¹ . Piento wan ongeo bee, kame oot wa me eema me piny kan odubere wan otie kede gedo ka Rubanga, ot kame likame ogero kede cing kame bedo nakanaka ii malo. ² . Piento di pwodi otie imane occur atwatwal mere omito be ngap wa kede oot wa, ikokome me malo. ³ . Aso kame di oko umo kur bobo ud wa di otie nono. ⁴ . Piento wan to apwodi otie ii eema ni, occur di otie kede yec apek, likame pi be gony wa do ngap wa, me tetekeny kuo muony too. ⁵ . Nan ngat kame ocweo wa pi kop acel noni en Rubanga, kame en noni en omio wa cuny atek. ⁶ . Pi mano wan nakanaka otie kede gen atek, di ongeobee di pwodi otie ipaco ii kom udo pwodi ali kibut Rwot ⁷ . Piento wan ooto kede yei likame kede neno me wang. ⁸ . Ango oyamo bee, wan otie kede gen atek doko di otie mito be odok li ikom di oko bedo tie kede Rwot. ⁹ . En omio olole tetekeny bed bala do otie ara di oli amoto egam wa. ¹⁰ . Piento miero wan dedede oneno inyim kom me ngolo kop ¹¹ Pi mano, kite kame wan ongeo kede be Rwot poore alwora, wan otamakino wano tam me jo ace; do Rubanga ngeo wan, doko ageno be uda ingeunu wa i cunyu. ¹² Wan likame bobo otie pwore kenwa i nyimu, do wan otie mino wu gikame iromunu wakere iye pirwa, me wek itwerunu bedo kede kop kame iromunu dwoko ne jo kame wakere pi gikame neeno i ooko, do weko pi gikame tie i cuny dano. ¹³ Pien ka wi wan odubere, udo kidubere pi Rubanga; arabo ka wi wa tie kiber, udo kitie kiber piru. ¹⁴ Amara ka Kirisito but wa telo wa, pien wan otieko niang kiber be dano acel bin oto pi jo dedede; pi mano, jo dedede otieko to. ¹⁵ Aso, en eto pi jo dedede, tetekeny jo kame kuo kur doko meede bedo kuo pirgi ken gi, do kibed kuo pi ngat kame bin oto pirgi di oko yaruno en. ¹⁶ Pi mano, cako nataman wan likame oneno ngatamoro iekite kame dano neno kede; bed bala oudo i kare okato oudo obedunu neno Kirisito iepone kame dano neno kede, do likame bobo nan onene iepone nono. ¹⁷ Aso, ka ngatamoro tie i Kirisito, udo en etie giacwea anyen; gikacon okato, nan do gikame nyen otieko bino. ¹⁸ Magi dedede Rubanga en kotimo, ngat kame odwoko nywak wa kede en i Kirisito, di eko mino wan tic me dwoko jo apat i nywak kede en. ¹⁹ Dwong mere be, i Kirisito, Rubanga oudo tie dwoko nywak mere kede jo dedede me piny di likame emaro dub gi i wi gi, kede di emio wa kop kame nyuto epone kame jo romo dok bobo i nywak kede en. ²⁰ Aso, wan obedunu jo kame cungo akaka Kirisito, pien Rubanga tie kwano wu di ebeo kibut wan. Wan ongangao wu akaka Kirisito, dokunu bobo i nywak kede Rubanga. ²¹ Rubanga omio Kirisito ngat kame oudo li kede dub onywako dub wa pirwa, tetekeny odokunu jo kopoore i nyim Rubanga pi Kirisito.