu kop i kome. ²⁴ En ebedo Rubanga kocweo piny kede jame dedede kame tie iye, bala kame en ebedo kede Rwot me malo kede piny, likame ebedo i iroro kame dano en kagero. ²⁵ Liikame emito awora kede giamia kame cing dano mio, ineno bala en oudo emito gimoro; piento en nono kame emio kuo but jo dedede, wei, kede gi dedede. ²⁶ En bin ecweo kibut dano acel atekerin dedede kame bedo i wi lobo lung, di eko moko ne gi kare me kuo kede ikor me kabedo gi. ²⁷ Me wek gin kimoi Rwot kede gen be amoto kibino rarapo en di kiko ude; bed bala Rubanga likame bor kibut ngat acelacel kikom wa. ²⁸ Pien wan okuo, doko ooto, da otie i cinge; bala kame joacako were wu mogo waco kede be, ‘Pien wada obedo nywal mege.’ ²⁹ Bala kame wan obedo kede nywal ka Rubanga, miero kur opar be tie ka Rubanga cal kede Saabu, arabo Siliba, amotoko kidi, gikame dano pao kede rieko, di en ewoto i tam mere. ³⁰ Pien kare me kwic nono Rubanga otieko weko, do nan etie ciko jo dedede ikabedo dedede pi swilaro, ³¹ Piento en etieko moko ceng kame en ebino ngolo ne kede jo me piny kop kede poore, di beo kibut dano kame en etieko yero kame bino timo man, doko en emoko kop noni but jo dedede i epone kame eyaruno kede en kikom jo oto.” ³² Kakame gin kiwinyo kede kop i kom iyarun ikom jo oto, mogo kikom gi oko donyo nyero nyero me anywar, do mogo oko waco be, “Wan obino bobo medo winyo kope nogi kibuti.” ³³ Di do Paulo oko yai kibut gi di eko ot. ³⁴ Do jo mogo oko ribere kede di gin kiko yei Yesu, kame kikom gi oudo tie iye Dionisio dano me Areopaga, kede dako kame nyinge Damari, karacel kede jo ace da.