¹ Pimano, bala kite kame omiowa kede tic ni, wan likame okwanyo cuny wa iye pien Rubanga en omiowa kisa me time. ² Wan otieko dagi gi dedede me lewic kame otimo i omung. Wan odagi tim me angalo, arabo dwadwanyo kop ka Rubanga di oyamo kop me abe, do wan opwonyo kop me ateni ilero inyim Rubanga, di dano acel acel ko ngeno icunye be wan jo abeco. ³ Doko akadi ka ejiri kame wan otuco oumere, en eumere ne jo kame tie rwenyo atwal. ⁴ Jo kame rubanga me piny kan otieko umo tam gi, gin jo kalikame yei Kristo. Tetekeny kur kinen lero kame wok kiye ejiri me deyo ka Kristo, ngat kame cal acala kede Rubanga. ⁵ Wan likame otatamo kop kame mako wan, do wan opwonyo Kristo Yesu kame obedo Rwot, kede wan ikomwa kame obedo jotic pi Yesu. ⁶ Pien Rubanga en owaco be, "lero rienyi icolo." lero noni en oko orieny icunywa, di emio wa lero me ngec me deyo ka Rubanga inyim Yesu Kristo. ⁷ Do wan jo kame otio kede abar noni acal bala agune kame ocweo kede elupe, tetekeny teko me twer akalamo dedede bed me a Rubanga, do likame i but wan. ⁸ Wan nakanaka omio wa oneno can iye epone dedede, do likame oridakino wa atwal atwala, wiwa cungo, do gen wa likame kwanyere. ⁹ kotidilo wa, do Rubanga likame jalo wa, korereto wa, do wan oko yai bobo. ¹⁰ Wan nakanaka ooto kede to a Yesu ikomwa, tetekeny kuo ka Rwot Yesu nyutere i kom wa. ¹¹ Pien ikare dedede me kuo wa, wan ojalere to pi Yesu, tetekeny kuo mere nyutere ikom wa kame to nogi. ¹² Aso, to tie tic ikomwa, do kuo tie tic ikom wun. ¹³ Do bala kame otieunu kede cuny acel me yei, bala kame kowandiko be, "Ango ayei, omio ako ayamo." Kamanono da wada oyei, di oko yamo, ¹⁴ Pien wan ongeo be ngat ko yaruno Rwot Yesu bino yaruno wada karacel kede Yesu, di eko bino tero wa karacel kede wu inyime. ¹⁵ Magi dedede tie piru, tetekeny bala kite kame kisa ka Rubanga tie mede ameda nyai but jo atot, wek emi pwoc kame jo mio meede di ko kelone Rubanga deyo. ¹⁶ Aso wan likame okwanyo cuny. Akadi bed bala komwa tie dubere momot, do kuo wa me cuny otie mine edoko nyen ceng dedede. ¹⁷ Pien can awekeweke kame wan nataman otie neno tunu tunu noni, tie iiko ne wa deyo adwong kalikame wacere, kame bedo nakanaka. ¹⁸ Pien wan likame oketo tam wa ikom gi kame neeno, do ikom gi ka likame neeno. Pien gi kame neeno tie pi kare acecek, do gi ka likame neeno bedo nakanaka.