¹ Kelima al ja le Armiya min Yahwah, bi kelim, ² ''Wegif fi baba ta bet ta Yahwah wa beshiru kilima de! Kelim, 'Asuma takum kalam ta Yahwah, intakum kulu ya Yahuza, intakum al bi dakalu ma bab de ashan bi abudu Yahwah. ³ Yahwah ta junud, Allah ta Israel, bi kelim kida: Sala sikat takum wa amulu takum kues, wa Ana bi sibu intakum istemir geni fi mahal de. ⁴ Matakum kutu badum takum le kelimat ta kizib wa kelim, ''Haikal ta Yahwah! Haikal ta Yahwah! Haikal ta Yahwah!'' ⁵ Lanu kan intakum hagiga sala sikat takum wa mariso shukul kues; kan intakum amulu adala bainu insan ma jeran tuo- ⁶ kan intakum ma zulumu de al ateem, wele armala wa ma kubu dom al beri fi mahal de, wa intakum ma duru war rabunat tanin ashan bi augu intakum- ⁷ yala Ana bi sibu intakum geni fi mahal de, fi beled al Ana wedi le judud takum min zamaan wa lel abad. ⁸ Intakum bi kutu sikha takum fi kilimat ta kabasa al ma bi saidu intakum. ⁹ Hal intakum bi seregu, katulu, wa bi amulu zinna? Hal intakum bi halifu be kizib wa bi gedim bukur le Baal wa duru wara eabunat al intakum ma arufu? ¹⁰ Yala intakum bi ja wegif gidam tai fi bet de al nadi ma isim tai wa bi kelim, ''Angizu anina,'' yala intakum bi amulu najasa de kulu? ¹¹ Hal bet de al bi arfa isim tai, mahal ta dusu ta haramia fi uyon takum? Lakin Ana ayinu, de elaan ta Yahwah.' ¹² 'Yala ruwa takum fi mahal tai fi Shiloh, mahal al Ana sibu isim tai bi geni hinak min bidaya, wa ayinu le haja al Ana amulu fugu ashan kalam ta sher ta shaab tai Israel. ¹³ Yala hasa, intakum bi amulu hajat de kulu- de elaan ta Yahwah- Ana wunuso le intakum zaman wa zaman tani, lakin intakum ma asuma. ¹⁴ Ashan kida haja al Ana amulu fi Shiloh, Ana kaman bi amulu le bet de al nadi isim tai fugu, bet al intakum kutu sikha takum fugu mahal de al Ana wedi le judud takum. ¹⁵ Lanu Ana bi rasulu intakum bara min gidam tai bes ze ma Ana rasulu akuwana takum kulu bara, iyal ta Afraim kulu.' ¹⁶ Wa le inta, Ya Armiya, mata seli le shaab de, wa mata kure wele seli bidal tumon, wa ma hanisu ana, ashan Ana ma bi asuma le inta. ¹⁷ Inta ma bi ayinu haja al umon bi amulu fi mudon ta Yahuza wa fi shawari ta Urshelim? ¹⁸ Iyal bi limu kashab wa abuhat bi wala nar! Nusuwan bi ajinu ajin ashan bi amulu cak le Amira ta samawat wa bi kubu mushrub hadiya le rabunat tanin ashan bi kutu Ana zalan. ¹⁹ Hal umon hagiga bi kutu Ana tala zalan? -de elaan ta Yahwah- hal de ma badum tumon al umon bi kutu tala zalan de? ²⁰ Ashan kida Rabuna Yahwah bi kelim kida, 'Ayiun, zalan wa gadab tai bi kubu fi mahal de, fi nas wa haiwanat, fi ashjar fi mahal zira wa fi samar ta wata. Bi wala wa ma bi batulu.' ²¹ Yahwah ta junud, Allah ta Israel bi kelim kida, 'Zidu takum muhragat takum le zabaieh takum wa laham min fugu. ²² Lanu zaman Ana tala judud takum min ard ta Masir, Ana ma nadi ayi haja min umon. Ana ma wedi le umon ayi wesiya an muhragat wa zabaieh. ²³ Bes Ana wedi le umon wesiya de, ''Asuma takum le sout tai, wa Ana bi kun Allah takum wa intakum bikun shaab tai, ashan bikun kues ma intakum.'' ²⁴ Lakin umon asuma wele kutu bala. Umon ish be fikira tumon ta gulub tumon al sherir, yala umon rija wara, ma ruwa gidam. ²⁵ Hata min yom al judud takum tala bara min Masir lahadi yom ta aleela. Ana rasulu ayi wahid min kudam tai, ambiya tai, le intakum. Ana kan musir fi rsulu tumon. ²⁶ Lakin umon ma asuma le ana. Umon ma kutu bala. Lakin, umon guwi ragabta tumon. Umon kan ashrar aktar min judud tumon.' ²⁷ Ashan kida beshiru le umon kelimat de kulu, lakin umon ma bi asuma le inta. Beshiru le hajat de, lakin umon ma bi juwabu le inta. ²⁸ Kelim le umon: De beled al ma bi asuma le sout ta Yahwah Allah tumon wa ma bi rudu tadib. Hagiga shilu wa gatau bara min kashmat tumon. ²⁹ Gata shar taki wa haligu jisim taki, wa jada shar taki de bara. Guna guna ta bika fi mahalat al faddi. Ashan Yahwah sibu wa aba jeil ta zalan tuo. ³⁰ Lanu awlad ta Yahuza amulu sher fi uyon tai - de elaan ta Yahwah - umon kutu mukruhat tumon fi bet al bi nadi ma isim tai, ashan bi nejisu. ³¹ Yala umon abinu murtafaat ta Toffa al fi wadi Hinnom. Umon amulu kida ashan bi gedimu awlad wa banat tumon fi nar - haja al Ana ma weri, wa wele ja fi muk tai. ³² Ashan kida ayinu, ayamat bi ja - de elaan ta Yahwah- al ma bi nadi mahal de tani Toffa aw wadi Hinnom. Bi kun wadi ta katulu; umon bi dufuno jusas fi Toffa lahadi mafi mahal bi fadulu. ³³ Jusas ta shaab de bikun akil ta tiur ta sama wa haiwanat al kaab fi ard, wa mafi zol al bi kuofu umon. ³⁴ Ana bi wedi nihaya le mudon ta Yahuza wa shawari ta Urshelim, wa le sout ta farah wa wa shukul murtah, sout ta aris wa arusa, lanu wata bikun karban.''