¹ Mipopi okutia omphinga nkhando eli ondele, kailifhile nomupika, ngaele pé muni wovipuka viatcho avihe. ² É uno olho okutea movatumini nomovahakuli té pua hé makatia opo. ³ Ngatchi naotue, tchi nkhu tuli oyondele, nkhu tuningua oupika kovipuka viouye. ⁴ Pae tchi tchefhika otchizho tchatcho, Huku watuma Ondeyae, ayomukua nomukai ayomukua katchitumino. ⁵ É tcho wetchininga opo ahukulule ombenha nkhu vekotchitumino, tutambule okutchitua ngoyondele. ⁶ Mokonda onue muyondele, Huku watuma Omphepo Yondeyae moyombugo zhetu endji ipopia, Amba, Tate. ⁷ Okuninga okutia ovekumupika vali, undele. kutia undele, po naove umphinga mokonda ya Huku. ⁸ Pae powola yatcho po, tchi onue nkhu hamuí Huku, muaningua muile ovapika vaombenha nkhu haveli oyohuku. ⁹ Pae pahe tchi muí Huku, otchiwa pahe onue muíwe na Huku, mokonda mamutchuna kovapoyoli ovahepi moupika? Muhanda vali okuila ovapika? ¹⁰ Onue muholeka ovitenha nomiezhi omipe ya notchizho nomanima! ¹¹ Ami ndjihumbeako onue okuningea okutia ami ndjitavaye naonue embi viavalela. ¹² Ami mimukumbu, vango vange, kaeni ngami, mokonda nami mbaka ngaonue, onue kamundinge navi. ¹³ Pae onue mutchi okutia nkhu ndjimuvezhi tchi mbemuhela ondaka ombua poupe pokutenga. ¹⁴ Owolho nkhu mivele tchi mbemulola, onue kamunthoyele. putcho, muanthambula ngoandju ya Huku, ngaingu nkhundjili Yesu Clistu. ¹⁵ Opi pae penehambu lheni? Pae ami mimuhele okutia ngatchitavele onue mamutukula omihoni lumu muandjele ami. ¹⁶ Pae mbaila otchita tcheni tchi mbehela otchatchili? ¹⁷ Owo nonkhenda vemuyeva, ya hakotchiwa. Owo vahanda okumuyapulula nami opo muvetezhe. ¹⁸ Otchiwa okuninga onkhenda kovipuka oviwa ya ahamaile pe pua ndjipontheyeni. ¹⁹ Yonde vange, ndjino ahali yoluyomuko konue vali, té Clistu memuvingi. ²⁰ Ami mbahande kuka naonue pahe nokuvilula ondaka yange, mokonda ami ndjino omphata naonue. ²¹ Ntchelangeni onue okutia muahanda ukuka kohi yotchitumino: Kamutele tcheinha otchitumino tchapopia? ²² Mokonda tchahonikua okutia Ambalayau nkhu uno yonde vavali, umu walua momukai omupika ya umu walua momukai weyovo. ²³ Putchu owo mupika wayomukua konhama, ya onde womukuavo wayomukua komphango. ²⁴ Ovipuka embio vipondola okuhepulua ngovitola, mokonda ovakai omba vavali vaka ngavalikuata pamu vavali. Umu owo Komphunda Chinai. É oyomuka oyondele omba veli ovapika. Engo oAngali. ²⁵ Pae Angali ovilikifha Omphunda Chinai ko Alambia. Ya é oilikifha Ocheluchale yapahe, mokonda é umoupika noyonde vae. ²⁶ Pae Ocheluchale endji ikeulu eneyovo, ya é omeyetu. ²⁷ Mokonda tchahonikua: Lemua, muhakuata eyumu engu huyomuka. ifhana ya hilivika nehambu ove, engu hote oyongembia zholuyomuko. Mokonda oyonde womukai wokuyekua ovengi vali kowainguinha enomuzhiu. ²⁸ Onue pahe vango wange, nangatchi tchaka Ichaki, muyonde wonkhano. ²⁹ Potchizho tcheinha, inguinha nkhu ayuomukuea konhama wali otchita tchainguinha ayomukuea Komphepo. Nangapahe otchoyatcho. ³⁰ Otchitchi ovihonikua vipopia? Yeka pahe omupika nondeyae. Mokonda onde yomupika kakapingana pamu ovipuka nonde womukai weyovo. ³¹ Ngatchi vangu vange, otue katuyonde womukai omupika, tuyonde womukai weyovo.