¹ Monkhando yapua Yesu nkhu malu mongelecha, kovhalongua vhae akulu umu atia: Molongefhi, tala omawe omawa noyondjuvho! ² Yesu atavhele okutia: Mumunu oyondjuvho eñphi oyonene? Kakukayekua ewe kombanda ekuavho hamalikatungululua. ³ Ya, É tcha atonkhama Komphunda koyolivhela indji iká ketambo yongelecha, Petulu, na Tiaku, na Ndjoau na Andele Avhemupula poluavho: ⁴ Tuhela, otchaomñi ovhiipuka embio mavhikamunika? Otchitchi tchi matchikaila otchilikifha tchatchi ovhipuka embio avhihe fuene kokumunika? ⁵ Yesu afhimbike okutia: Hiliyeni opó hakakuninga ingu memukelenge. ⁶ Ovhengi mavhekeya mena lhange mavhakatia: Ami Clistu, ya ovhenhgi mavhakakelengua. ⁷ Ya ngo muatea ovhita naomba mavhapopi unene otcho ovhita, hamuhulilua; ovhipuka imbio vhino olho kumunika, ya katchipopie okutia opovhiapuapó. ⁸ Mokonda ovhilongo novhilongo mavhikelitchitukila, ouhamba nouhamba maukelitchitukila. Ohi maikateketa kovhikolo ovhingi, ya makuka nondjala. Tcho okufhimbika koyongembia zho kuyomuka. ⁹ Kaemñi muangonuka. Ovho mavhekemupaka moyomphela, nomoyo chinangonga mamukavhetua. Mamukaka kovhipala yovhatumini noyohamba mokonda yaAmi, ngoumbangi wavho. ¹⁰ Tchachukifha okutia poupe ondaka aipopiwa kovhilongo vhiatcho avhihe. ¹¹ Nge vhemukuata avhetuala kokukoyefhua, hamulilua natchi nge mamuningi. Mokonda povhola indjo, embi nge mamupopi mamu kevhipewa; ovhapopi kavhakaila kaya onue, makaila Omphepo endji yafhuapo. ¹² Elumbi lho munthu makandja omuango vhuae alekue, ya hé yo munthu makantcha ondeya alekue. Oyondele mavhekelitchikila novhohe ya mavhekelileka. ¹³ Onue kamukahandua novhengi mokonda lhena lhange. Pae iñgua makakako té pua mavhikapuila engó makayowolua. ¹⁴ Pua muamuna ovhipuka ovhiokutalaleka imbi vhitungulula ovhipuka vhia Huku vhipolukalo havhitokale kukapo(omutangi ifhapo nawo), ompenha mukochundeya hombokieni koyomphunda, ¹⁵ iñgua epomututu vhondjuvho hapuntu, natchi tchimuyo nge hakuata, ¹⁶ Iñgua emepia nge hatchuna kondjuvho akatambule okapa yae. ¹⁷ Pae tchahulilika unene kuombenha vheli ovhinangamia naombenha vheli ovhamuali muvhitenha vhiatcho embio! ¹⁸ Likuambeleni opó hatchiya poutente. ¹⁹ Mokonda makukaka ohali onene, kuila onene okupomñuka koyohali iñphi zhatenga okumunika, tchi Huku atunga ouye té pahe, ya katchikakako vhali. ²⁰ Tate Kulu nkhu ngahatetulula kovhitenha, kutupu ingu nge ayowolua. Pae mokonda yovhahopua, ombenha É ahopa, kovhitenha watetululakó. ²¹ Pae, umu ngatia: Clistu upuenu! pamu atia É ukoinha!, hamutavhele. ²² Mokonda oyo Clistu ovhakembi ya novhatuminua ovhakembi mavhakamunika ya mavhakaninga otchilikifha tchokuhakukifha, okuningea okukelenga, hinde novhapangulua. ²³ Kaeni muatakamifha! tatupu mbemuhela avhihe ovhipuka embio avhihe havhiyamunika. ²⁴ Nangatcho, ohali indjo ngeyapua oyovhitenha embio, etango malikatuvhela, omuezhi kaukamñimñikila, ²⁵ oyonhufhi keulu mazhikatota, ya oyonkhono eñphi zhi keulu mazhikapukumunua. ²⁶ Pae, mamukamuna Onde yomuzhiu mezhé momakaka noyonkhono oyonene noumbala. ²⁷ É makatuma oyo andju Zhae makaongezha ovhahopua Vhae vhomouye vhatcho uhe pua utue, ovhapua kuatchunea ohi té pua kuatchinea eulu. ²⁸ Longokemñi ehepu lhomuhipua. Pua oyonthai zhaema ya azhivhilikefha omafho azho, tchivheni okutia ekamba lipepei. ²⁹ Ya tchimu vhali pua maumuna ovhipuka embio mavhiningua, tchivheni okutia É upepei, nokufhika pepito. ³⁰ Otchatchili tchatcho Ami mimuhele, omuhoko kaukapua otchó havhiningua ovhipuka embio avhihe. ³¹ Eulu nohi mavhikapua, ya Ondaka yange kaikapua. ³² Pae otchitenha tcho, kutupu ingu etchi, hinde noyo andju zho keulu, nondele Ohé pé etchi. ³³ Kaemñi muanongonuka! takamifheni ya likuambeleni, mokonda kamutchi pua matchikeya. ³⁴ Otcho ngo muzihu umu akapila: é uyeka ondjuvho yae ya ayekapo ovhapika vhae vhavhinge ondjuvho, kanda munthu novhininga vhiae. Ya é ahele okutia pukuluka ohapo. ³⁵ Mokonda ya tcho takamifheni! Mokanda kamutchi pua muni vho nduvho mekeya, okutia okongulo, okutia omokati kovhituiki, ekuandombolo nge liapopia, ine kutia omomuhuka. ³⁶ É ngeya okumuhanununa, opo É ehememuhanga mualapo. ³⁷ Imbi ndjihela onue, oyo ndjihela avhehe: Takamifheni!