¹ ''Fi zaman dak - de elaan ta Yahwah - umon bi tala min juwa magabir udam ta muluk ta Yahuza wa ruwasa tuo, udam ta ambiya wa kahana, wa udam ta sukan ta Urshelim. ² Yala umon bi fertegu umon bara fi nur ta shemish wa gamara wa kulu nujum ta sama; hajat tab sama al umon duru wara tumon wa kadimu, wa abudu. Udam de ma bi limu tani mara wa dufunu. Umon bikun ze hajat al gedim fi ard. ³ Wa fi ayi mahal al Ana turuju umon fugu, umon bi iktar mutu bidal haya le badun tumon, kulu delin al lisa fadulu min beled al ta sher- de elaan ta Yahwah Rabuna ta junud. ⁴ Yala le umon, Yahwah kelim kida: Hal fi zol al bi waga wa ma bi gum fuk? Hal fi zol al bi wuduru wa bi hawil rija? ⁵ Malu shaab de, Urshelim rija war fi adam amana? Umon kungus fi geliba batal wa ba tub. ⁶ Ana kutu bala wa asuma, lakin umon ma wunuso sah; mafi zol kan mutasif le shukul sher tuo, mafi zol al bi kelim, ''Ana amulu shunu?'' Umon kulu bi ruwa fi mahal al niya tumon deru, ze husan al bi jere fi harib. ⁷ Hata luglug fi samawat arufu zaman tuo; wa hamam, wa sanuna, hafizu zaman ta ja tumon. Lakin shaab tai ma bi arufu gararat ta Yahwah. ⁸ Kef intakum bi kelim, ''Anina negitin, ashan ganoon ta Yahwah fi ma anina''? Hagiga, ayinu takum! Galam ta katib ta kizib de kalagu kizib. ⁹ Rujal al hukama bi kun indu fadiya. Umon kafu. Wa umon aba kelima ta Yahwah, yala faida ta hikima tuomn de shunu? ¹⁰ Ashan kida Ana bi wedi nusuwan tumon le nas tanin, wa mahalat ta zira tumon le delin al bi imteliku umon, lanu min suker le kebir tumon, umon kulu tamaiin le ribah al batal! Min nebi le kahin, umon kulu bi marisu kizib. ¹¹ Umon aliju dabarat ta shaab tai bes besit, Umon bi kelim, ''Salam, Salam,'' ligu mafi salam. ¹² Hal umon kan indu fadiya zaman umon kan bi marisu rajasa de? Umon kan ma indu fadiya; wa umon ma arufu kef bikun kajilan! Yao umon bi waga fi nus ta delin al waga; bi nezilu umon tihit kan wedi le umon igab, Yahwah kelim. ¹³ Ana bi masa umon ta kulu kulu de elaan ta Yahwah- ma bikun fi enab fi karma, wele bikun fi shejera teen fi shawar. Lanu kurufu waga waga, wa haja al Ana wedi le umon bi kalasu. ¹⁴ Malu anina bi geni hini? Limu takum sawa; Kede anina ruwa le mudon al kubar, wa anian bi askut hinak fi mutu. Lanu Yahwah Allah tanin bi kutu anina skut. Huwo bi sibu anina shurubu sim, min zaman anina amulu katiya did huwo. ¹⁵ Anina indu raja fi salam, lakin mafin haja kues. Anina indu raja le zaman ta ilaj, lakin ayinu, bikun fi tukwif. ¹⁶ Min Dan asumau sout ta hasin. Ard kulu kan bi hizzu min sout ta kura ta hasin al guwi. Lanu umon bija akulu wata de ma shukul ganian, medina wa nas al bi geni fugu. ¹⁷ Ashan kida ayinu, Ana bi rasulu debibat fi nus takum, al ma bi arham bes bi addi tuwali. De elaan ta Yahwah.'' ¹⁸ Huzun tai ma indu mihaya, wa geliba tai ayan. ¹⁹ Yao! sout ta kure ta biniya ta shaab tai min ard bait kalis! Hal Yahwah ma fi fi Sahiun? Hal melik tuo biga mafi hinak? Yala taib malu intakum biga bi kutu ana zalan ashan bi asnam tuomn wa rabunat tumon al garib? ²⁰ Hsad kalas mururu, Karanga kalasu. Lakin ma angizu anina. ²¹ Ana muagu ashan tawik ta biniya ta shaab tai. Ana bi kure fi hajat al saab al hasil le hiya; wa Ana mustagrib. Hal mafi ayi dauwa fi Jalaad? ²² Hala mafi zol al bi aliju hinak? Malu shifa ta biniya ta shaab tai ma hasil?