¹ Biga kulu mejles ta shaab ta Israel ijtama ma baad fi Shiloh. Humon jahisu khema ta ijima hinak wa humon shilu arid de gidam bitomon. ² Kan hinak lisa fi sabaa gabail wasat shaab ta Israel al worisa bitomon kan ma kalifu le humon. ³ Yashu kelim le shaab ta Israel, “kan fetera itakum ma agder ruwa le arid al Yahwa, Allah ta abuhat bitakum wodi le itakum? ⁴ Azilu le nefsa takum talata rujal min kulu gebila, ana bi rasulu humon bara. Humon bi tala bara wa bi fetish arid de fok wa tehet. Humon bi katibu bara wosif bi tou ma raiya ta worsat bitomon, wa biga humon bi ja wara le ana. ⁵ Humon bi gesime le saba agsam. Yahuza bi geni fi arid bitomon fi junub, wa bet ta Yousif bi Istemir geni fi arid bitomon fi shamal. ⁶ Ita bi wosifu arid de fi saba agsam wa jibu wosif de hia le ana. Ana bi amulu le itakum gura gidam ta Yahwa allah tanina. ⁷ Lawiin ma indu nisba fi wosat takum, ashan kahanat ta Yahwa yau worisa bitomon. Gad, Raubin, wa nus ta gebila ta Manasseh humon akudu worisa bitomon, beyid fi urdun. De yau worisa al musa kadam ta Rabuna wodi le humon.” ⁸ Biga rujal de gum wa ruwa. Yashu wodi Awemir le del al ruwa katibu wosif ta Arid de, gali, ruwa fok wa tehet fi Arid wa katibu wosif bitou wa rija le ana. Ana bi amulu gura le itakum hina gidam ta Yahwa fi Shiloh. ⁹ Rujal de ruwa fok wa tehet fi arid wa katibu wosif bi tou fi kalam be hasab mudun rija le Yashu fi muaskar fi Shiloh. ¹⁰ Biga Yashu amulu le humon gura fi Shiloh gidam Yahwa. De kan hinak kalifu de le shaab ta Israel, wa le kulu min humon kan wodi nisba ta arid bitou. ¹¹ Min wajib ta arid le gebila ta Benyamin usura be usura, arid al kelifu le humon de arid al kan waga beyin iyal ta iyal ta Yahuza wa iyal ta iyal ta Yousif. ¹² Fi itijah ta samal, hudud bitomon bada fi urdun, hudud de tala fok le taraf ta shamal ta ariha, wa tawali tala fok be wasit jebel garib ta bilad. Hinak huwo wosulu le beriya ta beth own. ¹³ Min hinak hudud de tala gidam junub fi itijah ta luz (hefsa mahal ze bethel). Biga hudud de ruwa tehet le ataroth iddar, be jebel al tehet junub ta bet Haron. ¹⁴ Hudud de biga ruwa fi itijah al tani fi itijah ta sherik huwo rija nahwa junub, mugabil le jebel al bi tala min beth Horon. Hudud de bi kalasu fi kiriath baal (huwo yau kiriath yearim), mefina al huwo tabi le gebila ta Yahuza. De shekilu hudud de fi itijah ta garib. ¹⁵ Itijah ta junub bada bes bara min kiriath yearim. Hudud de ruwa min hinak le Ephron, lahadi ena ta moya ta naftoh. ¹⁶ Hudud de ruwa tehet lahadi hudud ta jebel al kan muakis le wadi ta ibni hinnom, al kan fi shamal nihaya ta wadi ta Rafeiin. Huwo biga ruwa tehet lahadi wodi ta hinnom, junub ta taraf ta al yabusiin, wa istemer tehet le En rogel. ¹⁷ Huwo rija shamal, tala le itijah ta En shemesh, wa min hinak huwo ruwa bara le Geliloth, al kan muakis akaba ta adummim. Biga huwo ruwa tehet lahadi hajer ta bohan jena ta Rawabin. ¹⁸ Huwo ruwa gidam le shamal ta khitfa ta beth arabah wa tehet le al Arabah. ¹⁹ Hudud de ruwa gidam lahadi shamal khitfa ta Beth Hoglah. Hudud de intaha fi shamal lisan ta bahar al meleh, hihaya ta urdun fi junub. De yau kan hudud al fi junub. ²⁰ Urdun amulu hudud bitou fi itijah ta sherik. De kan worisa ta gebila ta Benyamiin, wa huwo kan wodi usura be usura, hudud baad hudud kulu dayra. ²¹ Hasa mudun ta gebila ta Benyamiin, usura hasab usura, del kan yau mudun: Ariha, Beth, Hoglah, wodi keziz, ²² Beth al Arabah, Samaraim, Betiel, ²³ Al Awim, al Fara, Afrah, ²⁴ Kafar al Ammoni, al ofni, wa Gaba. Humon kan itnashar mudun, be idafa le kariyat bitomon. ²⁵ Hinak kan kamon mudun ta Gibeon, Ramal, Beeroth, ²⁶ Al Mizfah, al Kafirah, al mosah, ²⁷ Rakem, Yarfaeel, taralah, ²⁸ Selah, Alef, Al yebusi (nefsa ze orshelem), Gibaah, wa kiriath. Hinak kan Arba tashar mudun, be idafa le kariyat bitomon. De kan worisa ta Benyamiin le usurat bitomon.