¹ Asuma takum kelima al Yahwah bi alinu le intakum, ya bet ta Israel. ² Yahwah kelim kida, 'Matakum alimu sikat ta umam, wa matakum kafu min ayat ta samawat, lanu umam bi kafu min hajat de. ³ Lanu ganoon ta shaab delin budun faida; zol bi gata shejera min gaba, yala zol al najar bi sala sal be alat tuo. ⁴ Yala umon bi jemilu be fidda wa dahab. Umon bi sabitu be shakush wa masamir ashan kede ma waga. ⁵ Haja al umon amulu ma idenat tumon geni ze ena bizira, ashan umon kaman, ma bi ageder wunuso ayi haja, wa der kede arfau umon lanu umon ma bi duru. Matakum kafu umon, lanu umon ma bi ageder amulu sher, wele umon bi ageder amulu ayi haja kues.''' ⁶ Mafi zol ze inta, Yahwah. Inta azim, wa isim taki azim fi guwa. ⁷ Munu yao ma bi kafu inta, muluk ta umam? Lanu de yao haj al inta mustehik, lanu mafi zol ze inta fi nus ta nas al hukama ta umon wele fi mamlakat tumon ta muluk. ⁸ Umon kulu sawa, umon tala belid wa nas ta zalan sawa, talamis ta sanam al ma ayi haja bes kashab. ⁹ Umon bi jibu fidda al dugu jzhis min Tarshish, wa dahab min Ufaz al salu ma iden ta zol. Gumashat tumon asmanjuni wa arjuwan. Nas al indu muharat yao amulu hajat de. ¹⁰ Lakin Yahwah de Allah al hagiga. Huwo yao Allah al hai wa melik abadi. Ard bi kafu min zalan tuo, wa umam ma bi ithamal gadab tuo. ¹¹ Intak kede wunuso le umon kalam de, ''Alihat al ma kalagu samawat wa ard bi mutu min wata wa min tihit ta samawat.'' ¹² Lakin de kan huwo yao kalagu ard be guwa tuo, wa huwo asisu dunia de kulu be hikima tuo, wa be faham tuo huwo amulu samawat. ¹³ Sout tuo ze sout ta moyo ketir fi samawast, wa huwo bi jibu karabu min nihaya ta ard. Huwo bi wala barg ta muturu wa bi rasulu habub min makazin tuo. ¹⁴ Ayi zol biga jahil bidun marafa. Ayi zol ta hadid kutu fi fadiya be asnam tuo. Ashan surat tuo de kizib, mafi haya fugu umon. ¹⁵ Umon ma indu faida, shukul ta nas al bi shitimu; umon bi mutu fi zaman ta igab tumon. ¹⁶ Lakin Allah, ta Yagub, ma ze delin, laun huwo yao asas ta hajat kulu. Israel yao gebila ta miras tuo; isim tuo Yahwah Rabuna ta junud. ¹⁷ Limu hajat taki wa ruwa, intakum nas al bi geni mukful. ¹⁸ Lanu Yahwah kelim kida, ''Ayinu, Ana bi ruwa jada sukan ta beled de bara dur de. Ana bi jibu le umon mahskil, wa umon bi ayinu bi hasil.'' ¹⁹ Wululu le ana! Ashan udam tai al ksuru, dabara tai ma indu ilaj. Ashan kida ana kelim, ''Hagiga de musiba, lakin ana lazim bi ithamal.'' ²⁰ Kaima tai karabu, wa kulu kurenat ta kiama tai gatau le itnin. Umon shilu iyal tai bara min ana, umon tani ma hai. Mafi ayi zol tani al dugu le ana kaima tai wele bi arfa mushama ta kiama tai. ²¹ Ashan ruaa belitin umon ma bi fetishu Yahwah; yala umon ma wedi igtirah, wa mawashi tumon kulu shetetu. ²² Jibu kabara ta akbar, ''Ayinu! Yao bi ja, zalzal azim bi ja min ard ta shumal ashan bi karabu mudon ta Yahuza, wa mahal dusu ta banat awa.'' ²³ Ana arufu, Yahwah, inu sika ta inasn ma bi ja min nfsa tuo. Mafi zol al bi duru adil fi sika kura tuo. ²⁴ Adibu ana, Ya Yahwah, be adala, ma be zalan taki ashan kede inta ma demiro ana. ²⁵ Kubu zalan taki fi umam al ma arufu inta wa fi usar al ma bi nadi isim taki. Lanu umon akulu Yagub wa abula huwo ashan bi demiro hueo ta kulu kulu wa karabu mahal geni tuo.