¹ Nkhevhali, Yesu afhimbeke okulongefhela kotchikolo tchelunga. Otchimbiula tchimu otchinene atchimuongalele vhali, É ahiti mombaluku imu melunga, atonkhama. Otchimbiula atchihe nkhu tchikontheé yelunga. ² É nkhu uvhelongofha ovhipuka ovhingi nomihetí okutia: ³ Teleleni! Omukuni umu vhaluapo akakune. ⁴ Tchi nkhu makunu, ombuto imu aivhe mondjila, ovhizhila avhiya avhili. ⁵ Imu aivhe pohika inómavhe, pua nkhu hakuna eheke engi. mondjangayatcho avhifhimbike okukula, mokonda ohi ongi. ⁶ Etango tchi lhatumba, avhipi mokonda nkhu havhinamizhi avhikukuta. ⁷ Ombuto imu aivhe pokati kovhihango embi vhinomakete, avhikula avhicheluka. Ya pae ombuto ahamaiyumbo omphulu. ⁸ Ombuto imu aivhe pohika ombua aiyumbu oyomphulu nkhe avhikula okupoñukifhapo, zhimu azhiya pomakuinhi atatu, zhimu pomakuinhi epandu, ya zhimu opomakuinhi ekuinhi. ⁹ Yesu atia: Iñgua enomakutuí okutea ngaté! ¹⁰ Yesu nkhu tchi epeke, omba nkhu vheponthe Yae ovhekuinhi navhavhali, avhemupula omiheti. ¹¹ É evhehele okutia: Omue muapewa oluambo loumbala wa Huku, ya omeaã ovhokokuti avhihe avhahelua opamiheti, ¹² opó tchitia, okutchimuna, avhetchimunu ahama vhetchipungu, okutea, avhate, ahamavhaifhapo, pamu ovho nkhu nge vhakavhiluka Huku nge wevhevhela. ¹³ Yesu atia: onué omiheti ombo kamuwifhipo? Ongapi nani mamukaifhapo omikuavho avhihe? ¹⁴ Omukuni makunu ondaka ya Huku. ¹⁵ Ya inhã ponthe yondjila omeã vhatea, elhapu alia alivhaka mondjangayatcho koyombungo zhavho indji yakunua muvho. ¹⁶ Ya avhamu ombenha vhakunua mohi endji inomavhe,ovho pua vhatea, ondaka, vhatambula nohambu. ¹⁷ Ya ovho vhetupu omizhi poluavho muni, vhaombeako pé omatango. pua kueya ohali nonkhumbi mokanda yondaka, mondjangayatcho ovho vheliputala. ¹⁸ Ya imu inha yakunuá momakete. ovho ombenha vhatea ondaka, ¹⁹ tchi vhehulilua nouye, nomandjindji vhoulombe emuna liovhipuka ovhikuavho alihiti alitchelele ondaka ahamaiyumbu unhango. ²⁰ Ya imeã vhikunuá mohi ombua. ovho vhatea ondaka, avhetambula auyumbu ounhango, vhimu omakuinhi atatau, vhimu omakuinhi epandu vhimu omakuinhi ekuinhi. ²¹ Yesu atia: Onue okueta oluchu lumu mokati kondjuwó nge kamulupaka kohi yongalo ine okohi yohama? Onue mamueta amutulike pua palonda. ²² Opó hapaka tchitchaholama, ahamatchivha, ahamakuningi tchi tchaholekua ya ahamatchi okuholoka, ²³ Eñgua enokutui okokutelela, ngeté. ²⁴ Yesu atia: Teleleni nawa tchi mutea, mokonda pua onue mauheteke, naonue opó mamukahetekelua ya hinde mamukawezheluakó. ²⁵ Mokonda iñgua enatcho, unenevhali makapewa, ya ingo hena tcho, makaifhua hinde natcheinha nkhu enatcho. ²⁶ Yesu atia: Oumbala wa Huku otcho ngaumu akuna ombuto yae meheke. ²⁷ É alapo ya apinduka, monkhando yombuto kumina ya kukula, oyolho hetchi okutia ongapi. ²⁸ Ohi poluayo muni imina ounhango: poupe petchitenga okumunika otchihango, tchalapo akuya pua paminia ounhango, pé akukeya, oyomphulu ozhokuyulifha pua paminia ounhango. ²⁹ Ya pua ounhango wapia, mondjangayatcho, omuzhiu ukuata ochipata mokonda peya potchizho tcho kuteya. ³⁰ Nkhe atia: Otchitchi tchi nge matchihetekua noumbala wa Huku? Omuheti patchi nge maupopiwapo pae tuhele? ³¹ É otcho ngo mphulu pua, yakunua, ila onphiki koyomphulu zhatcho azhihe ozhopohi. ³² Pae, pua tchakunua, tchikula ya tchila otchinene kovhilimo vhiatcho avhihe ovhiomepia. Ya atchiningi oyonthai oyonene, hinde novhizhila vhiokeulu vhipondola okuningiamu ovhiyu momuluile wavho. ³³ Ya nomiheti omingi nkhu uvhehungika ondaka, ngapueinha nge mavheitele. ³⁴ Ya É nkhu kenatchi evhehela, heli omiheti. Pae, poluae muni, avhihe nkhu uhepuleapo ovhalongua Vhaé. ³⁵ Potchitenha tcheinha, tchi nkhu makutukovhele, É atia: Tuendeni kotchikolo tchimu vhali. ³⁶ Okuvheyeka ombunga, ovhalongua avhatchindi Yesu, pae nkhu vhemo mbaluku. Noyombaluku oyonkhuawo Yesu nkhu nazho. ³⁷ Ya pae akufhimbike omiliakulo vhinoyonkhono, nomphepo, nomatchimba nkhu mahiti noyonkhono mo mbaluku, hinde ailepopei nokuyula omande. ³⁸ Ya yesu nkhu vhalapo mokati kombaluku ahaele kotchi haelo. Ovhalongua avhemupindula, avhatia: Mulongefhi, Ovhe kuhililuevho tuponthe yokutchua? ³⁹ Yesu apinduka, akulamifha omphepo melunga atia: Nhimapo, hovhile. omphepo ainhimi aipololumu unene. ⁴⁰ Yesu atia: Palatchi muvhoma? Onue napahe nkhe kamuna ekolelo? ⁴¹ Ya nkhu vheyula unene ovhoma poluavho muni avhatia: Oivha Engu hinde omphepo nelunga vhitea Mué?