¹ Fetishu takum aman, ya shaab ta Benyamin, be sibu gakum le Urshelim. Afuku takum trumpeta fi Tekoa. Arfa takum alama fuk fi Bet Hakarim, ze ma sher bi zahir min shumal; damar azim bi ja. ² Biniya ta Sahiun, biniya al giyafa wa wa letifa, bi demiro. ³ Ruaa wa ganamayat tumon bi ruwa le umon; umon bi dugu kiam hawil hiya kulu; ayi rajil bi kun rai ma iden tuo. ⁴ ''Intakum kerisu badun takum le rabuna ta harib. Gum kede anina hajimu gamara. Kaab shedid inu nahr bi wuduru, wa dulu ta asiya bi kalasu. ⁵ Lakin kede anina hajimu be bilel wa demiro gusur tuo.'' ⁶ Ashan Yahwah Rabuna ta junud bi kelim kida: Kat takum ashjar tuo, wa amulu takum hush did Urshelim. De yao medina al hagiga bi hajimu, ashan uwu malian be zulum. ⁷ Ze beer bi kubu moyo nedif, medina bi istemir tala sher. Mashakil wa adam nizam bi asumau fugu hiya; ayan wa dabarat bi istemir fi gidam usa tai. ⁸ Rudu takum tadib, ya Urshelim, wele Ana bi rija wara min intakum wa bi karabu intakum, beled al ma indu sukan.'' ⁹ Yahwah ta junud bi kelim kida, ''Be kulu takid umon bi legetu delin al fadulu fi Israel ze karma. Midu iden taki tani mara ashan bi legetu enap min jinena. ¹⁰ Le munu yao Ana bi alinu wa anziru ashan umon bi asuma? Ayinu! Adanat tumon ma tahiru; umon ma bi ageder kutu bala! Ayinu! kelima ta Yahwah ja le umon ashan bi sahihu umon, lakin umon ma rudu.'' ¹¹ Lakin malau ana be zalan ta Yahwah. Ana taban min amsuku tuo juwa. Huwo kelim le ana, ''Dufugu uwu bara fi iyal al fi sikat wa fi mujumuat ta shabab. Lanu rajil wa mara bi shilu umon sawa; wa kulu zol al ajus fi umor. ¹² Biut tumon bi wedi le tanin, sawa ma mahal zira tumo wa nusuwan tumon. Ashan Ana bi hajimu sukan ta ard be iden tai- de yao elaan ta Yahwah. ¹³ Yahwah alinu inu min suker le kebir, umon kulu tamaeiin le rebeh al batal. Min nebi le kahin, umon kulu bi marisu kabasa. ¹⁴ Umon aliju dabara ta shaab tai besit bes, umon bi kelim, 'Salam, Salam,' ligu mafi salam. ¹⁵ Hal umon kan indu fadiya zaman umon kan bi amulu kaab? Umon kan ma indu fadiya; umon ma arufu kef be kun indu fadiya! Ashan kida umon bi waga bainu nas al bin waga; bi nezilu umon tihit kan wedi le umon igab, Yahwah yao kelim. ¹⁶ Yahwah bi kelim kida, ''Wegif takum fi gata sika wa ayinu takum; asalu takum aikat ta judud takum. ''Wenu sika al kues de?' Yala duru takum fugu wa intakum bi ligu mahal ta raha le badun takum. Lakin shaab kelim, ''Anina ma bi ruwa.' ¹⁷ Ana kutu le intakum gufara ashan bi asuma le trumpeta. Lakin umon kelim, ''Anina ma bi asuma.' ¹⁸ Ashan kida ya umam asuma takum! Ayinu takum intakum ya shuhudin, shunu bi hasil le umon. ¹⁹ Asuma, ya ard! Ayinu, Ana bi ruwa jibu karisa le shaab de- - samar ta afkar tumon. Umon ma kutu bala le kelima tai wele ganoon tai, lakin umon bi abau.'' ²⁰ ''Bukur de al bi ja min Shaba de mana tuo shunu loe ana? Wele riha al giafa min ard bait? Muhragat takum ma mugbul le ana, wele zabaih takum. ²¹ Yahwah bi kelim kida, 'Ayinu, Ana bi ruwa kutu hajer ta sedimu kura did shaab de. Umon bi sedimu fugu- abuhat wa awlad sawa. Sukan ma jeranat tumon kaman bi mutu.' ²² Yahwah kelim kida, Ayinu, shaab bi ja min beled ta shumal, uma azim bi ja min ard bait. ²³ Umon bi arfa dangat tumon wa laharbat tumon. Sout tumon ze bahar al bi al amuwaj tuo bi gum, wa umon bi jere be hasin, ze rujal al bi ruwa fi harib, did inta, ya biniya ta Sahiun.'''' ²⁴ Anina asuma kabara an umon wa idenat ta anina bi ga taban. Waja ligu anian ze mara al bi weledu. ²⁵ Matakum ruwa bara le mahal zara, wele fi sikat, ashan sef ta adu wa tukwifat tuo hawilu mahal kulu. ²⁶ Biniya ta shaab tai, libisu takum gumash ta huzun wa masa takum ma rumat; kure takum be kure al mur ze le jena al wehit, ashan de al bi demiro de bi ja le anina faja. ²⁷ ''Ana kutu inta, ya Armiya, zol al bi imtehinu shaab tai ze zol al bi imtehin hadid, kede inta fetishu wa imtehin sikat tumon. ²⁸ Umon yao nas al giladabin min nas kulu, al bi wunuso nas tanin. Umon kulu nihas wan hadid, bi amulu fasad. ²⁹ Trumba aragu min nar al bi aragu umon; rasas akulu be lehib ta nar. Nadafa de bi istemir fi nus tumon, lakin bidun faida, lanu sher de ma talau bara. ³⁰ Bi nadi umon fidda al abau, ashan Yahwah aba umon.''