¹ Wokit Balaam ainu gal Yahweh moksut ashan Bariku Israel, huwo ma musha, ze ta doe al futu, ashan istakdim zihir. Ze huwo ainu le gabat. ² Balaam arafa enu wa ainu Israel fi mukaimat, aiya wahid fi gebila, wa roho ta Rabuna ja fi huwo. ³ Huwo istakbil nubuwa wa kelim, Balaam jena ta Beor gerib bi onusu, wa nas all oyuun romon wasi fata. ⁴ Huwo wonusu wa asuma kalam ta Allah. Huwo ainu ruya min Rabuna, gubal huwo ma dengiir tehet ma oyuun bito faata. ⁵ Keif jamel ta mukeimat taki, Yacoub, mahal all inta gi esh, Israel! ⁶ Ze waadi hawily humon zetetu bara, ze mahaljarat fi taraf bahar, ze zuhur zarau ma Yahweh, ze khushub arz fi tarab moyo. ⁷ Moya bi jere min jeradil tomon, wa tirab tomon bi endu moyo ketir. Melik tomon bigun aasim fotu Agag, wa mamuluka tomon be ehtaramu. ⁸ Allah bi jibu huwo bara min Masir. Huwo bi endu guwa ze Tor al wahas. Huwo bi yakul al umam al bi shakil didu. Huwo bi yeksir udam tomon hetehata. Huwo bi durubum be nishab towo. ⁹ Huwo bi num tehed ze ased, Huwo bi durubum be nishab towo. Ze lobuwa. Munu yau bi galgilu? Keli aiya wahid al bi bariku kun Mubarak; keli aiya wahid albi naalu kun moloun. ¹⁰ Balak tala zalan kaalis did Balaam wa dugu yedin towo sawa ma zalan. Balak kelim le Balaam, “ana nadi inta ashan naalu adu tai, lakin ainu, inta bariku humon talata maraat ¹¹ Yala sibu ana hasa wa ruwa beit. Ana kelim ana bi wodik hadiya, lakin Yahweh ma sibu inta bi ligo aiya hadiya” ¹² Yala Balaam juwabu le Balak, “ana kelim le murasulat al inta rasulu le ana, ¹³ Mahma kan balak wodi le ana kasri towo Malian ma fida wo dahap, ana mabi ruah bara min kalam ta Yahweh wa kan haja batal wala al kuwes, wala ai haja al kulu ana deiru amulu. Ana bi kelim bes shunu al Yahweh wori le ana ashan kelimu! Ana ma kelim de le humon? ¹⁴ Yala hasa, shuf, ana bi ruah wara le nas tai. Lakin awel keli ana arshidu inta an haja al nas de bi amulu le nas taki fi ayam gidam. ¹⁵ Balaam bada ma nubuwa de. Huwo kelim "Balaam jena ta Beor kelemu, rajal al einu moftu. ¹⁶ De yau nubuwa min zol al asuma kalamat min Allah, al endu marafa min Allah al fok, al indu ruyaa min Allahh, al fi gidam tou bi dengire tehet ma oyuun fati. ¹⁷ Ana ainu huwo, lakin huwo ma hini hasa. Ana ainu huwo, lakin huwo ma gerib.Al nejma bija bara min Yacoub, wa raas bi gum min Israel. Huwo bi gofulu giadad ta Moab wa demiru kulu agial ta seth. ¹⁸ Yala Edom bikun mumtakat ta Israel, Wa seir bikun mumtalak tomon, adu al Israel, al Israel bi amsik be guwa. ¹⁹ Bara min Yacoub melik bija albi endu sulta, Wa huwo bi demiru al aishin fil medina tomon. ²⁰ Yala Balaam ainu le Amalek wa bada nubuwa tou. Huwo kelim, " Al Amalek kan adhaam umam, lakin akiir nehaya tou bekun damar. ²¹ Yala Balaam ainu le Kenites wa bada nubuwa. Huwo kelim, "mahal al intum aishin fogo gowi wa oush takum fi hajar. ²² Mahmakan intum Kenites bi aruku intum ma nar wokit asiriin be silu kum ze asir al harib". ²³ Yala Balaam bada ma nubuwa tou al akhir. Huwo kelim, "naala! mukn bi ish kan Allah amulu de? ²⁴ sufun bija min tarab Bahar ta Kittim, humon bi hajimu Assyrian wa shetar le Eber, lakin humon, kaman, bi entehi fi damar. ²⁵ Yala Balaam gum for wa ruah. Huwo rija le beit tou, wa Balak kaman ruah bara.