1
. Di jo mogo oko wok iyudea oko donyo pwonyo imiegu di ki yamo be, kwanyo di okepo wu bala kame kitok a Musa tie kede likame itwerunu udo alako.
2
. Pi mano Paulo kede Barnabas oko piem kede gi likame kiko winyere kede gi, gin kiko moko be Paulo kede Barnabas kede jo ace kikom gi pore ot pakana Yerusalem but josiao kede jo dongo pi kop noni.
3
. Kakame gin kioto kede jo Kuristo gin kiko beo ki Poenike kede Samaria, di ki yamo epone kame jo alikeme Iyudayan olokere kede gin kiko kelo yom cuny adwong but imiegu lung.
4
. Kakame gin ki tuno kede Yerusalem kanisa oko gamo gi karacel kede josiao kede jo dongo gin kiko yamo gidedede ame Rubanga otimo kede gi.
5
. Do jo mogo owok iye ekodet me jo Parisayo oyei mege oko yai malo di ki yamo be oudo emitere me wek kop gi di oko mino gi lubo iswilia ka Musa.
6
. Di do josiao kede jodongo oko bino karacel pi nyamo kop noni.
7
. Do kakame piem oko doko kede dwong Petero oko yai malo di ko yamo ne gi be, Jona kede imieguna wun ingeo nu be ikare me cen Rubanga otimo yer mere buto be wek jo alikame Iyudayan pore winy kop mere kacil di beo kidoga, me wek ki yei.
8
. Do Rubanga ngat kame ngeo cuny mio ijura ikom gi di emogi Tipo kacil bala kite kame etimo kede but wada.
9
. Di likame eko koto apokapoka idiere diere wa kede gi di elongo kuo gi kede yei.
10
, Nanpimano pinyo kamio itamanu Rubanga di iketonu ayoko apek ingut josiao ame akadi jo apapi wa akadi wan likame otweronu tingo?
11
. Do wan oyei be di beo ikisa ka Rwot Yesu Kuristo wan obino lakare bala kite kame gida ilakare kede.
12
. Di do iwak jo oko ling ti di kiko mino kare but Barnabas kede Paulo, pi yamo gi aura kede jame tangu ame Rubanga otimo idiere me jo likame Iyudayan di beo kibut gi.
13
. Do kakame gin ki bedo kede kwei Yakobo oko dwoko be, jona kede imieguna winya nu:
14
. Esimoni oyamo epone kame Rubanga iye gege owenao kede jo alikame Iyudayan pi kwanyo ki but gi jo pi inyinge.
15
. Amanoni da kop me inabino bala kame owandiko yamo be;
16
. Ingei man ango abino dwogo di ako gero bobo tabarnakulo ka Daudi ame oudo opoto piny; di ako gero ameje mere bobo di oko mine cungo malo.
17
. Me wek jo odong twer mono Rwot kede jo kalikame Iyudayan ame olwongo kede nyinga di Rwot yamo ngat kame timo gigi dedede.
18
. Tice kame ngere ki but Rubanga geno iye agege me lobo.
19
. Pimano kop nango en be kur olol gi jokame owok kibut jo alikame Iyudayan otieko lokere but Rubanga.
20
. Do di awan opore wandiko negi en be gin ki pore weko dubere kede gi kame omio iworo cal jwogi kede kia dote kede jame kame deo jo kede camo remo.
21
. Pien geno ikare asek me ka Musa oudo tie jokame yamo ejiri ibul bomba aciel aciel kede di osomo gi bul ceng Sabato.
22
. Di kop nono oko yamo cuny josiao kede jo dongo kede kanisa dedede pi cwano jokame oyero kikom gi pi ot Antiokia kede Paulo kede Barnabas: Yuda ame olwonge be Barnabas kede Sila Ngadwong ikom imiegu.
23
. Di din kiko wandiko balwan iye eponeni be josiao kede jodongo kede imiegu ocwao amot but wu imiegu ame tie jo alikame Iyudayan ame tie Antiokia kede Siria kede Sisilia.
24
. Bala kite kame wan otiekunnu winyo kede be, jo mogo oyai idiere wa obedo lolowu kede kope totolo kuo wu di kiyamo be ipore nu kepere di ikounu lubo iswil ame wan likame omiyo.
25
. Ebedo ber ne wan pi cokere kede tam aciel pi cwano jo mogo ame oyero butu kede me amara wa Barnabas kede Paulo.
26
. JO kame ojalo kuo gi pi nying Rwot wa Yesu Kuristo.
27
. Wan ocwao Yuda kede Sila ame bino yamone wu kop nogo kede gd gi.
28
. Pien ebedo ber ne Tipo Acil kede but wada pi weko keto ne wu yei apek kalamo gi ame mitere.
29
. Me wek kur icamunu ringo kame omio but cal jwogi kede remo kede jame kame deo jo kede iye adote ikom magi kame in idaro komi ibino timo kiber amot but wu lung.
30
. Aso kakame ocwao gi kede gin ki ko ot Antiokia do kakame gin kiko coko kede iwak jo karacel gin kiko mino baluwa:
31
. Kakame gin kitieko somo kede jo oko ilel di cuny gi oko kwei.
32
. Di Yuda kede Sila obedo inabino kikom gi oko cuko cuny imiegu kede katot di ko moko gi.
33
. Kakame kitieko kede kare abor kuno imiegu oko gonyogi ot kede kwei but josiao.
34
. Do eko bedo yomo cuny Sila pi dong pwodi kuno.
35
. Paulo kede Barnabas oko mede bedo Antiokia ka pwony kede tito jiri me kop ka Rwot kede jo atot ace.
36
. Ingei ceng moro ace Paulo oko yamone Barnabas be, oti owenao imiegu wa ibul bomba ame otito iye jiri me kop ka Rwot, me wek oneni epone kame kitie kede.
37
. Barnabas ok moko pi ot kede Yokana ame nyinge ace obedo Marako.
38
. Do Paulo oudo tamo be likame ber ot kede, pien bin epokere ibut gi ipiny me Pampulia di li eko ot kede gi itic.
39
. Do peim oko bedo di tek idiere diere gi ame kiko pokere bul dano aciel aciel ibut ngat ocelu.
40
. Di Paulo oko yero Sila di kiko ot pien imiegu ikisa a Rwot en omoke.
41
. En eko ot beo Siria kede Sisilia moko kanisan.