¹ Momala avhali nkhu tchetchila Opachikua no Tchipito tcho Yombolo hazhina Ofulumentu. Ya ovhavhaleli ovhatuita novha kilipa nkhu vhaendanda mavhavhola tchi mavhaningi vhemukuate okulipengemñika vhemuleke. ² Pae nkhu vhatia: Aye otue nge hatuningi tcho mokati Kopachikua, opó hatuhanununa ovhanthu. ³ Yesu Wamba Kombetania kondjuvho Chimau, otchilema, monkhando yapua mavhayoukue komecha, okuya omukai umu enotchima otchiwa otchewe epembai munkhumuna opulufumu yavhalela unene, analuto omuniyatcho. É aula otchima anengulie momutue wa Yesu, ⁴ ya vhamu ahamavhetchihanda. Ovho poluavho nkhu mavhatia: Palatchi okuyona opulufumu? ⁵ Opulufumu endji nge yalandefhua okupomñukifha koyochei nthatu ozhoyombongo zhovhivhela ozho palata zhiyantchue ovhahepi. Ya nkhu avhemukanaine. ⁶ Ya Yesu atia: Muyekemñi kombembua. Palatchi muehulilua? É vhaninga otchipuka otchiwa Kuami. ⁷ Pokati kemñi hinde mapakaka kaya ovhahepi ya ngamutchihanda mupondola okutchininga otchiwa kuvho, mokonda kamukaka na Ami. ⁸ É vhaninga tcheinha azhila, wahama olutu Luange. hatcheyeyapo pokukafhifhilua. ⁹ Tchatchili tchatcho mimuhele, otchaku ondaka maikapopilua ouye vhatcho auhe, tchi tchaningua nomukai ingu matchikapopiwa, ya makamunongonukua. ¹⁰ Pae Chuta Kalhote, umu ovhe kuinhi navha vhali, aende té kovhatuita vhavhaleli evhepe Yesu. ¹¹ Ovhatuita tchi vhatea tcho, avhalemua ya avhatia matukupa oyombongo. Ya é afhimbike okuyevha omahitilo okuandja Yesu. ¹² Mo tchitenha tcho kufhimbika otchipito tcho yombolo hazhina ofulumento, ovho monkhando yapua nkhu mavhaleke ondjui Yopachikua, ovhalongua avhatia: opiku ku vhahanda tukaónge oyodia Zhopachukua? ¹³ É atumakamña ovhongua vhae vhavhali ya atia: Endemñi kombonge ya mamukahanguako nomuzhiu umu atchinda otchima tchomande. Mutezheni. ¹⁴ Ya otchapua makahita, mutezheni ya heleni muni vho ndjuvho okutia: O Molongefhi vhatia: Opipua peno ondjuwo indji yahandjuka pua mikalila oyondia Zhopachikua novhalongua Vhange? ¹⁵ Ya é meke muvhilikifha ondjuwo onene indji inovhima puapalonda indji yapua. ngeli opo mukangezhela oyondiazhetu. ¹⁶ Ovhalongua avhalupo avhande té kombonge; avhavhafhako avhihe ngatchi É nkhu evhehela avhaóngo oyondia Zhopachikua. ¹⁷ Pae tchi kuatukuvhela, É eya novhe kuinhi navha vhali. ¹⁸ Monkhando yapua nkhu mavhayoukua komecha otcho, mavhali Yesu atia: Tchatchili tchatcho Ami mimuhele, ponue, puna ingu mali Naami, mandjumba kovhanthu. ¹⁹ Avhehe avhayumana poluavho muni avhatia: Okutia ami? ²⁰ Yesu okutavhela, atia: Oumu owekuinhe navhavhali, Iñgua mali Naami pahe melonga. ²¹ Mokonda Onde yomuzhiu maende ngatchi ovhihonikua vhipopea Kue; pae onkhanu ombi ikuñgua mekemuyumba kovhanthu! Nkhu otchiwa kue nkhu kuhayomukua. ²² Monkhondo yapua nkhumavhali, Yesu akuata ombolo, ayeka onkhanu ombua, eiteya ya evhepa. Pae atia: tchi olutu Luange. ²³ É akuata okalichi apandula, evhepa avhehe avhanu. ²⁴ Pae atia: Tchi omulai Wange vhetukuatea pamu, omulai umbu vhavhuyukea potchivhei tchovhengi. ²⁵ Otchatchili mimuhele, Ami hikanua vhali ounhango vhokomuti vhouvha té potchitenha tchi Ami minu okalichi omphe Koumbala wa Huku. ²⁶ Pae tchivhana okuyimba ondjongo, avhande Komphunda Yomilivhela. ²⁷ Yesu atia: Onue amuhe mamu kandovhola, mokonda tchahonikua: Mikaleka Ovhatuita ya oyondjui azhihe mazhikeliwayala. ²⁸ Ya Ami nge mbalua pokututila kuange, Ami mitenga komutue weni kongalileya. ²⁹ Petulu atia: Avhehe ngavhekulowola pé, ami nge hikekulowola. ³⁰ Yesu atia: Tchatchili tchatcho Ami mitia, otchituiki tcho, ekuandombolo kalikapopia tuvhali, owe hoyamphana tutatu okutia ondji. ³¹ Ya Petulu atia: Ngaele pua ami mitchui Naowe, hikekupatana. Ovho avhehe avhapopi ondaka imu. ³² Ovho avhande kohika imu maitiwa Chetchemani, ya Yesu kovhalongua vhae atia: Tankhameni puenu omonkhando Ami milikuambele. ³³ É akuata Petulu, Tiaku na Ndjoau, ya afhimbike kuka noluyuma ya nokuhulilua. ³⁴ Yesu atia: Omunhu vhange vhayumana unene, okufhika kokutchua. Kaemñi puenu ya takamifheni. ³⁵ Yesu aende vhali kañphuku kokula, awu pohi, ya elikuambele, okuningia okutia nkhu matchitavhele, okuhakuata mohali indjo. ³⁶ É atia: Tate, Tate, ovhipuka vhiatcho Kuovhe nge mavhiningua, ifhamu okalichi indjo Muami. Hatchile otchokoholo Yange, ngatchile otchoholo Yoe. ³⁷ É atchuna, evhevhafha vhalapoo, ya mu Petulu atia: Chimau, ovhe walapo? Nge kutakamifha pé owola imu? ³⁸ Takamifheni ya likuambeleni opo hamuhiti mokulolua. Omphepo ya ongala okufuapo, pae olutu luapoyola. ³⁹ Nkhevhali, É nkhe atchuna vhali kefhina ya elikuambele, nkhe apitiya vhali pomalaka onga apopiekaya. ⁴⁰ Pae Yesu nkhe afuene vhali kovhalongua vhae ya evhevhafha vhalapo; omihó avho nkhu akola unene ya ovho nkhu kavhetchi tchi mavhemuhele. ⁴¹ É nkhe eya vhali mekanda lhatatu ya atia: Napahe mualapo mamuyoukua? Opó owola yeyapo. Tá Onde Yomuzhiu mandjelua komawoko oyondinga vhivhi. ⁴² Kulameni, tuendeni! Tá iñgua Makandjumba kovhanthu upepei. ⁴³ Mondjangayatcho, monkhondo yapua É nkhu mapopi, Chunda, umu ovhekuinhi navhavhali, eya, notchimbiula tchimu otchinene nkhu tchinae; tchatchinda oyochipata noyombulo, kotchivhe tcho vhatuita vhavhalela, oyokilipa ya novhanene. ⁴⁴ Omukelengi evhemñanga, okutia: Oiñgua ami mipa ombechinhu. Mukuateni ya mutchindemñi koyonkhono. ⁴⁵ Chuta tche eya, mondjangayatcho eya té ku Yesu ya atia: Molongofhi! ya é emupa ombechinhu. ⁴⁶ Pae ovho Avhemukuata. ya avhekutu. ⁴⁷ Ya pae pomba nkhu vhavhafhuapo, apalu umu anana ochipata, atete omupika umu ovha mutuita ingu alondako vhali ya atete okumuifha okutui kuae. ⁴⁸ Yesu atia: onue mueya kounu munkhute ngaingu ndjili otchimphulu, noyochipata noyombulo? ⁴⁹ Tchi Ami nkhu ndjinaonue nkhu ndjilongefha omatango atcho ahe mongelecha, nkhu Kamunkhuata. Pae tcho tchaninguea okutia ovhihonokua vhivhilikifhue. ⁵⁰ Ya avhehe omba nkhu vhena Yesu avhevhemuyekapo ya avhahomboka. ⁵² Umuzhanthu umu nkhu Memutezha, é nkhu awavhala pe etongele endi linovhihafhela lhatchama nae; ovho avhemuifha, ya ⁵¹ omuzhanthu ayeka etongele ya ahomboka kuvho eli omuhoyo. ⁵³ Avhatuala Yesu komutuita ingu alondako. Vheliongezheapo avhehe ovhavhaleli ovhatuita, ovhanene noyokilipa. ⁵⁴ Povhola yatcho pó, Petulu avhihe nkhu mevhitale kokula, té motchitali tchomutuita alondako. É akakankhama pokati kovhavhingi, nkhu vheponthe yomulilo,opo vhateminue. ⁵⁵ Ovhavhaleli ovhatuita ya avhehe ovhapakeamu ovhanthu nkhu vhawola oumbangi ovhokungula Yesu, okunigea okutia vhemuluke. Ya ovho ahama vheuvhafha, ⁵⁶ pae ovhengi vhaeta lhoumbangi yetutu vhaungule Yesu, nangatcho oumbangi umbo nkhu ulipita. ⁵⁷ Avhamu avhakulama ya avhaeta oumbangi wetutu vhemungule; ovho avhatia: ⁵⁸ Otue Tuemutea matia: Ami katungulula kongelecha endji yatungua nomavhoko ovhanthu ya momala atatu ami mikatunga onkhuavho, haitungue nomavhoko ovhanthu. ⁵⁹ Nangatcho oumbangi vhavho nkhu welipita. ⁶⁰ Pae, omutuita ingu alondako vhali akulama pokatikavho ya apula Yesu: Owe kunatchi muyakulapo? tchi ovhazhiu omba mavhekunamikile? ⁶¹ Ya É anhimi lumu lolo ya nkhu kayakula. Nkhe vhali omutuita ingu alondako apula: Ovhe Clistu, Onde ya Huku Omupopiwa nawa? ⁶² Yesu atia: Ami yatcho. Ya mamukamuna Onde yo Muzhiu akankhama kokulimioko kuovhoyonkhono meya nomakaka okeulu. ⁶³ Poyatcho, omutuita ingu alondako atandula ovhikutu vhiae ya atia: Napahe matuhanda oumbangi? ⁶⁴ Onue mutea omatuka onga apopia. Otchitchi mamututu? Ya avhehe avhangula Yesu ngaingu atokala kokutchua. ⁶⁵ Vhamu avhafhimbike okufhipilia Kue nomukukila motchipala, okuvheta Mue ya otcho mavhatia: Fhimba! Ovhavhingi Avhemutuala ya avhavhete Mue. ⁶⁶ Petulu tcha aombea kotchivhei tchokohi, motchitali, omupika umu ovhomutuita ingu alondako eya té kue. ⁶⁷ É tchamuna Petulu ponthe yomulilo, ayote, emuta nawa ya atia: Naovhe nkhu unomunachalenu, Yesu. ⁶⁸ Ya é apatana, okutia: Ami hitchi ya hifhapo tchi mupopi. Pae é aende motchitali. ⁶⁹ Pae koinha, omutalavhai emumunu ya afhimbike okupopia vhali kuoma nkhu opovhakala: Umuzhiu ingu omukuavho naombenha! ⁷⁰ Ya é nkhe apatana vhali tcho. ombenha nkhu vhahangua pohika yatcho mu Petulu nkhu mavhatia: Otchatchili naawe uwoyawo, mokonda owe umungalileu. ⁷¹ Ya é afhimbike okumupa onkhanu ombi ya nokumanamu otchatchili atia: Ami hi omuzhiu ingu mupopi. ⁷² Pae, montchangayatcho, ekuandombolo alipopi okuvhanapo vhali. Petulu pae anongonuka omalaka onga Yesu emuhele: Ekuandombolo kalikapopia tuvhali, tutatu ovhe huyamphatana okutia undji. É elitetele koluyuma ya afhikike okulila.