¹ Tchi tchaelhe komuhuka, ovhavhaleli ovhatuita avhelivhafha novhanene ya noyokilipa avhehe ovhapakeamu ovhanthu. Ovho avhakutu Yesu, avhemutchindi ya avhemutuala kupilatu. ² Pilatu emupula okutia: Ovhe uli Ohamba yo Kochundeu? É atavhele okutia: Owe mupopi. ³ Ovhavhaleli ovhatuita nkhu mavhanamikile Yesu ovhipuka ovhingi ovhivhi. ⁴ Pilatu nkhe avhazha vhali: Ovhe kunatchi mutavhele? Pukutala ngatchi vhanamikilua tungapi?. ⁵ Ya Yesu ahamayakula vhali Pilatu, ya tcho atchimuyeka apoyola. ⁶ Pomala ovhipito, nkhu otchituvho Pilatu okuyeka onkhuatua imu otcha ingu mavhapangula. ⁷ Okuvhekuateapamu noyonkhuatua ovhapombi mokaleya, novhovhineya oyonkhuatua mokonda yatchi vhanhemba kovhapombi, nkhu kuno omuzhiu imu nkhu atiwa Mbalamba. ⁸ Otchimbiula atchiya té ku Pilatu ya avhafhimbike okumukumba aninge tcheinha nkhu eli otchituvho. ⁹ Ya Pilatu evhetavhetale okutia: Muahanda ntchiyeke Ohamba Yokochundeya? ¹⁰ Mokonda é nkhu utchi ukutia tchevheningifha ngatcho emuna evhi nkhu avhavhaleli ovhatuita nkhu vhantchea Yesu. ¹¹ Pae ovhavhaleli ovhatuita vhatchalele otchimbiula okutia polukalo Luae Mbalamba ayekue. ¹² Pilatu atchunamu vhali okuvhetavhela: Otchitchi ami nge mbaninga mo Hamba Yokochundeya? ¹³ Ovho avhelikanaine vhali okutia: Ngalekue! ¹⁴ Pilatu atia: Otchitchi tchi É aninga otchivhi? Ya ovho otcho mavhelikanaine okuwamñakanako okutia ngalekue! ¹⁵ Pilatu, kokuhanda okuninga oholo yo tchimbiula, evhepa Mbalamba. É evhepa Yesu opo, tchitia nge amanua okuvhetua akalekue. ¹⁶ Omafhualali Avhemutuala mokati Kondjuvho, endje eli oyohongozhi ya avhaifhana ombunga yatcho aihe oyomafhualali. ¹⁷ Avhemuvhaleke ovhikutu vhiatukovhela, avhamanga onkhata yomakete ya avhapaka ku Yesu. ¹⁸ Afhimbike, pae, Okumupopifha okutia: Lhepei Ohamba Yokuchundeya!''. ¹⁹ Ovho avhemuvhete momutue notchimuti ya afhipe Kue ya, okungea koyongolo, Avhemuhumbu. ²⁰ Tchivhamana Okumutchinkhizhizha, Avhemuhulula oyikutu ovhizhiloi avhemuVhaleke ovhikutu vhiae muni, ya avhemutuala kokuti, pae akalekue. ²¹ Ovho avhatetamifha Chimau ingu nkhu alua kepia, atchinde ekuluchu lha Yesu. Enalhae nkhu Ochimau owoko Chilene( hé ya Alexandele na Lufu). ²² Omafhualali atuala Yesu kotchivhei tchimu makutiwa Ngongota, tcho tchapopia okutia okotchivhei tchetchipa olhekola lhomutue. ²³ Ya Evhemuandje ovhalende vhalungana nomila, É ahamanu. ²⁴ Pae avhemuleke ya avheliyandje ovhikutu Vhiae, okuyumba elaó vhamuneko okutia ovhikutu vhiningapi kanda fhualali nge lhakuata. ²⁵ Nkhu onovhe ola oyokomuhuka tchi Vhemuleka. ²⁶ Metapua limu, ovho avhahonikemu okunamikila okutia: Ohamba Yokochundeu. ²⁷ Alekua pamu novhimphulu vhivhali, umu anhembe kokulumioko kue umu anhembe kokumphili kuae. ²⁸ Ya atchivhilikifhua tcheinha ovhihonikua vhiatia:É vhahavhelua pamu noyondinga vhivhi. ²⁹ Ombenha nkhu mavhakutape ondjila otcho Mavhemulevhe, otcho mavhehakahaka omitue vhiawo ya otcho mavhatia: Ah! Ovhe nkhu nge mukatungulula ongelecha ya momala atatu oitungu, ³⁰ liyowola owelumu ya punda kekuluchu! ³¹ Ngotchikuavho, ovhavhaleli ovhatuita puluavho nkhu mavhemuningi oluvhi, noyokilipa, ya nkhu mavhatia: É vhayola ovhakuavho, pae É ketchizhili okuliovhola muni. ³² Clistu, Ohamba yokoichaeli, ngapunde lumu pahe kekuluchu ya opo ootue tumuneko tutavhele. Ya omba nkhu vhalekua pamu Nae nawo nkhu mavhemuningi oluwi. ³³ Tchiaela Momeliya, akuya etuiki endi lhatuka ohi yatcho aihe té kokichi ola. ³⁴ Kokichi ola, Yesu apopi okukolovhoka: Eloí, Eloí, lamá sabactani?, tcho tchipopia okutia, Huku yange, Huku yange, palatchi honkhuatefheko? ³⁵ Vhamu omba nkhu vhepohikayatcho avhate ya avhatia: É maifhana Ilia. ³⁶ Umu ayeluka, atili ovhinakele kotchinhambi tchimu, aowele kotchimuti emupe Anue. Omuzhiu atia: Matutalele okutia Elia meya Ekuifhepo. ³⁷ Pae Yesu apopi okukovhola ya Tchui. ³⁸ Ya echapa lhomongelecha alitanduka ovhinthimbu vhivhali okuifhilila kohi té keulu. ³⁹ Ya okumandante indji nkhu iponthe Yae, tchemumuna mafhuma ngatchenha atia: Otchatchili tchatcho omuzhiu nkhu Ondeya Huku. ⁴⁰ NKhu pena tupu ovhakai nkhu mavhemutale kokula. Puvho nkhu puna Maliya Mandalena, Maliya( ina ya Tiaku, omuñphikiko vhali, ya naku Chuxe) na Chalomé. ⁴¹ É tchi nkhu Ekongalileya, ovho nkhu vhemutezha ya nkhu Vhemutalavhayela. Navhamu vhali ovhakai ovhengi nawo avhalondo Nae vhaende Kocheluchale. ⁴² Pae tchi lhalela, mokonda nkhu eli otchitenha tchokutelela ondaka ya Huku, tcho, nkhu omotchachapalo, ⁴³ Chuxe owo kolimateya aende té ku Pilatu. É nkhu oumu ahumbua keliongezho, nkhu akevhela Oumbala vha Huku. É elikuatefhele aende té ku Pilatu ya akumbu olutu lua Yesu. ⁴⁴ Pilatu ahanunuka olhokutia Yesu nkhu vhatchua kaya; Pae aifhana okomandante ya emupule okutia Yesu vhatchua. ⁴⁵ Pae Pilatu tchi atea kukomandante okutia Yesu vhatchua, apakula olutu ku Chuxe. ⁴⁶ Chuxe nkhu vhalanda etongele linovhihafkela. É atulula Yesu kekuluchu, emuvhele metongele, ekemupaka peendo lhanigua mewe. Pae pomahitilo opeendo atuapo ewe. ⁴⁷ Ya Maliya Mandalena na Maliya, ina ya Chuxe, avhamunupo pueinha nkhu pakapakua Yesu.