¹ Momatango atcho ongo, nkhe akumunika vhali otchimbiula otchinene, ya ovho nkhu kavhena tchi mavhali. Yesu aifhana ovhalongua Vhae atia: ² Ndjino onkhenda yotchimbiula, ovho vhena omala atatu naami, kavhenatchi mavhali. ³ Ami ndjitia endeni koyondjuvho zheni havhalile, mavhakapoyolea mondjila. Ovhengi vhalua kokula. ⁴ Ovhalogua Vhae avhatavhele okuti: Opi ku nge matukahanga oyombolo oyongi tutukifhe ovhanthu omba mehandja endinu? ⁵ Yesu apula: Muno yombolo ngapi? Ovho avhatia: Epantuvhali. ⁶ É atumu otchimbiula okukankhama pohi. É akuata oyombolo epantuvhali, apandula ya ateya; apá ovhalongua vhae vhaendje, ya ovho avhandjele otchimbiula. ⁷ Ovho navho nkhu vheno oumphonde ouñphiki, tchamana okupandula, É atumu ovhalongua vhevhe andjele. ⁸ Ovho avhali avhatuka. Ovhalongua avhakuata ovhimbemba eñphi vhiahupile, oyongalo oyonene omapantu avhali. ⁹ Nkhu pena oyomili nkhuana ozhovhanthu pueinha. Yesu evhelekele. ¹⁰ Mondjayatcho É aende kombaluku novhalongua vhae, avhande kotcilongo tcho Ndalmanuta. ¹¹ Pae ovhafalicheu avheya afhimbike okutanguna na Yesu. Avhemukumbu otchilimbo tchimu otcho peulu, Vhemulole. ¹² Tchafhumeã kohi komphepo Yae, atia: palatchi omuhoko ombo maukumbu otchilimbo tchimu? Otchatchili ami mimuhele, kutupu otchilimbo nge matchikapewa omuhoko ombu. ¹³ Ya, tchivheyeka, ahiti vhali mombaluku aende kotchikolo otchikuvho. ¹⁴ Pae atchitia ovhalongua ahamavhatchindi oyombolo. Ya nkhu vhena pe ombolo imu mombaluku. ¹⁵ Yesu atia: Takamifheñmi ya pukulukeñmi kofulumentu yovhofalicheu, nokofulumentu ya Helote. ¹⁶ Ovhalongua avhafhimbike okupopia poluavho okutia: Aye tutupu ombolo. ¹⁷ Yesu tchetchitea tcho, atia: palatchi mamutanguna otchi hamuna ombolo? Napahe kamuyatea? Kamuifhepo? Zhakola oyombungu zheni? ¹⁸ Mono miho kamumunoko? Muno makutui kamute? Kamunongonuka? ¹⁹ Tchi Ami mbateyele oyombolo nthanu pokati koyo mili nthanu, oyongalo ngapi ozhoyombolo muanhangulile? Ovho avhatavhele okutia: Ekuinhi na mbali. ²⁰ Ya natchi mbateyele oyombolo epantuvhali pokati koyo mili nkhuana, muangezhele moyongalo ngapi? Ovho avhatia: Epantu vhali. ²¹ Pae evhepula: Ya nkhe kamuyaifhapo? ²² Ovho afhiki Kombetichaita. Ovhanthu avhatuala ku Yesu omupotchui vhekemumbe okutia emuvhihe. ²³ Yesu emukuata mokuvhoko emutuala okuhondovhoka pua nkhu vhakala. É tcha afhipea pomihoae emukuatelele, Emupula okutia: Unatchi mumunu? ²⁴ Tcha aikula pomiho, é atia: Mimunu ovhazhiu mavhanga omiti mavhiendaenda. ²⁵ Pae nkhe emuvhizha vhali komiho; omiho omuzhiu akanawa ya é avhihe evhimunu nawa. ²⁶ Yesu emutumu aende kondjuvho yae, atia: Hohiti motchilongo tcho. ²⁷ Yesu aende novhalongua vhae kotchilongo tcho Chechalela oya Filipi. Mondjila, É apula ovhalongua: Ovhanthu vhatuta okutia ami ivha? ²⁸ Ovho avhatavhele okutia: Ovhe Ndjoau, Mbatichita. Vhamu avhatia: Ovhe Elia; kuvhamu avhatia ovhe omutuminua. ²⁹ É nkhe apula: Ya onue mamutia Ami iwa? Akutavhele Petulu atia: Ovhe Clistu. ³⁰ Yesu evhehele okutia nge hamukankhola kovhanthu. ³¹ É afhimbike okuvhelongefha okutia Ondeyo Muzhiu uno lhokumuna hohali yovhipuka ovhingi, nokunionua novhanene, novhatuita oma vhavhalela, noyokilipa, unolho kutchua, nokututila momala atatu. ³² É tcho wapopia lumu okulimana. Pae Petulu, emuifhane kotchikolo Nae, afhimbike okumuyalela. ³³ Yesu aleuka, atala kovhalongua, Yalele Petulu, okutia: Kefhina Lhange Elhapu! Kututu kovhipuka vhia Huku, ututa ovhipuka vhiovhazhiu. ³⁴ Pae É aifhana otchimbiula novhalongua atia: umu ngahanda okunthezha, ngelilovhole poluae muni, okukuata ekulucho lhae nthezhange. ³⁵ Mokonda iñgua mahanda okuyowola omunhu vhae, makemuwomba, iñgua mavhombo omunhu vhae mokonda yange noyondaka yenge, engó mekeuyowola. ³⁶ Otchiwa patchi makaninga iñgua mapikulula ouye avhombo omunhu vhae? ³⁷ Otchitchi tchi omuzhiu nge mayeka motchikonda tcho munhu vhae? ³⁸ Iñgua melitalaleke kuaMi nokondaka yange momuhoko umbo haufuifhapo kokuká na Huku ovhoyopekalo, Onde Yomuzhiu nae mekelitalaleka nae ngeya koumbala vha Hé Yae nokoyoyo andju.