¹ Ngalata ovapengefhi, oiwa emupa owanga? Okutchua kua Yesu Clistu kakuvilikifhue kukako kotchipala komiho eni? ² Ami mbamba pe okuiva tcho konue: muatambula Omphepo kovininga viotchitumino ene otchi muatavela kutcheinha muatea? ³ Muaila ngatchi ovapengefhi? Muafhimbika Komphepo pae pahe putchi hatchichiliviyile mumanufhuke konhama? ⁴ Wakondja nohali yovipuka ovingi pohi pé? Okutia tcho wakondja pé? ⁵ Inguinha emupa Omphepo, ya aningi ovininga vioyonkhono konue, otchininga kovininga viotchitumino ine okokutelela nekolelo? ⁶ Ngatchi Ambalayau atavela ku Huku ya putcho watavelua ngopouhunga, ⁷ tchiveni ngotchikuavo, okutia ombenha vatavela oyonde va Ambalayau. ⁸ Ovihonikua pokunako okutia Huku nkhu makapa ouhunga ovipunde kekolelo, watenga okupopia ondaka ombua ku Ambalayau,okutia: Kove ovilonga viatcho avihe mavikapewa oyonkhano oyombua. ⁹ Ngatchi, omba veli owokekolelo vapewa onkhano ombua pamu na Ambalayau, omuzhiu wekolelo. ¹⁰ Pae avehe omba vaomika ovinga viotchitumino vekohi viovivi, mokonda tchahokua: Owvapopiwa navi ombenha avehe havakakako kokuninga ovipuka embinha avihe viahonikua metikula lhotchitumino. ¹¹ Pahe tchanhanhama nawa okutia Huku kenaingu apa ouhunga kotchitumino, mokonda Owehunga makaka kekolelo. ¹² Otchtumino hatchekolelo, putcho, inguinha aninga ovininga viotchitumino makaka kuvio. ¹³ Clistu wetuyowola kovivi viotchitumino, okulilifha omuningi wanavi polukalo luetu, mokonda tchahonikua: Ovapoiwa navi ombenha avehe vatulikua metapua. ¹⁴ Okuningea okutia onkhano ya Ambalayau iye kovipunde mu Yesu Clistu, opotchitie kekolelo tutambule omphango yo Mphepo. ¹⁵ Vango vange, mikapopia ngomuzhiu. Nokounthu, kutupu engu metchikulamifha kutupu engu mawezhako otchipuka, tcheinha tchapakuako notchitumino. ¹⁶ Pahe, oyomphango zhapopiwa ku Ambalayau nokoyondevae. Katchipopiwe koyondele, okutanga ovengi; ya putcho, okumu pé, ondeyae engu eli Clistu. ¹⁷ Pahe tchi mipopi otchi: otchitumino, tcheya momanima oyochei nomanima omakuinhi atatu, katcheyeka kotchikolo otchitumino pahe tchakuako na Huku. ¹⁸ Pae okutia onkhano izhea kotchitumino, po kotchizhe vali komphango. Apehe Huku wapa Amnbalayau onkhano mokonda yomphango. ¹⁹ Otchitchi tchi otchitumino tchahanda okuninga? Otcho tchawezhelua omokonda viovivi, hinde pua ondeya Ambalayau nkhu mekeya ombenha ku vaningilua omphango. ²⁰ Otchitumino tchapakeluako koyoandju nomutumini. Ya omutumini umu tchapopia okuila ovanthu ovengi, pae Huku iyumu pé. ²¹ Pae otchitumino tchipilikila oyomphango zha Huku? Po aye! mokonda nkhu kupewa otchitumino tchi tchafua kokupa omunhu, ohunga tchatchili ngezhila kotchitumino. ²² Pae ovihonikua vianamininea ovipuka viatcho avihe kohi yopekalo. Huku tcho wetchininga opo omphango yeyovo kekolelo ku Yesu Clistu ipewe ombenha vatavela. ²³ Pae tchi ekolelo ku Clistu haliyeya, otue nkhu tuanamininua pouchike kohi yotchitumino, té kuaholoka ekolelo. ²⁴ Pae otchitumino atchile otchendelo tchetu té Clistu eya, opo tupewe ouhunga kekolelo. ²⁵ Pahe tchi kueya ekolelo otue katukotchendelo vali. ²⁶ Mokonda onue amuhe muyonde va Huku kekolelo ku Yesu Clistu. ²⁷ Amuhe onue omba muayavekua ku Clistu mueliwaleka Clistu. ²⁸ Kutupu ochundeu kutupu ongeleku, ne omupika ne omuyowoki, ne omuzhiu ne omukai, mokonda onue amuhe mumunthu umu pe ku Yesu Clistu. ²⁹ Okutia onue muwa Clistu, po muyonbdele va Ambalayau, oyomphinga okuendea nonphango.