¹ Ya pae Yesu afhimbike okuvhelongefha momiheti, okutia: Omuzhiu umu vhakuna omuti vhouvha, euvhumbé onkhungu, afhula etoto mombua atchope oyouvha, atungu otchipuka otchila otcho kuvhandjelela. Pae alukalefha omuti vhouvha kovhalimi vhamu ya alupo akapila. ² Potchizho tchiwa otchokuteya, é atumu omutuita umu té kavhalimi atumbule kuvho ounhango vhokomuti vhouvha. ³ Ovho avhemukuata, avhemuvhete ya avhetchuñma henatchi atchinda. ⁴ Nkhe vhali, é atumu omutuita omukuavho, avhavhete momutue ya avhemutchinkhizhizhza. ⁵ É nkhe atumu vhali umukuavho, Ya ingo avhemuleke. Ovho nkhe avhemuningi ngatchi nkhu tchaningua ovhatuita ovhakuvho ukuvhemuta vhamu ya nokuvheleka. ⁶ Ya nkhu kuemukambefha umu, ondeyae engo ahanda unene, omufhinini engu vhatumakanifhua. É atia: Ovho mavhekemuhumba ondeyange. ⁷ Ya ovhalimi poluavho avhatia: Ingo é eli omphinga, matumuleke ya iñphi etchipingana mavhikaila ovhietu. ⁸ Ovho avhemukuata, avhemuleke avhemuyumbu kokula nomuti vhouvha. ⁹ Pae, muni vhomuti vhouvha otchitchi tchi makaninga? É makeya, akutungululula ovhalimi ya omuti vhouvha ekeupa vhali ovhanthu vhamu. ¹⁰ Kutia ovhihonikua embio kuvhitangele? Evhe indi ovhatungi havhatavhelele olho lhakaila omphañphi. ¹¹ Tcho tchilua ku Tate Kulu, ya komihoetu tchihakukifha. ¹² Ovho avhavhola tchi mavhaningi vhakuate Yesu, ya nkhu vhahumba otchimbiula, mokonda nkhu vhetchi okutia É nkhu wevhepopililiepokaya omuheti ombó. pae Avhemuyeka ya avhakapita. ¹³ Ya ovho Avhemutumakamña vhamu ovhafalicheu ya noyolondianu okunigea okutia vhemukuate koyandaka zhimu. ¹⁴ Tchi vhefhika, avhatia: Mulongefhi, tutchi okutia ovhatchatchili ya kuchukua naimiã umu nge mapopi, mokonda kukoyefha humuine movhazhiu. Otchatchili tchatcho olongefha ontchila ya Huku. Tchavhiuka okufheta elichimu ku Chechali ine tchalemana? Tuno olhokufheta ine hatufheta? ¹⁵ Ya Yesu nkhuí okatombo kavho ya atia: Paralatchi mulola Muani? Ntcheteangini ombongo yotchivhela Ami nditale. ¹⁶ Ovho avhemuetele imu. Pae,Yesu apula: Ena notchipala tchi otchivha? ¹⁷ Ovho avhemutavhele: Otcha Chechali. Yesu atia: Pemñi Chechali tcheinha eli otcha Chechali ya otcha Huku pemñi Huku. Ya avhaka vhahakuka Nae. ¹⁸ Pae oyochanducheu, omba vhatia okututila kakukako, avheya té Kué ya avhemupula, okutia: ¹⁹ Mulongefhi, Moichechi vhetuyekeá ovhihonikua vhimu vhiata: Omuangu vho muzhiu umu ngakungula ya ayekapo omukai hena ndele, elumbi upondola okulikupa nomukai ingó ayekuapo ya aninge oyendele aetemu omuangu vhae. ²⁰ Nku kunavhamu vhelitezha nkhu vhenopandu avhali; otchivheli nkhu uno mukai ya tchalapo akukungula, hamayekapo oyendele. ²¹ Pae, ingu atezha kotchivheli akupu omukai engo akungula, ahamakayekapo oyondele. Ya ovhatatu otchongo tchikuavho. ²² Ya avhehe amapandu avhali ahamayekapo oyondele. Pae avhehe tchavhapuako, Omukai nae atchui. ²³ Mokututila, ngevheya pokututila, omukai maile owaiwa? Ovho avhehe epandu vhali pokulitezha nkhu vhakupa omukai ingu. ²⁴ Yesu atavhele: Aye pó muelitangalekea, mokonda ovhihonikua noyonkhono zha Huku kamuvhi? ²⁵ Mokonda nge vhatutila pómba vhatchua, nge kavhelikupu nge kavhelipa olukupo, vhaka ngo yoandju zhe keulu. ²⁶ Pae, kuoma vhatchua mavhatutilifhua, kamutangele mepikula lha Moichechi, tchi apopiea, ngatchi Huku apopia nae, ya atia: Ami ndji Huku ya Ambalayão, Huku ya Ichaki ya noya Chakó? ²⁷ É ha Huku yaomba vhatchua, ovha omba mavhatala. Otchinene otchivhi tchene. ²⁸ Umu ovhoyokillipa eya ate ehepu, é amunu okutiaYesu wevhetavhela nawa. Ya emupula: Ovhizhilika patchi tchavhalela vhali kovhikuavho ahvihe? ²⁹ Yesu atavhele Tchi Tchavhalela vhali otchi: Telela, Chilaeli, Tate Kulu Huku yetu éelikope Tate Kulu. ³⁰ Kahande, pé, Tate Kulu Huku yoe, nombungo yoe aihe, nomunhu vhoe auhe, nokututa kue akuhe, nonkhono zhoe azhihe. ³¹ Otchizhilika tcha vhali otchi: Handa omuango vhaoe ngatchi ulihole. Kutupu vhali otchizhilika otchinene tchapomñuka kuimbi. ³² Pae okilipa aitia: Otchiwa unene, Molongefhi! Tchatchili tchatcho wapopia okutia Huku iyumu pé, ya kutupu vhali umu komutue Vhae. ³³ Okumuhole nombungo yatcho aihe, noyondunge zhatcho azhihe noyonkhono zhatcho azhihe, nokuhanda omba tuelipalakana navho ngatchi tulihole, otcho tchavhalela vhali kovhilikutilo vhiatcho avhihe nokovhilikutilo vhioyochundeu. ³⁴ Pae Yesu tchamuna okutia é wevhetavhela nondaka yavhiuka, atia: Ovhe kukokula noumbala wa Huku. Tchala pó, ahamakunigi vhali ingu mapula Yesu. ³⁵ Ya, monkhando yatchi nkhu malongefha mongelecha, Yesu evhetavhele, atia: Ongapi ovhakilipa vhapopia okutia Clistu ondeya Ndiavhiti? ³⁶ Ndiavhiti lumu tcho wetchipopia Komphepo endji Yafuapo: Tate Kulu wahela mu Tate Kulu yange: kankhama kokulumioko kuange, té Ami mipikulula ovhita vhioe vhake ngotchihikamo tchokupaka oyomphazhi zhoe. ³⁷ É muni Ndiavhiti mu Clistu uifhana okutia Tate Kulu, pó ongapi nge maile ondeyae? Otchimbiula otchinene nkhu tchumutelela nehambu. ³⁸ Kokulongefha kuae, Yesu nkhu utia: Takamifheni koyokilipa, vhahanda okuenda novhikutu ovhilala, vhahumbua pokupopifhua moyomelekatu., ³⁹ omalukalo avhalela okochinangonga ya nomalukalo omavha okulia ku kuavhalela. ⁴⁰ Ovho navho vhafuna oyondjuvho zhaomba vhayekuapo novhazhiu, pae ngokukelenga, pokulikuambela vhatuá onkhando. Ombo ohali endjo mavhakamuna maikaila onene. ⁴¹ Pae Yesu akankhama ponthe yotchikacha tchovhiambo mokati kongelecha. É nkhu matala ovhanthu tchi mavhayumbu oyombongo zhavho motchikacha. Ovhanthu ovhengi omalombe nkhu mayumbu oyombongo oyongi. ⁴² Pae, omukai ingu omuhepi ayekuapo nomuzhiu eya ya motchikacha atuamu oumbongo uvhali ovhovhivhela, ombo hauvhalele unene. ⁴³ Yesu aifhana ovhalongua vhae atia: Otchatchili mimuhele: Omukai ingu omuhepi ayekuapo nomuziu wayamba vhali kovhanthu vhatcho avhehe omba vhayamba motchikacha. ⁴⁴ Ovho avhehe vhamba tchenha tchatepuka kuimiã vhiafhivhapo, omukai ingu ayekuapo nomuzhiu, putcheinha nkhuenatcho, wayeka oumbongo watcho nkhu enawo.