¹ Ah, Ya jemila , Ya habiba tai, Ya jemila. eyun taki min juwa tarha taki zi Hamamteen. Shaar taki zi mujmua ta aqhnam al gi nezil le jebel ta Gilaad. ² Asnan taki zi mujmua ta khurfan al gatau suof tomon wa jaa min mahal ta qhasiil. Ayi wahid indu temaniya, wa mafi wahid al khasran. ³ Shafaif taki zi khite al Ghurmuzi; kasma taki hilu. khudud taki zi Rumana al gi beinu nus min terha taki. ⁴ Ragaba taki zi Aamara ta Daud al abinu min saf ta hujaar, Aliegu fogu alfi daragat, kulu daragat ta asakier. ⁵ Itniin sudur taki zi al zzubyan, Temaniya ta gazell, al gi Araie beina Suwsan. ⁶ Hata sabah kan jaa wa duluma bi jere, Ana bi ruwa le jebel al mur wa al luban. ⁷ Inti jemila fi kulu ahwal, ya habiba tai wa mafi eab fi inti. ⁸ Keli nina ruwa maa inti min Lubnan; Ya Aarusa tai. keli nina ruwa min Lubnan; Taal min ras ta Amana, min ras ta shenir wa Harmon, min Aokar ta ausud, min jebal ta Aokar ta fuhud. ⁹ Inti serigu gelba tai, Ya ukut tai, Ya Aarusa tai; inti serigu gelba tai, bi nazara wahid bes, bi juwahara wahid min siilsila taki. ¹⁰ Ma ajmal hub taki, Ya akut tai, ya Aarusa tai! Hub taki afdal bi ketier min al khamra, wa ma ahlla riha ta eatir taki min ayi ariyah. ¹¹ Shafaif taki, Ya Aarusa tai, gi negit Aasiil; tehet lisan taki Aasiil wa lebin; Riha ta gumash taki zi riha ta lubnan. ¹² Ya Akut tai, Ya Aarusa tai ya hadigha al mukful, Ya hadigha al mukful ya yanbuie al mukhtum. ¹³ Furuie taki zi bustan ta ashjar ta Rumana al fawakih tuo azilu, wa ashjar ta Henna wa Nardiin, ¹⁴ Nardiin wa kurkum, Ghalam al zarira wa Ghirfa maa kulu anuwaa ta Luban, Mur wa Al sabbar maa afdal anuwaa ta Autur kulu. ¹⁵ Inti majra fi jenena, Bier ta moyo al saafi, majari al gi kubu min Lubnan. Aarusa le Aaris ¹⁶ Gum, hawa ta shamal, Taal ya hawa ta junub; afuku fi jenena tai de ashan eatir tuo bi tala riha tuo al hilu de bara, ashan habib tai bi jaa fi jenena tuo wa akulu fawakih tuo al qhali.