¹ Vango vange omuzhiu umu ngakutuea mopekalo, onue omba mukoMphepo muno olho kupakeamu nawa omunthu engo noMphepo yontchuki; ya livingeni lumu onue, opo naonue haye okulolua. ² Takamifhe nombili ovivi polueni novakueni, potcho mamuningi ovitumino via Clistu. ³ Pae engu atuta okuila otchipukatchimu, pua hena tchi mazhili muni ulikelenga. ⁴ Kanda munthu uno olho kulituta nawa ovituwo viae, po makaninga kue tcheinha nge melipakako ya ehemeliheteke nomukuawo. ⁵ Mokonda kanda munthu malonge ovininga viae muni. ⁶ Enguinha alongefhua unolho okuhepula ovipoka viatcho oviwa avihe kuingo malongefha. ⁷ Hamulikelenga otcha Huku katchiningua oluwi. Atchihe tcheinha omuzhiu makunu otcho makateya. ⁸ Mokonda enguinha akunea kotchivi tchae muni, makateya okutungululua; pae inguinha akuna koMphepo, makateya omunhu ombo haupu koMphepo. ⁹ Otue nge hatuponua nokuninga otchiwa, mokonda potchozho tchatcho matufhiki kokuteya, ehatulovola. ¹⁰ Pae, nkhando nkhe matutchizhili avehe tuveningeni oviviwa, unene vali okombenha owokomuhoko wekolelo. ¹¹ Taleni oyoletela patchi ami ndjimuhonikila nokuwako kuange muni. ¹² Ombenha vahanda okuninga otchipuka otchiwa konhama vemupaka oupiliku wo kuhita moviyumbo, okutia opo haveye okutuhifhua nekuluchu lha Clistu. ¹³ Pae naombenha vahita moviyumbo kavatezha otchitumino; ya owo vahanda muile ovingolongolo opo mumune onphitilo yokulipakako konhama yeni. ¹⁴ Ami hihande tchikae muami otcho kulipakako, haile pe kekuluchu lha Tate Kulu yetu Yesu Clistu, mokonda yatcho ouye watchuila ami, ya ami mbatchuila ouye. ¹⁵ Pae ngaele okuhita moviyumbo, ngahaile okuhita moviyumbo otchipuka tchimu, ya okuila otchitunge tchimu otchipe. ¹⁶ Ya avehe ombenha vaka mavatezha ondjila endjo, ngatchitie ombembua, nonkhenda ngaikae kuwo, ya nokoIchilaeli ya Huku. ¹⁷ Ya okuifha pahe té komutue, hapaningi ingu mandjete ovituhi, mokonda ndjilongela malha a Yesu kolutu luange. ¹⁸ Vango vange ombembua ya Tate Kulu yetu Yesu Clistu ngaikae noMphepo yeni. Amém.