¹ Fi sena nimira tisa wa shahar ashara ta zidkiya melik ta Yahuza, Nebukadnaser melik ta Babel kan ja ma jeish towo kulu wa hasiru Ourhelim. ² Fi sena nimira hidashar shahar arba yom tisa al zidkiya lisa melik, kan dakalu fi medina. ³ Kulu ruasa ta melik ta babel kan jaw a geni fi bowaba al fi nus; neb sarsekim, nebsamjar wa sarsejim reis/mouzif al mohim, nesersejim al kan mosoul kebir wa kulu bagi kadat ta melik ta Babel. ⁴ Ja hasil, laman zidkiya melik ta Yahuza wa kulu rujal al harb towo kan ayinu umon, umon kan jere, umon kan ruwa bara fi jiha ta Araba. ⁵ Lakin jeish ta kaldaniin kan alagu umon wa gobudu zidkiya fi fadaya ta wodi ta nahar urdun gerib ma Ariha. Biga amsuku huwo wa jibu huwo le Nebukadnaser melik ta Babel fi ribla arid ta hama, hinak nebukadnser kan hokum huwo. ⁶ Melik ta Babel kan dabou awolad ta zidkiya ligo huwo gi ayinu fi Ribla. Huwo Kaman kan dabau kulu nas al kubar wa mohim fi Yahuza. ⁷ Biga huwo agila uyun ta zidkiya wa robutu huwo be genzir min fida ashan bishilu huwo le babel. ⁸ Kaldaniin kan haragu beit ta melik wa biyut tanas, humon Kaman kan jadau aswar ta Ourshelim. ⁹ Nebuzardan kaed ta huras ta melik kan shilu bagi nas al fadulu fi medina ze lajiin, sawa ma nas al kan jere awel le kaldaniin. ¹⁰ Lakin nebuzardan kaed ta huras ta melik rudu keli nas al masakin kalis al ma indu haja le nefsa tomon keli fadulu fi yahuza. Huwo wodi le umon kurum wa mahalat ta zera fi nefsa yom. ¹¹ Nebukadnaser melik ta Babel kan wodi amr be kusus armiya le nebuzardan kaed ta huras towo gali. ¹² Shilu huwo wa ehtam be huwo, mata amulu huwo batal amulu le huwo ayi haja al huwo bi kelim le inta. ¹³ Be kida Nebuzardan kaed ta huras ta melik, Nebushazban reis ta kisiyan, nerjel- sherjel mosout al kebir, wa kulu mosoulin al mohimin ta melik ta Babel rasulu rujal bara. ¹⁴ Rujal del kan shilu Armiya min beit ta hirasa wa wodi huwo le jedaliya weled ta ahikam weled ta shafan, ashan bi shilu huwo le beit, Armiya kan geni fi nus ta nas. ¹⁵ Kalam ta Yahwa kan ja le Armiya ligo huwo lisa tehet/fi harasa fi bieit ta hirasa. Gali ¹⁶ “Kelim le Ebd melek al min kush gali, Yahwa al gedir. Rabuna ta Israel kelim kida; Ayinu ana gerib bi nefizu kalamat tai did medina de le karab ma le kwes, leanu kulu bikun hagiga gidam bitak yom dak. ¹⁷ Lakin ana bi ankizu inta fi yom dak de kalam ta Yahwa, wa ma bi selim inta fi ida ta rujal al inta gi kafu. ¹⁸ Leanu be hagiga ana bi ankizu inta, inta ma bi mutu be seif, inta bi jere be haya bitak ze inta indu thika fi ana, de kan kalam ta Yahwa”