¹ Yesu ko aluko eya kotchilongo tchae ku ayomukilua, ovhalongua Vhae avhemutezha. ² Tchi tchefhika otchachapalo, É alongefhe kochinangonga. Ovhengi vhemutea avhahakuka. Ovho nkhu mavhatia: Opiku É alongoka oyontunge enbheo? Ounongo patchi apewa? ovhilikifha patchi É aninga nomavhokoe? ³ Haé ingu okalupindelu, odeya Maliya, omuangu vha Tiaku, na Chuse, na Chunda na Chimau? Kavhena otue avhangu vhae? Ovho vhatcha ohomhi na Yesu. ⁴ Yesu atia: Kutupu omutuminua nge hahumbua, heli kotchilongo tchae ku ayomukilua, nomapangae muni, no kondjuvho yae muni. ⁵ É nge kena otchilikifha nge anininga ko, heli ovhavhezhi, omba nkhu É ahakula nomavhokoae. ⁶ Tchi nkhu havhena ekolelo Kuemuyeka apoyola. Ya é aende moyolua okukalongefha. ⁷ É aifhana ekuinhi navhavhali afhimbike okuvhetuma; vhavhali vhavhali; ya evhepa oyonkhono zhapomhuka oyohandi, ⁸ É evhelongo okutia pokuenda hamuhumbula natchimu, heli otchiyakulilo: né oyombolo né ovhipapo, né oyombongo momivhia vhieni, ⁹ Okuwala pe oyonkhaku ahamamuvhala ovhikutu vhivhali. ¹⁰ Nkhe atia vhali: Pua muhita mondjuvho imu, ombenimu té omuhuka mamukapita. ¹¹ Ya ngaele pua hamuna pua mamuyeke ya ahamavhemutelele, nge mueya pokuluapo, pukumuneni ombuma kohi zhoyomphzhi zheni, ngoumbange kuvho. ¹² Ovho avhalupo avhakpopia kovhanthu okutia vhelivhele koyopekalo zhavho. ¹³ Okuifhamu amalhapu, nkhu taka nomulela ovhavhezhi ovhengi auvhevhe hakula. ¹⁴ Ohamba Helote tchi yatea tcho, mokonda ena lha Yesu nkhu lhapakuako unene kokuivhua. Vhamu nkhu vhatia: Ndjoau, Mbatichita, nkhu atutilifha kuomba vhatchua mokonda yatcho, oyonkhono enbho ozhokuhakukifha zhavhavhekua Mué. ¹⁵ Vhamu nkhu vhatia: É Elia. Nkhe vhamu vhali avhatia: É omutuminua umu, ngovhatuminua vhamu ovhokolukulu. ¹⁶ Pae Helote tchi atia tcho, atia: Ndjoau, ingo ami mbateta omutue, vhatutila. ¹⁷ Helote muni watume okukuata Ndjoau emupaka mokaleya mokonda ya Elondia (omukai vho muangu vhae Fiipi), mokonda é nkhu vhelikupa naé. ¹⁸ Mokanda Ndjoau vhahele Helote: Katchikale navha ovhe okuka nomukai vhomuangu vhoe. ¹⁹ Pae, Helondia nkhu ka noluyuma na Ndjoau ya nkhu ututa okumuleka, ya pae nkhu katchitavhele, ²⁰ Mokonda Helote nkhu vhahumba Ndjoau, ya nkhu utchi okutia é nkhu omuzhiu umu ovhatchatchili afuapo, ya nkhu umukuata navha. Pokutelela Ndjoau, Helote nkhuomba emuhumba, pae nkhu umutelela nawa noholo. ²¹ Pae, potchitenha tchimu otchivha, tchi nkhu maningi enima, Helote apa oyondia ovhanene, nokoyokomandanti ya novhatumini vho kongalileya. ²² Ondeya Helondia eya vhazane ya atchilemifhua Helote novha kongua vhae. Ohamba mondele aitia: Nkhumbange ngaele pe tchi vhahanda ami mikupa. ²³ É elimana kue okutia: Otchatchi munkhumbu ami mikupa, hinde notchinthimbu otchoumbala vhange. ²⁴ É alupo ya mu ina atia: Otchitchi nge mimukumbu? Ina atavhele okutia: Kumba omutue vha Ndjoau, Batichita. ²⁵ É mondjayatcho alumbana okutchuna kohanba ya akumbu okutia: Mbahanda uñphe, pahe lumu, melonga limu, omutue vha Ndjoau, Mbatichita. ²⁶ Ohamba aiyumana unene, pae mokonda elimana kaya novhakongua, nkhu katchitavhele okuhaninga tcheinha akumbua. ²⁷ Pae ohamba aituma efualali limu kovhavhingi vhae atumine okueta omutue vha Ndjoau. Omuvhingi aende atete omutue vha umu nkhu emokaleya. ²⁸ É aeté omutue vhae melonga apa omukazhona é apa ina. ²⁹ Ovhalongua vhae tchivhe tchitea tcho, avheya avhakuata olutu luae avhakapaka peendó. ³⁰ Ovhalongua, avheliongezhe pu Yesu, avhemuhele atchihe tcheiha vhaninga natcheina vhalongefha. ³¹ É atia: Indjeni pe onue kotchikolo tchi eli ehandja ya youkueni okañphiki. pae ovhengi nkhu mavhaende nokuya ya ovho nkhu kavheno mayeukiluo hinde nokulia pé. ³² Pae, ovho avhande avhehe, kombaluku, kotchikolo tchi nkhu eli ehandja. ³³ Ovhengi vhevhemuna mavhaende, avhevhezhimbuka, avhalumbuke pamu pohi kovhilongo vhiatcho avhihe, ovho vhatenge okufhika. ³⁴ Tchovheya pokuenda, Yesu amunu otchimbiula tchimu otchinene evhetcha onkhenda, mokonda nkhu vhaka ngoyontchui hazhina mutuita. Ya É afhimbike okuvhelongefha ovhipuka ovhingi. ³⁵ Pae tchinkhu lhalela, ovhalongua Vhae avheya Kue avhatia: ohika indji ehandja etango lhetufheapo. ³⁶ Vhekela vhaende komapia kovhilongo vhali ovhio popei vhakalande imbi mavhali. ³⁷ Yesu, evhetavhele okutia: Vhepeni tchi mavhali. Ovho Avhatia: Tupondola okuenda nokulanda oyochei mbali ozhoyombolo tuvhepe vhalhe? ³⁸ É atia: Oyombolo ngapi eñphi onue munazho? Endeni havheni. Pae ovho tchovhe tchimuna, avhatiá: Oyombolo nthanu noyomphonde mbali. ³⁹ É atumu avhehe vhatonkhame ontchinda momututi ombo watenda. ⁴⁰ Ovho avhakankhama opantchinda; otchimbiula tchimu otchochei otcho chinguenta. ⁴¹ Yesu, okukuata oyombolo nthanu noyo mphonde mbali, okuta peulu akumbu otchali tcha Huku ateya oyombolo apa ovhalongua vhapake komutue vhotchimbiula. Ya avhehe avhandjelua oyomphonde mbali. ⁴² Avhehe avhali hinde avhakamba. ⁴³ Ovho avhayamba ovhinthimbu vhioyombolo zhateyua, moyongalo ekuinhi nambali iñphi zheyula, novhinthimbu vhioyomphonde. ⁴⁴ Nkhu ovhanthu oyomili nthanu omba vhalha oyombolo. ⁴⁵ Montchangayatcho É aningi ovhalongua Vhae vhahite mombaluku vhatenge komutue wae kotchikolo otchikuavho, otcho Kombetichaita, omonkhando yapua Yesu mayeka otchimbiula. ⁴⁶ Pae ovho tchi vhaenda, Yesu alondo kokapunda elikuambele. ⁴⁷ Otchuiki atchiya, ombaluku pá nkhu imokati kelunga, É nkhu upeke kotcholo tchelunga. ⁴⁸ É amunuko okutia ovho nkhu kavhetchizhili okutaha, mokonda omphepo nkhu maipuku kuya nakuvho. Pae okulua nokombimba makuende okutcha, É eya kuvho, okuendea komba omande elunga, wetchivhelamba. ⁴⁹ Ya tchivhemumuna maende kombanda omande elunga, vhetchitia otchilulu avhakuena. ⁵⁰ Pae tchi vhemumunu avhatila novhoma. Montchangayatcho É atia: likuatefheleni! Ami! Hamuteketa. ⁵¹ É ahiti mombaluku navho, omphepo ainhimi ahamaipuko vhali. Ovho avhambo vhahakuka unene ⁵² pae ahamavhaifhapo omoheti vhoyombolo; putcho, oyombungo zhavho nkhu zhakola. ⁵³ Tchi vhamana okutetekana, ovho avheya kotchilongo tcho kochenachale avhaktu ombaluku. ⁵⁴ Tchivhalua mombaluku, avhanthu mondjangayatcho avhazimbuka Yesu. ⁵⁵ Ovhanthu vhayendaende movhilongo avhihe avhafhimbike okumuetela ovhavhezhi ovhomomala, otchaku nkhu vhemutela. ⁵⁶ Otchaku nkhu ahitila moyombailu, movhilongo pamu nomomapia, ovho nkhu vhapaka ovhavhezhi nomoyo palacha, nokukumba Kué evheyeke okuvhiza pé kondungu yovhikutu Vhiae. avhehe omba nkhu mavhemuvhizha nkhu mavhaka navha.