¹ Ana inasan al ainu aazab tehet asaya ta ghadab al shedid ta Yahwah. ² Howo shilu ana wa wodi ana duwuru fi duluma wa mafi nur. ³ Hagigatan fi yom kulu kaman howo rajaa eda tuo deed ana tani mara, ⁴ Howo karau jesim tai wa jelid tai; howo kasuru audam tai. ⁵ Howo abinu sur wa lifu ana maa dawa al mur shedid wa wajaa shedid. ⁶ Howo sibu ana iesh fi mahalat al duluma, zi nas al mutu min zaman towil shedid. ⁷ Howo abinu sur hawili tai wa ana ma bi agdeer jere. howo rubutu ana maa jenziir al tegeel. ⁸ Wa raghmi ana kore wa nadi musaada, Howo abaa salawat tai. ⁹ Howo gufulu sika tai maa heta al zienu hujaar tuo; howo mielu sikat tai. ¹⁰ Howo biga zi Duab al gi dabieru ana, zi Aseed al fi mahal ta dusu; ¹¹ Howo agelibu sikat tai, howo sibu ana biga haznan. ¹² Howo medu qhus tuo le itijah tai wa ana biga hadaf ta nishab tuo. ¹³ Howo gidu killar tai maa nishabat al fi shinta tuo. ¹⁴ Ana biga haja ta ataku le shaab tai kulu, haja ta haggara kulu yom. ¹⁵ Howo mala ana maa wajaa al shedid wa asuru ana asurubu al afsantiina. ¹⁶ Howo ataanu sunun tai maa hujaar, wa ajeenu ana fi rumat. ¹⁷ Ruhu tai biga aba salam; ana nesitu maana ta geni muksut. ¹⁸ Wa ana kelim, " Gowa tahamul tai kalasu wa kaman amal tai fi Yahwah." ¹⁹ Zekiru musieba tai wa woduru tai, al afsantiin wa marara. ²⁰ Ana daiman gi howo wa nefsa tai gi zekiri wa bi dengiri fi dakhil tai. ²¹ Lakin ana bi fekir ashan keda ana indu rajaah: ²² Muhaba ta Yahwah sabit ma bi wogif ( gata) wa rahma tuo ma indu nihaya, ²³ Homon jedid fi kulu sabah; Amaana taki azim. " ²⁴ Ana kelim, Yahwah yahu Mirath tai," ashan keda ana bi kutu sigha fi Howo. ²⁵ Yahwah Howo kwes le nas al gi intezir Howo, le zol al gi fetishu Howo. ²⁶ Howo kwes keli inteziru kulasa ta Yahwah bi hudue. ²⁷ Howo kwes le inasan al bi ithammal taab fi zaman ta shabab tuo. ²⁸ Keli howo geni barau fi hudue, fi zaman al taab jaa le howo. ²⁹ Keli howo kutu kasma tuo fi turab- yemkin howo bi ligu rajaah. ³⁰ Keli howo wodi wosa tuo le zol al dugu howo, keli howo kun maliyan shedid ma lawm. ³¹ Leanu Rabuna ma bi aba nina elal abad, ³² Lakin raghmi howo gi jebu huzun, howo indu rahma hasab Muhaba al sabit al wafier. ³³ Ashan Howo ma bi nizilu musiba min gelba tuo aw eazab le Iyal ta al basheriya. ³⁴ Ashan bi atanu aala al ardi kulu al masajeen, ³⁵ Ashan bi ankuru aadala ta insan fi hudur ta al fok fi al aali, ³⁶ Ashan bi ankuru aadala ta al ferd-Rabuna ma bi wori hajat zi deel! ³⁷ Munu kan wonusu wa kalam tuo haseel, Ele Rabuna kan yahu aalinu? ³⁸ Hal de ma min kasma ta alfok fi aali inu al masayib wa al kwes kulu bi haseel? ³⁹ Keif insan al hai bi ishtekie? Keif insan bi ishtekie ashan aughuba bi sabab ta khataya tuo? ⁴⁰ Keli nina imtehin turuk ta nina wa jeribu ( ikhtebi) homon, wa keli nina rejaa le Yahwah. ⁴¹ Keli nin arfa gulub ta nina wa edan ta nina le Allah al fi samawat; ⁴² Nina khalifu wa nina itmarad, wa ma afii intum. ⁴³ Inta kati nefsa taki maa ghadab wa inta turudu nina, inta katulu wa inta ma sibu. ⁴⁴ Inta kati nefsa taki ma sihab ashan salawat ma keli wosulu le inta. ⁴⁵ Inta amulu nina zi wasaka al afiin wa shaab kulu aba nina. ⁴⁶ Aaduw ta nina kulu laanu nina, ⁴⁷ Kafu wa sherik waga le nina, kharab wa damar. ⁴⁸ Dumue kubu min eyun tai zi majarie ta moyo ashan shaab tai demiru. ⁴⁹ Eyun tai bi nizil dumue bidun raha, wa ma bi wogif, ⁵⁰ Lahadi Yahwah bi ragibu wa ainu le tehet min sama. ⁵¹ Eyun tai jebu le ana huzunashan Banat ta medina tai. ⁵² Nas al kan Aaduw tai gi dabiru ana zi Teyir; homon dabiru ana bidun sabab. ⁵³ Homon jada ana fi hufra wa jadau ana maa hujar, ⁵⁴ Wa moyo biga maliyan, gi kati ras tai. Ana kelim,; Ana gi mutu!' ⁵⁵ Ana nadi isim taki, Yahwah, min dakhil ta hufra. ⁵⁶ Inta asuma sut tai zaman ana kelim, ' Kelin inta ma gofulu adana taki min kore tai ashan musaada.' ⁵⁷ Keli inta jaa gerib fi yom al ana nadi inta; inta kelim,' Ma keli inta kafu.' ⁵⁸ Rabuna, inta dafie le ghediya tai, inta angiezu haya tai! Yahwah, ⁵⁹ inta ainu haja al khalat al homon amulu le ana; gata ghediya tai. ⁶⁰ Inta ainu integham tomon kulu, Muamarat tomon kulu al deed ana. ⁶¹ Inta asuma haggara tomon, Yahwah, wa kulu muamaarat al deed ana. ⁶² Kalam wa itihamat ta Aada tai gi jaa deed ana fi yom kulu. ⁶³ Ainu homon keif ge geni wa homon gi gum fok; homon hagieru ana maa gunat tomon ⁶⁴ Aaghibu homon, Yahwah, hasab haja al homon amulu. ⁶⁵ Inta keli ma wodi fadiya fi gulub tomon! ⁶⁶ Keli inta fetishu homon maa zaalan wa demiru homon min tehet al samawat!'