1
. Di dokon imiegu kede amiegu atuco kaler but u ejiri ame atilo but u ame da agamunu kede ame icungunu da iye;
2
. Ame da dako u ka me imakunu iwiwu nyo ame atilo but u, amosoko kame iyei igi alikede anyut.
3
. Pi amio but u me agege gi me ada agamo epone be Kristo otoo pi vac wa di lubere kede igigir kede be oudo oyike.
4
. Kede be eyaruno bobo ceng me adek dilubere kede igigir.
5
. Kede be onene Kephas dido but tomon iwie are.
6
. Di mano otiek onene iwi imiegu kede amiagu so icel ikom gi ka tot mere dong paka nan do ace opoto onino.
7
. Di mano otiek oko neno but Yakobo dido but jo siao duc.
8
. Kede do me atiekini eko neno but ada do bal ngat kame onywalo oko me kare.
9
. Pien ango atie me atiekini jo siao, be ango likame ariami me iwongere be ngasiao pien atimo kirac kanisa ka Rubanga.
10
. Do pi deyo a Rubanga atie ngo arigo atie kede deyo mere abin omia likame oudo lika kede anyut do atie kitek sana lono un dedede: dodi lika ango do deyo a Rubanga ame oudo tie keda.
11
. Pimano ara oudo ango ara gin aso wan otito kede aso un ikonu yei.
12
. Nan ka Kristo otitoo be eyaruno itoo, Benyo omo mogo ikom u yamo be yaruno li me jo otoo?
13
. Do ka yaruno bedo line jo otoo, udo Kristo kiko yaruno:
14
. Kede ka Kristo lika me oyaruno, udo tito kop wa likede anyut.
15
. Ebo, kede udo oudowa jo jurao me abe a Rubanga pien wan omio caden a Rubanga be eyaruno malo Kristo: ame eyaruno lika malo kame amano etie be jo otoo yaruno li.
16
. Pien ka jo otoo yaruno li udo Kristo liko yaruno.
17
. Kede ka Kristo li ko yaruno, yei ni li kede anyut pwodi itie i raco ni.
18
. Udodo gida ame onino in Kristo udo orwenyo (otoo).
19
. Kame ii kuo ni kenekene otie kede gen i Kristo wan ikom cuo dedede otie obongo anapakin.
20
. Do wan tie Kristo oyaruno i kom jo too kede eko bedo anyakini me agege ibut jo konino.
21
. Pien bin ii cuo too obino, ii cuo da obino bobo yaruno me jo otoo.
22
. Pi bala i Adamu duc too kadi iamanono i Kristo duc obino mino bedo kuo.
23
. Do buli icuo ii aikaika mere: Kristo anyan kini me agege icen mere gin ame tie me aKristo ii bino mere.
24
. Dido ajikini bino kame en udo emio malo ajakanut a Rubanga, kadi papa kame en udo eyaro keto piny duc iswil kede akarinikin kede teko.
25
. Pien epore pug, pakana di eketo jo kwor dedede i dud tiene.
26
. Ngal kwor me atiekini ame oyaro dudubo en too.
27
. Pien eketo gi dedede idud tiene. Do kame eyam be gi dedede oketo idud en etie neno kaler be en di eli iye, kame oketo gi dedede idud en.
28
. Kede kame gi duc obino kelo itwero mere, en dido wot da en ikome bino bedo cen but en ngat kame keto gi dedede idud un, be Rubanga miero bide duc ii duc.
29
. Kali nyo kame gibino timo gin ame abatiso pi jo otoo, kame jo otoo yaruno li atwal? Nyo omio do obatiso gi pi jo ko too?
30
. kede nyo omio ocungunu i epone karac buli esawa?
31
. Ango lika yei kede yom cuny u ame atie kede i Kristo Yesu Rwot wai atoo buli ceng.
32
. Kame kede epone me cuo ayi kede tieni me obar i Ephesus bero nyo emia kame jo otoo lika yaruno? ocamunu okonu mat; pien diki otoo.
33
. Kur ongal u: yamo kareco totolo eponeso kabeco.
34
. Aceunu i porere kede kur itim gikarac pi mogo likede ngec a Rubanga: Ayamo gini but lewic u.
35
. Do cuo mogo oyaro waco be, epone mene ame jo otoo oyaruno kede? kede kom mene ame gi bino kede?
36
. Lin amang, gi ka mme yin icuo lika me olalaro kenekene eto.
37
. Kede gi ka me yin icuo, yin icuo likame kom koyaro bedo do nyige kede eromo bedo me aloss ara me nyige ace moro.
38
. Do Rubanga mien kom bala kite ame cunye owinyo kede buli kodi kome kene.
39
. Del kom dedede likame de kom acel: do tie epone me del kom me cuo ace del kom me leini obar ace me aporogon kede ace me winy.
40
. Tie bobon da kom me malo kede kom me piny kan: do deyo me ame malo tie acel kede deyo me ame piny tie da ace.
41
. Tie deyo acel me ceng kede deyo ace me dwe kede deo ace me acerin: pien acer acel but kede acer ace i deyo.
42
. Aso manono da yaruno me jo otoo. ocue iatotolun oyaruno en abongo atotolun.
43
. Ocue abongo wor oyaruno en ii deyo: ocue ii goro; oyaruno en ii teko.
44
. Ocue kom kikome, oyaruno en kom me tipo kom kikome tie kede tie kom me tipo.
45
. Kede owandiko be, icuo me agege Adamu oudo otimo tipo kakuo Adamu me atiekinioudo otimo tipo kalaro.
46
. Gi kame oudo me agege lika obedo tipo, do gi kame tie kikome, ii cen mere gikame tipo.
47
. Icuo me agege tie me piny lobo: Icuo me are tie Rwot oyai i malo.
48
. Bala kame piny epone nono en jo me piny da: kede bala kame malo eponenono en jo me malo da.
49
. Kede bala kita wan ongapo cal me piny, oyaro bobon nyuto (ngapo) cal me malo.
50
. Nan ayamo gigi, imiegu kede amiegu, del me kom no kede remo lika donyo iajakanut a Rubanga, akadida atotolun donyo iabongo atotolun.
51
. Neni anyuton gi awura wan dedede lika me oyaro mino do wan dedede oyaro loko wa,
52
. Li kare anonok, ii mwakak me wang, ii agwara me atiekini pi agwara oyaro kok, di jo otoo oyara yaruno abongo atotolun kede wada oko lokowa.
53
. Pi atotolun ni poro ngapo abongo atotolun kede ali akuo nakanaka ni pore ngapo akuo nakanaka.
54
. Aso atotolun ni di ongapo alikame totolun, kede ali akuo nakanaka ongapo akuo nakanaka dido kop me acowa obino cobo, too omwonyo iyii (loc).
55
. Okwe too, lito ni tiai? okwe ates lono yii ni tie aii?
56
. Lito me too en dub kede teko me dub en iswil.
57
. Do pwoc bed but Rubanga ame mio wa loc diyai ibut Rwot wa Yesu Kristo.
58
. Aso nataman imieguna kede amieguna me amara, bedunu isipakin di likame irianrianganu, di itimunu tic ka Rwot, pien bala kame ingeunu kede ticeu likame tie abongo anyut i Rwot.