¹ Yesu alupo po nkhu akala aende kotchilongo tchoko Chundeya, nthele inha omphupa yaChorta; otchimbuila atchiya vhali Kue. É nkhu uvhelongefha, mokonda nkhu otchituvho. ² OvhaFalicheu avhafuene vhemulole avhemupula okutia: Otchiwa komuzhiu kuliyala nomukai vhae? ³ É atevhele okutia: Otchitchi muatuminua na Moichechi? ⁴ Avhatia: Moichechi vhatavhela omuzhiu kuhonika omukanda vhokuliyala, ya pae okuliyala omukai. ⁵ Yesu, pae atia; Tcho tchaninguá mokonda zhoyombungo zheni zhakola Moichehci ahonike otchitumino tcho. ⁶ Pae nkhe pokufhimbika kuóvhipuka Huku waninga onthuei imu noina imu. ⁷ Mokonda yatcho omuzhiu makayeka hé naina akaka nomukai vhae ⁸ vhavhali mavhakaila onhama imu pé. pae hamavhaile vhali, vhavhali avhale onhama imu pé. ⁹ Mokonda tchi tchatokekua na Huku, omuzhiu nge ketchiyapolula. ¹⁰ Pae ovho nkhu tchi vhekondjuvho, ovhalongua nkhe avhemupula vhali tcho. ¹¹ É atia: Iñgua meliyala nomukai vhae nkhe ekelikupa naumu vhali, uninga tcheinha kovhizhilika nge hamatchingua na ingu eli omukapalumi. ¹² Ya omukai ngayala komuzhiu vhae nkhe okupua nomuzhiu umu vhali, é uninga tcheinha kovhizhilika nge hamatchingua nomukai ingu akupua. ¹³ Nkhu vhemuetela oyonde vhavho vhemuvhizhe, ovhalongua vhae otcho vhevheyalela. ¹⁴ Yesu tche etchuna tcho, ehemetchi handa, atia: Yekeni oyondele vheya na kuami hamuvheyalele, mokonda oumbala wa Huku vhatokala komñeã vhaka ngavho. ¹⁵ Otchatchili tchatcho mimuhele: Iñgua hamatambula oumbala wa Huku ngo ndele, ngelipepaefha vhopé nge kakahitakaya muvho. ¹⁶ Pae, É okuata oyodele momavhoko Aé evhepa elaó evhekondokana ukupaka omavhoko kuwó. ¹⁷ Pae pokutuatuako nondjila Yae, omuzhiu umu eya malumbuka, aonge koyongolo kotchipala Tchae emupula: Mulongefhi omuvha, otchitchi tchi nge miningi ndjipingane omunhu ombo haupo? ¹⁸ Ya Yesu emutavhele okutia: Palatchi ondjifana okutia omuvha? Kutupo engu eliomuvha, ó Huku pé. ¹⁹ Ovhe ovhitumino uvhi: Nge holeke, komukai vhoe nge hovhezhako vhali, nge hovhaka, nge hunamikile, nge hokelenga, humba hó na nhukó. ²⁰ Omuzhiu atia: Molongefhi, ovhipuka embio avhihe ndjivhininga nkhe mbali póuzhanthu. ²¹ Yesu emutala emuhanda, atia: kuekukambefha otchipuka tchumu; enda, landefha avhihe embio unayio antchea ovhahepi, oulombe vhoe mukeuningea keulu. pó indjo ya nthezhange. ²² Pae omuzhiu omalaka ongo tchi hamuende nawa, alupo ayumana mokonda nkhu novhipuka ovhingi ovhivha. ²³ Yesu atale kovhilo kovhalongua vhae atia: Tchakola unene elombe kuhita moumbala wa Huku!. ²⁴ Ovhalongua avhaka vhahakuka nomalaka Aé. Nkhe, Yesu atia vhali: Yondele, tchakola unene okuhita moumbala wa Huku! ²⁵ Ya tchapuvha vhali otchikamelu okupitiá pemphana lhonguya, tchapona elombe kuhita moumbala vha Huku. ²⁶ Ovho avhaka nomphapa ya poluavho nkhu mavhatia: Nani, oiwa nge mayowolua? ²⁷ Yesu atala muvho ya atia: Kovhazhiu tchakola, ku Huku aye. Mokonda ovhipuka vhiatcho avhihe ku Huku nge mavhiningua. ²⁸ Petulu afhimbike okutia: Tala, otue avhihe tuevhiyeka kefhina tutezhe Ovhe. ²⁹ Yesu atavhele okutia: otchatchili tchatcho mimuhele, kutupu ingu mayeka ondjuvho, novhangu vhae, novhahaina, naina, nahé, noyondele noyohika mokonda ya Ami, noyondaka ³⁰ nge hamatambula ochei okupomñukifhapo, pahe mouye ombonu, ovhango, ovhahaina, ovhoina, oyondele, noyohika nokumunifhua onkhumbi; nomouye ku makukeya omunhu ombu haupu. ³¹ Pae ovhengi vhatengapo mavhakafhininua, ya omba vhekefhina mavhakatengapo. ³² Ovho nkhu vhemondjila, okulonda kocheluchale, Yesu nkhu maende komutue vhavho. Omba nkhu Mavhemutezha nkhu vhahanunuka ya nkhu vhenovhoma. Yesu aifhana ovhekuinhi navhavhali nkhe vhali potchikolo, afhimbike okuvhehela tchi pomala omafhupi matchikeya okukakó: ³³ Otueombo matupana Kocheluchale Onde yomuzhiu makayumbua kovhatumini vhovhatuita nokoyoKilipa. Ovho mavhekemungula avhekemuleka ya Mavhekemuandjela kovhipunde. ³⁴ É makaningua oluvhi, mavhakafhipilia Kue, mavhekemuvheta ya mavhekemuleka. Momala atatu É makatutila. ³⁵ Tiaku na Ndjoau oyonde vha Chembendeu, vheya té Kue avhatia: Molongefhi, tuahanda utavhele otchipukatchi matukukumbu. ³⁶ É atia:Otchitchi muahanda ndjimuninge? ³⁷ Ovho avhatavhele okutia: Tuyeka tutankhame na Tate Kulu koumbala Vhae, umu kokulumioko Kuoe ya umu kokumphili Kuoe. ³⁸ Yesu evhetavhele okutia: Kamutchi tchi mamukumbu. Onue mupondola okunua okalichi indji naámi mbanua, ó pamu okukuatefha kokuyavhekua ku mikayavhekua? ³⁹ Ovho avhamutavhele okutia: Otue tupondola. Yesu atia: Okalichi endji Ami mi kanua, naonue mamukanua. Ya okuyavhekua ku Ami mi mikavhekua naonue otcho mamukayavhekua. ⁴⁰ Ya tcho hatchoholo yange okupopia okutia oiwa makankhama kokulioko Kuange ó pamu, kokumphili Kuange, tcho hatchange tchinawo omba tchaholekelua. ⁴¹ Pae ovhakuawo ekuinhi ovhalongua tchi vhatia tcho, ahamavhaka nawa na Ndjoau na Tiaku. ⁴² Yesu evheifhane Kue atia: onue mutchi okutia omeã vhapakuea kokuila vhatumini yovhipunde vhevhekengelela, ya ovhanene ombenha vhalondako vhali vhevhetumina. ⁴³ Ya hatchi ngatcho pokatikeñmi. Iñgua ahanda okuila omunene polueni, unolho kuila omutuita, ⁴⁴ ya iñgua ahanda okuila omutengapo polueni, unolho okuila omupika vheni amuhe. ⁴⁵ Mokonda Onde Yomuzhiu kezhilele okutapelua, tchi tchemueta kohonu okuya ukatapa nokupa omunhu Vhae ayowole ovhengi. ⁴⁶ Ya avheya Kochelikó. Okulua Kochelikó Yesu novhalongua vhae, notchimbiula otchimu otchinene, omuzhiu umu mativha Mbatimeu, onde ya Timeu, omufhona umu mupotchui, nkhu akankhama kotchikolo tchombulandi. ⁴⁷ Tchi atea okutia nkhu o Yesu, ONamunachelenu, nkhu mefhiki, afhimbike okuifhana okutia: Yesu, Ndeya Ndjiavhiti, ninga onkhenda naami! ⁴⁸ Ovhengi otcho mavhemukanaine okuita nhimapo. Ya é otcho makolovhokako vhali unene: Ndeya Ndjavhiti, ninga onkhenda naami! ⁴⁹ Yesu okulama ya evhetumu vhemuifhane. Pae avhaifhana omupotchui, okutia: Koleta! Kuluma! É mekuifhana. ⁵⁰ É ayekelechi okapa yae, okulama alumbana eya ku Yesu. ⁵¹ Yesu, okumutavhela atia: Otchitchi vhahanda ndjikuninge? Omupotchui atia: Molongefhi mbahanda omiho ange akae nawa. ⁵² Yesu atia: Enda, ekolelo lhoe lhekuhakula. Mondjangoyatcho, é atambula omihoae ya emutezha mondjila.