¹ Kan bes ras tai yao bi tala moyo, wa uyon tai biga malian ma moyo ena! Lanu Ana bi itmana kure bilel wa nahar min ajil delin al fi nus takum biniya ta shaab al katulu. ² Kan fi zol bi wedi le Ana fursa ta safar le sahara ashan bi kelim, ana bi ruwa wei wa bi sibu shaab tai. Kan Ana bi sibu umon, ashan umon kulu biga nas ta zinna, nas kainin! ³ Yahwah bi alinu, ''Umon bi amulu kiana fi danagat tumon ta kizib be lisan tumon, lakin ma shan kalam ta ayi amana ta tumon al sibu umon tala guwin fi wata ard. Umon bi ruwa min sher le tani. Umon ma arufu ana.'' ⁴ Ayi zol min intakum, kede gafir did jeran tuo wa kede ma kutu sikha fi ayi aku. Ashan ayi aku de zol kazab, wa ayi jeran bi ish be nemima. ⁵ Ayi zol bi shitimu jeran tuo wa bi wunuso hagiga. Lisanat tumon bi derisu hajat al kizib. Umon bi kebir nefsa fi sher. ⁶ Mahal geni taki fi nus ta kizib; fi kizib tumon umon aba rudu ana - de elaan ta Yahwah.'' ⁷ Yahwah ta junud bi kelim kida, ''Ayinu, Ana bi ruwa nedifu umon, ashan shunu tani yao Ana bi amulu, ashan haja al shaab tai amulu? ⁸ Lisanat tumon de harba al seninu; umon bi wunuso hajat ta adam amana. Be kashmat tumon umon bi alinu salam ma jeranat tumon lakin fi gulub tumon kizib yao bi istena umon. ⁹ Hal Ana ma bi wedi le umon igab ashan hajat de. de elaan ta Yahwah- wa hal Ana ma bi integim be nefsa tai fi beled al ze de? ¹⁰ Ana bi guna guna ta huzun wa bi arfa kure le jubal, wa guna ta bika bi gunau le maitin. Ashan umon karabu wa mafi insan bi mururu be safa tumon, wele sout ta ganamayat asumau. Tiur ta sama wa haiwanat kulu jere. ¹¹ Ana bi gilibu Urshelim le kum ta turab, wa mahal dusu ta banat Awa. Ana bi kutu mudon ta Yahuza mahal al karabu mafi sukan fugu.'' ¹² De yatu insa al indu hikima kifaya ashan bi fahim kalam de? Le munu yao kashama ta Yahwah wunuso, wa huwo bi alinu? Malu wata mutu wa demiro ze sahara al mafi zol bi murur fugu? ¹³ Yahwah kelim, ''Ashan umon sibu ganoon tai al kutu gidam tumon, ashan umon asuma le sout tai wa ish beu. ¹⁴ De kulu ashan umon ish be giladab ta gulub tumon wa ruwa wara Baal ze ma abuhat tumon derisu umon kede amulu. ¹⁵ Asham kida Yahwah ta junud, Allah ta Israel, bi kelim kida, Ayinu, Ana bi ruwa sibu nas de akulu kashab al mur wa ashurubu moyo al sim. ¹⁶ Yala Ana bi shetetu umon fi nus ta duwal al umon ma arufu, wele umon ma arufu judud tumon. Ana bi rasulu sef be wara tumon lahadi kan Ana demiro umon ta kulu kulu.'' ¹⁷ Yahwah ta junud bi kelim kida, ''Fekir takum an kalam de: nadi takum delin al bi guna guna ta bika; ¹⁸ kede umon ja. Nadi takum nusuwan al indu muharat fi kure; kede umon ja. Kede umon istajil wa gun gunat ta huzun le anina, yala uyon ta nina bi nezil moyo ena. ¹⁹ Lanu sout ta kure asumau fi Sahiun, 'Kef anina mutu. Anina indu fadiya shedid, ashan anina sibu beled min zaman umon ksura biut ta nina tihit.' ²⁰ Ashan kida intakum ya nusuwan, asuma takum kelima ta Yahwah; kutu takum bala le risala al bi tala min kashma tuo. Yala derisu le banat takum guna ta huzun, wa jeran abu mara guna ta bika. ²¹ Ashan mutu ja be wasat ta shababik ta nina; dakalu le mahalat ta nina. Katulu iyal min bara, wa shabab fi medina. ²² Alinu kalam de, 'De yao elaan ta Yahwah - jusa ta insan bi waga fi mahal zara, wa ze arabiya ta zira al lesegu der salau, wa mafi zol al bi limu umon.'' ²³ Yahwah bi kelim kida, ''Matkum sibu zol al hakim itkebir fi hikima tuo, wele zol al mukatil fi guwa tuo. Matakum sibu zol al ganiyan araf nefsa be shukul ganiyan tuo. ²⁴ Lanu kan insan bi itkebir be ayi haja, kede kun fi de, inu huwo indu marifa tai. Alnu Ana Yahwah, al bi ishtakal be ahad, adala wa bir fi ard. Lanu Ana bi tala murtah be kalam de - de elaan ta Yahwah.'' ²⁵ ''Ayinu ayamat bi ja - de elaan ta Yahwah- al Ana bi wedi igab le kulu delin al taharu fi jisim tumon. ²⁶ Ana bi wedi igab le Masir wa Yahuza, Adom, wa shaab ta Ammon, Moab, wa kulu nas al bi gata shar ta jisim tumon guser kalis. Ashan kulu umam delin ma taharu umon, wa biut ta Israel kulu indu geliba al ma taharu.''