¹ Abongo gung icunya, ango miero awakere, bed bala likame eber; do ango abino ot anyim ikom gikame Rwot oyabo kede kame enyuto na. ² Mwakini tomon kiwie ongwon cen, ango ako neno icuo moro kame tie i Krisito, kame bin kotingo oko tere i malo me adek; ango likame angeo arabo kotere malo kede kome ni amoto likame ikome ni, Rubanga en kame ngeo. ³ Doko ango angeo be icuo nono bed bala kotere i kom amoto likame kede kome, ango likame angeo; Rubanga en kame ngeo, ⁴ Bala kame oko tinge kede otere malo iparadais, di en eko winyo kop kalikame otwero yamo; kalikame oyei ne dano pi waco. ⁵ Pi akodi dano noni, ango abino wakere, do di likame pira, do pi goro kame tie ikoma. ⁶ Bed bala koto ango amito wakere, likame bino mina bedo ngat kame ming, pien udo ango abino yamo kop me ateni, do nan atie dino cunya, me wek kur ngatamoro bed kede tam amalo ikoma kalamo kame en etie neno ikoma arabo kop kame en etie winyo ikoma. ⁷ Tetekeny kur aketere iruom amalo kame kalamo, pi gianyuta atot oneno na; gini oko mino oketo okuto ikoma kame obedo ngaor ka Sitani, pi keto lito ikoma me wek kur abed kede tingere akalamo ruom na. ⁸ Kop noni oko mino ango abedo mono wang Rwot tien adek, tetekeny koto kwanye ikoma. ⁹ Do en eko wacona be, Kisa nango konyi cungo, pien twer nango neno igoro nin. Pi mano, kede ilel adwong, ango do miero awakere igoro na, me wek twer ka Krisito bed tie ikoma. ¹⁰ Pi mano ango alelo pi goro, ayet, ikare me rem, itidil kede neno can pi kop Krisito; pien kame ango awinyo goro, udo do atek. ¹¹ Ango adoko ngamingo ikom kop me wakere; wun en kame idianu iye, pien oudo poore un nyuto pwoc buta: pien likame tie gimoro kame mio ango atie cen me joor adongodongo, bed bala ango kony na li. ¹² Man ateni, bin gainena kame nyuto ngaor otimere idiere wu kede dire atek, kede gianyuta, jame me aura kede tice me twer. ¹³ Pien nyo inonono kame orem kibutu kalamo kanisan apat, kwanyo kenekene be ango likame ako mino wu tingo pekini na? Timanu kisa pi giarac noni; ¹⁴ Neni, ango nan atieko iikere me bino butu tien me adek, do likame ayaro mino wu yeno pekini na, pien ango likame amo gikame itienu kede; kwanyo ango amo wun nogo, pien idwe likame kano mono pi jonywal, do jonywal en kame poore kano mono pi idwe. ¹⁵ Doko cunya bino bedo kede ilel, pi mino jamini kame ango atie kede, naka ango kikoma pir wu; bed bala ango abino anyuto amara adwong but wu, amara wu bino dong di titidi. ¹⁶ Bed bala etie amano, ango likame ako mino wu yeno pekini na; amago tie da, atio kede diru di ako ngangalo wu pi dino wu. ¹⁷ Benyo, tie ud moro kame ango audo, kibut jo kame ango aoro butu? ¹⁸ Ango oudo acwao Tito pi bino butu, en kede omin wa. Benyo, Tito oko mito gimoro kibut wu? Likame wan obedo nyuto cuny acel? Likame wan olubo ekite acel? ¹⁹ Bobo, iparunu benyo, oudo wun ibedunu tamo be wan otie udo epone me naco kope idyere wu? Wan obedo yamo inyim Rubanga i Krisito: jo na me amara, gi dedede kame wan timo, otie timo pi dongo yei wu. ²⁰ Pien ango atie kede lworo be, amotoko kame ango ako bino, likame ako bino udo di wun itienu kede tim kalikame ango amito; kede me wek akadi ango da kur audere di atie kede tim kalikame wuda imitunu, me wek kur piem moro amako nyeko, lilo, rwenyo niang, loko kop, akwot, ewaka kede atotolun woki. ²¹ Me wek kame ango abino butu, kur Rubanga na dwoka piny inyim wu, di ako romo tururo itek pi jo atot oudo odubo, di pwodi likame iswilaro itim nono me bedo jo kalikame cil, adote kede mit arac me lewic me kom kame gin kitimo.