¹ . Man en tien me adek me ango bino butu. Do idog imujurak are arabo adek kobino moko kop acel acel. ² . Ango bin ayamo neu cuto doko ayamo neu sek ineno bala koto oudo di atie butu tien me are do kite kame ango ali kede ibutu mia awandiko but jo kame ngeo be kitimo bal kede jo apat dedede be kame ango abino kano dokon likame ayaro bino weko ngatamoror atwal. ³ . Bala kite kame un itie unu mito ngeno kede amok me Kristo yamo kede ki iyango, kame liame goro ibutun do ebedo me twer atek twatwal kii un. ⁴ . Bed bala bin kogure kii goro do en ekuo di beo ki twer ka Rubanga. Pien wada nogi ogoro kii en do oyaro bino kuo kii en di beo kii twer ka Rubanga paka butu da. ⁵ . Ngingicunu komu kenu tetekeny ingeunu kame di itieunu i yei, niangunu kuo u ikomu benyo likame itwerunu ngeno kuo u ikomu kame di Yesu Kristo tie ii u, kwanyo kame di orwenyo u. ⁶ . Do ango ageno be un pore di ingeunu be wan likame obedo jo ko parao. ⁷ . Nan do ango alego but Rubanga be okwec koto kur itimunu gi arac: likame be wek wan oneno bala jo kabeco, do wek tetekeny un itimunu gi ko pore akadi di wan otie bala jo ko parao. ⁸ . Pien wan liko twero timo gimoro me gengo ateni. ⁹ . Wan cuny wa yom kame ogoro do di un itekunu dokon da oparo be, koto un idokunu jo ko cwinyi. ¹⁰ . Pimnao ango awandiko neu gigi di ali ibutu tetekeny wek kur ater u irac be pien atie kede u, di lubere kede twer ka Rwot kame en emia me gero jo, do likame me rereto gi. ¹¹ . Me ajikini mere imieguna bedunu kiber bedunu jo ko cwiny iber bedunu jo ka cuny gi okwei bedunu kede tam acel bedunu kede anapakin dido Rubanga me amara kede anapakin kobino bedo kede u. ¹² . Moterenu un kenu kenu di idotunu lem u kede amara ka cil. ¹³ . Jo ka cil dedede moto wu. . Kisa ka Rwot wa Yesu Kristo kede amara ka Rubanga kede nywak me Tipo ka cil, bed kede un dedede. Amen.