¹ Al dahab biga ma gi lamaa; keif Dahab al safii de gieru! hujaar al mughadus shititu fi ayi rukun ta sharie. ² Qayima ta Abnaa ta Sahiyun al ghaliyeen kan gi wazinu maa Dahab al safii, lakin hasa qayima tomon ma aktar min ta gurumat ta teen, shukul ta eda ta al fakharie! ³ Hata al shaalib wodi sudur ashan bi radau iyal tomon, lakin gelba ta Biniya ta shaab tai biga gasie, zi al neaam al fi sahara. ⁴ Lisan ta iyal al gi radaau lesigu fok fi kasma tomon ashan aatash; Iyal nadi akil, lakin ma wodi le homon haja, ⁵ Nas al kan gi ihtefil bi afdal akil hasa homon biga jaaneen fi shawarie. nas al kan jaa gi lebisu gumashat al qurmuzi hasa homon gi num fi kum ta rumat. ⁶ Eighab ta Biniya ta shaab tai akbar min ta Sodom. Al kan demiru fi lahza wa mafi zol kan medu ea le hiya. ⁷ Ghaada ta hiya kan nedeifeen min al telige, Apiyad min al leben; jesim tomon ka ahmar min al murjaan, shekil tomon kan zi al Yaghut al azraq. ⁸ Hasa homon biga asuet min dukhan ta wasakha; ma bi arufu homon fi shawarie. Jelead tomon lesigu fi audam tomon; wa biga zi khashab al nashif. ⁹ Nas al kan katulu homon bi seif homon ahsiin min deel al katulu maa jaan, al woduru, al atanu homon ashan hasad kan mafi fi mahal zara. ¹⁰ Edan ta nosuwan al haneaneen al rakabu iyal tomon; homon biga akil tomon fi zaman al Biniya ta shaab tai kan gi demiru. ¹¹ Yahwah wori ghadab tuo kulu; Howo kubu zaalan tuo al shedid. Howo wala nar fi Sahiyun al hatragu asasiyat ta hiya. ¹² Muluk al ardi ma sedik, Wele nas al sakineen fi al ardi sedik, inu al Aaduw aw al muareadeen bi dakalu fi Abuab ta Urshelim. ¹³ De hasiil ashan khataya ta Anbiyaa ta hiya wa Akhtaa ta kahana ta hiya al kubu doom ta nas al Abrar fi wasat ta hiya. ¹⁴ Homon woduru, biga Aamiyaneen, fi al shawarie. homon kan mulawatheen maa doom ta nas al ma musmuh le ayi zol ashan bi lemisu ghumashat tomon. ¹⁵ " Ruwa! al ma nedeif!" Nas yahu gi kore le homon. "Ruwa! Ruwa!" ma keli inta lemidu!" biga homon istagharab Aan; Nas wonusu beina al aumam, " homon ma bi agdeer geni heni tani mara." ¹⁶ Yahwah bi nefsa tuo yahu shetitu homon; Howo ma harisu homon tani mara. homon ma ihterim al kahana, wa homon ma beinu ayi neama le Sheyukh. ¹⁷ Ena ta nina biga taaban, ainu le musaada al ma gi jaa; min Abraj al muragaba nina intezir Aumam al ma agdeer jaa anqizu nina. ¹⁸ Homon dowuru wara nina, nina ma agdeer dowuru fi shawarie ta nina. kan nihaya ta nina biga gerieb wa ayam tanina gi hasibu, nihaya ta nina kan jaa. ¹⁹ Al mutarideen kan gi jere wara nina bi suraa shedid aktar min al Nuusur al fi sama. homon turudu nina le Jebaal wa homon amulu le nina sherik fi al sahra. ²⁰ Nefes al fi Anafa ta nina- Al mumsuh Yahwa- Howo kan sejeenu homon fi hufrat tomon; Zi al kan kelimu, "Nina bi iesh tehet dul tuo beina al shuob (al aumam)." ²¹ Ya Biniya ta Edom, Keli inta afrah wa kun muksut, inti al gi iesh fi ardi ta Aus. Lakin inti kaman bi jeribu kubaya de; inti bi tala sakaran wa bi agila nefsa taki ariyan. ²² Ya Biniya ta Sahiyun, eagab taki bi wosulu le nihaya; Howo ma bi zidu qhurba taki. Lakin ibnat ( Biniya) ta Edom, Howo bi Aagibu; howo bi Aalinu khataya taki.