1
. Aso bala kame Kristo oneno kede can kiikome ojiko do timo gi karac.
2
. Liame dokon epoore meede bedo iye imue me kom pi kare dedede me kuo mere, do epoore kuo ki imit ka Rubanga.
3
. Pien an otieko dubo kare koromo pi timo mit me obilere kame kwia Rubanga kakame wan oudo ooto kede ki i caro, imue, amera, miello ekoso, ibagai karaco, kede tim me kwer me wooro cal jwogi.
4
. Kanono en komio gin kitamo be gi kame yin itimo pat apata pien yin likame iko yei meede kede gin itim me ecejo, dido gin ki ko geeno yamo kope kareco ikomu.
5
. Kame bino miino adwokini buten lo koyaro ngolo ne jo ka kuo kede jo ko too kop.
6
. Pi tien kop nono en ko mio ejiri bin oko oot tito ne jo kame oudo tie kede kom gii do ki bed bala kame Rubanga mito kii cuny.
7
. Do ajikini me jame dedede tie do icing wa: pimano, bedunu riek, di ikiun piny ki ilega.
8
. Dokon, gi kame kalamo gi dedede, bedunu kede amara katek idiere diere u kenu: pien amara bino umo alule me bal.
9
. Jol dano wadu abongo i ngungur.
10
. Aso, bala kame dano acel acel otieko gaamo kede giamia, iye pone acel nono, dano tiine ngat ocelu, bala ngadar kagenere me kisa ka Rubanga kolamar.
11
. Kame dano moro yamo, yamo mere poore wok bala yabere ka Rubanga: kame dano moro tie tic, poore etim tic bala kede teko kame Rubanga miiyo: tetekeny wek Rubanga ud deyo kii gi dedede beo kibut Yesu Kristo, kame pak kede pug tie bute pi i kar ked ikar. Amen.
12
. Un jo kame ango amaro, kur ibedunu kede tam ikom atama kager kame tie taamo u go; bala gikanyen moro do en kame tie timere neu.
13
. Do lelunu itek twatwal, bala jo kame tie nywaako can kame Kristo oneeno, wek tetekeny kakame deyo mere yabere kede, wudu itwenunu bedo kede ilel me yom cuny kolamar.
14
. Kame kocaowu pi nying Kristo, bedunu kede yom cuny; pien tipo me deyo kede me ka Rubanga wei ikomu; ibut gin, koyamo kop arac ikome do ibutun en eudo deyo.
15
. Do kur ngatamoro ikomu nen can bala nganek amotoko bala ngakuo, arabo bala ngatim tice kareco, amotoko bala nga iramai ikom kope kamako jo ace.
16
. Kame ngatamoro tie neeno can bala Akuristayo, kur ebed kede lewic, do epore miino deyo but Rubanga pi manono.
17
. Pien kare otuno kame ngolo kop poore gere i ot ka Rubanga; aso kame dido egere kibut wan, ajikini me jo kodaagi wiinyo ejiri ka Rubanga oyaro bedo benyo?
18
. Dokon kame jo ko poore omito bwot abwota, tuwai do en kame jo akwia Rubanga kede jo dubo oyaro neeno kiye?
19
. Pimano, wekunu do jo kame tie neeno can dilubere kede mit ka Rubanga ket gwokere me tipo gi but en kii tiimo tice kabeco, bala but ngacwec kame genere.