¹ Kop amako konyo jo kacil, kony li me wandiko ne wun baluwa. ² Pien ango angeo tam wu, kame da ango awakere kede wu ne jo me Mekadonia kede Akaya ikom mwaka okato cen no, da ebura wu me mino kony omulo jo atot. ³ Kame ango atie cwano imiegu, me wek kur ewaka wa bed me atatai ibad ni, bala kame ayamo kede, wek ibedunu jo oyikere. ⁴ Me wek ebed me yom cuny kame jo me Mekadonia obino kede di ko udo wun iyikerenu, wek da kur lewic mak wa ikom gen kame wan owakere iye ni. ⁵ Pimano ango abedo paro kiber be wek acuk cuny imiegu, me gin ki gei bino butu, di gin kiko tieko timo yik me giamia atie cucuto, weko bala kame omio kede ngur. ⁶ Do man en gikame ango ayamo be, ngat kame cuo kodi anonok bino kano gi anonok da, do ngat kame cuo kodi atot bino kano gi atot da. ⁷ Bul dano kwanyi bala kame eyiko kede icunye, wek emi abongo ngur, do bala kame mitere kede pien Rubanga maro ngat amio kede cunye lung. ⁸ Rubanga tie kede twero me mino kisa ikom gi dedede but wu, me wek, nakanaka ibedunu tie kede pong ikom jame lung, me wek imedenu timo tice abeco. ⁹ Bala kame iwandik kacil yamo kede be, ngat kame sarakino tenge, giamia mere but jo can, poore mere bino dong nakanaka. ¹⁰ Rubanga ngat kame mio ngacuc kodi, en nono da kame emio wu cam, da en enyao kodere wu kame ocuo, di eko medo anyakini me poore wu. ¹¹ Ibinunu baro igi dedede tuno ipong. Kame bino mino wa dwoko pwoc but Rubanga. ¹² Pien tic noni likame tie kenekene pi cobo mit me jo kacil, do etie bobo itetem me mino pwoc opong but Rubanga. ¹³ Pien itetem me tic noni gin kibino mino deyo but Rubanga di lubere kede yom iyic wu ikop amako ejiri ka Kristo, da bobo pi mic wu but gi, kede but jo lung. ¹⁴ Kede da ilega gi pir wu bino mino cuny gi bedo but wu. Pi kisa a Rubanga wek bed but wu. ¹⁵ Pwoc bed but Rubanga pi giamia mere kalikame yamare!.