¹ Pae nkhu okeyowoko Clistu tchi etuyowola. Ya kakaeniko mautakamifha, ya hamulipaka vali kohi yotchituhi tchoupika. ² Tangeni, ami Paulu mimuhele okutia ngamulieka vali okuhita moviyumbo, Clistu ketchi mekemupa. ³ Nkhe vali ami mipopi kanda muzhiu engu melieka okuhita moviyumbo, engo makahindilua okutea motchitumino. ⁴ Onue muayapuka ku Clistu, onue omba muahanda okupewa ouhunga kotchitumino; onue kamukalole vali otchali. ⁵ Pae mokonda yo Mphepo, kekolelo otue tuahiliya nokukevela kouhunga. ⁶ Ku Yesu Clistu ne okuhita moyumbo ne okuhita moyumbo katchina tchi tchapopia, ya ekolelo pé okutavaya mokonda yotchihando. ⁷ Onue mamulumbuka nawa. Oiwa emutchaela kokutavela otchatchili? ⁸ Oluvinda oundo kalulu kuinguinha emuifhana. ⁹ Ofulumento onphuku omacha okukula. ¹⁰ Ami mbaomika ku Tate Kulu okutia onue kamukaninga vali oyondunge zhimu. Enguinha memutapiyala makuatua, ngaele onthumbo. ¹¹ Vango vange, tchi napahe ami ndjipopia otchokuhita moviyumbo, omokonda yatchi napahe ovita vinthezha? Putcho okuninga tchi helitcho kekuluchu tchaifhuapo. ¹² Ya nakombenha avehe mavemutuhatuha, ami mbahende okutia owo avehe nge valuapo. ¹³ Mokonda vangu wange, onue muaifhnuea keyovo; pae eyovo lhatcho endeo olheni halile omapitilo okuninga ovipuka ovivi, putcho litalavayeni polueni novakueni kotchahando. ¹⁴ Mokonda otchitumino atchihe tchiningua pe motchizhilika tchimu: Kahande onueni ngatchi naove ulihole. ¹⁵ Pae onue ngamulilumata nokulileka polueni novakueni, takamifheni opo hamulili polueni novakueni. ¹⁶ Pae ami mimuhele, endemee komphepo ya po kamukaninga oholo yovivi. ¹⁷ Mokonda viovipuka viovivi ovita vio Mphepo, ya oholo yo mphepo ovita viovipuka vio viovivi, mokonda embeo vimotchituhi octhinene poluatcho vivali. Okumanufhuka tcho opo onue hamungi ovipuka embi muhanga. ¹⁸ Pae ngaele pua mamuendekua noMphepo, kamukohi yotchitumino. ¹⁹ pahe, ovininga viovivi vikako otchatchili: okulilapo hamulikupile, ovilungameeka, okuhanda okulilapo naingu heli omuzhiu woe, ²⁰ okulikuabelea ovinthululu, oulozhi, okuila otchita, ovilua, efhipa, oluyuma, okulipangela ovivi, okuhelitea, okuliyapuluka, ²¹ emuna, epialu, oundjangalali, ya ngovipuka embeo. Ami mimuhele, ngatchi mbaningile poupe okutia avehe ombenha havangi ovipuka embeo Oumbala wa Huku kavekeupingana. ²² Pae ombenha vavingua noMphepo vailikifha otchihando, ehambu, ombembua, ombili, okuninga otchiwa, ouwa, ekolelo, ²³ ontchuki, okulifuifhapo, kovipuka embeo kakuna otchitumino. ²⁴ Ombenha vanhemba ku Yesu Clistu valeka ovipuka ovivi nemuna noyoholo zhazho. ²⁵ Otue ngatuka koMphepo, naotue matuende koMphepo. ²⁶ Hatulipakako, nokulituha poluetu novakuetu pamu nokulitchea emuna poluetu novakuetu.