¹ Ovhafalicheu noyokilipa vhamu nkhu alua kochiluchale, avheliongezhe pu Yesu. ² Ovho avhamunu ovhalongua vhae vhamu mavhali oyombolo nomawoko achila. ³ Pae ovhafalicheu novhachendeu zhatcho avhehe pua havhakohe omavhoko kavhali, mokonda nkhu otchivho tchovhanene. ⁴ (Pua vhatchuna komelekatu, ovhafalicheu kavhali, pua havheyatenga okulikoha. Ya kuno ovhizhilika vhimu ovhingi imbi ovho vhatezha okafho nongozhi, okuvhezhako vhali okukoha omaholo, nomatemba, noyonphako, noyohupa, hinde novhipundi vhiavho ovhio kutankhama). ⁵ Ovhafalicheu novhakilipa avhapula Yesu: palatchi ovhalongua Vhoe vhaka havhahumbe ovhituvho vhiovhanene, pokulha oyombolo zhavho kavhakoho omavhoko? ⁶ É evhetavhele: vhelipakiko, nawa wapopia Ichaiya koónue, ngatchi tchahonikua: Ovhanthu omba vhantchumba novhinho vhiavho, oyombungo zhavho zhikokula nami. ⁷ Elikuambelo lhawo nkhu kalivhalelele, vhalongefha ovhitumino vhiovhazhiu ngovhituvho vhiavho. ⁸ Onue muayeka omatumino vhia Huku muahumba kovhituvho vhiovhazhiu. ⁹ Nkhe atia: Nawanawa kumutavhele omatumino vhia Huku pae mutehe kovhituvho vhieni! ¹⁰ Ya Moichechi watia: humba hô nanhukó, ya iñgua mapopi navhi he naina, tchatchili makatchua. ¹¹ Ya pae onue mumutia: Omuzhiu umu ngapopi kuhe nakuina: okuvhatelua kunge atambula kuami oko Corbã, (tcho tchapopia okutia, tchandjelua ku Huku), ¹² ya nge hoyeka vhali é aninge otchipuka tchimu kuhô nakunhukó. ¹³ Tcho mamuzhimifha otchitumino tcha Huku, motchituvho tchi mualongefhele. Ya onue mamuningi ovhipuka ovhingi eñpli vhielifha. ¹⁴ Nkhe vhali, É aifhana otchimbiula atia: Amuhe onue, telelini tchi mipopi, ifhenipo. ¹⁵ Kutupo tchi tchelikalela komuzhiu nge okutchilia matchimuningi navhi. Otcheinha tchilua mokatikae tchila otchivhi. ¹⁶ Iñgua enokutui okokutelele ngate! ¹⁷ Poyatcho, tchi Yesu ayeka otchimbiula, ahiti mondjuvho, ovhalongua Vhae avhemupula omuheti. ¹⁸ Yesu atia: Naonue napahe muka hamuyafhapo? Kamumunuko okutia tchi tchihita momuzhiu nge katchile otchivhi, ¹⁹ mokonda tcho nge katchihiti mombuyae, tchenda meyumu lhae avhikeluachi. Nomalaka ongo, Yesu aningi oyondia zhatcho azhihe okuila oyombua. ²⁰ Yesu atia: Tchi tchilua momunthu otcheli otchivhi. ²¹ Mokonda mokati kombungo, mulua okututa okuvhi, okulialefha hamulikupile, okuvhaka, ovhineya, ²² nokotia ovhe kokupile okula naomba wakupua, okuhopela, okukelenga, okuhanda ovhipuka, enunaevhi, okunamikila ovhakueni ondaka havhenatchi vhapopia, okututa okutia ovhe wavhalela vhali kovhakueni, nokuomba mupengaefha. ²³ Avhihe ovhivhi imbio vhilua nomokati, imbio vhiningifha vhichilika omunthu. ²⁴ Yesu alupo aende kotchilongo tcha Tilu noko Chindon. Ahiti monduvho imu ya nkhu kahande vhetchivhe okutia É nkhu okakala, ya ahamatchivhele. ²⁵ Mondjangayatcho pae, omukai imu nkhu enonde omuñphuku ahitua enoyohandi, tchi atea Yesu, eya aonge koyongolo koyomphazhi zha Yesu. ²⁶ Putcho omukai nkhu ongoleko, ovho konthuko chilo-fenicha. É akumbu ku Yesu aifhemu omalhapu mondeyae. ²⁷ É atia: Yeka oyondele vhetchitenge okulia. Mokonda hatchiwa okuifha ombolo oyondele okuyumba kouvhanona. ²⁸ Pae é Emutavhele: Ewa Tate Kulu, hinde novhivhanona kohi yomecha vhilha oyonhaha zhoyondele. ²⁹ É atia: Mokonda vhapopia tcho, upondola okuenda. elhapu mondeyoe lhaluamu. ³⁰ É atchuna kondjuvho yae ahiti avhafha ondele alapo kohama, pae elhapu nkhu lhemuyeka. ³¹ Pae, Yesu nkhe aluvhali kotchilongo tcho Tilu, okukuata kochindo té kelunga lho ngalileya, kotchilongo tcha Ndecapoli. ³² Ovho avhemuete ompholo nkhu alemana kokupopia, pae nkhu makumbu ku Yesu apake okuvhoko Kuae kue. ³³ É emuifha potchimbiula ya, poluae muni, apaka ominue vhiae komakutuiae ya, tchamana okufhipila, É nkhe emuvhizha kelaka lhae. ³⁴ Yesu atala peulu afhuma atia: Efatá!, tcho tchapopia okutia, liikula! ³⁵ Ya mondjangayatcho, omakutuiae aikuka, tcheinha nkhu tchitchaela elaka atchifhuapo, ya é afhimbike okupopia nawanawa. ³⁶ É evhetumu okutia nge hamuketchi popia. Tchi nkhu ayaelela, otchovhali nkhu vhapopia. ³⁷ Ovho nawanawa nkhu vhaomba vhahakuka, okutia: É ovhipuka vhiatcho avhihe wevhininga nawa. É waninga hinde nompholo okutea ya ovhokuhapopia afhimbike okupopia.