¹ Hasa zidkiya weled ta Yoshiya kan geni melik mahal ta Yohoyakin weled ta Yahoyakim. Nebukadnaser melik ta Babel kutu zidkiya melik fi arid ta Yahuza. ² Lakin zidkiya, kudam towo, wan as ta beled kan ma asma le kalamat ta Yahwa al Armiya al nebi kan alinu. ³ Biga melik zidkiya, yahukal weled ta shelemiah, wa zafania weled ta maaseya al kahin rasul risala le Armiya al nebi gali, seli ajil ta nina le Yahwa.” ⁴ Hasa Armiya kan gi ja wa ruwa fi nus ta nas, le anu kan lisa ma kutu huwo fi sijin. ⁵ Jeish ta Faraun kan tala min masir, wa kaldaniin al kan hasiru Ourshelim asma akbar de umon sibu Ourshelim. ⁶ Biga kalam ta Yahwa kan ja le Armiya al nebi gali, ⁷ Yahwa Rabuna ta Israel, kelim kida: De yau kalam al inta bi kelim le melik ta Yahuza, le anu huwa rasulu inta ashan bi fetisu nesiha min ana, Ayinu, jeish ta Faraun al kan gi ja ashan bi saidu intum gerib bi rija wara le Masir. ⁸ Al kaldaniin birija, umon shakila did medina de, bi gobudu, wa bi haragu. ⁹ Yahwa kelim kida mata kabasu nefsa takum gali, be hagiga al kaldaniin bi sibu anina; le anu umon ma bi sibu. ¹⁰ Hata kan intum be intesir le kulu jeis ta kaldaniin al bi dusuman ma intum al bes nas moawogin yau fadulu fi moaskar tomon, umon bi gum fok wa haragau medina de. ¹¹ Biga zaman al jeish tak aldaniin tala min Ourshelim ze jeish ta Faraun kan gi ja. ¹² Armiya kan tala bara min Ourshelim ashan bi ruwa le beled ta Benyamin. Huwa kan deir meliku gaba hinak fi nus ta nas towo. ¹³ Ze huwo kan wosulu le bab ta Benyamin, reis ta haras kan fi hinak, isim towo rija weled ta Shelemiya weled ta Hananiya. Huwo kan amsuku Armiya wa kelim, “inta gi jere le kaldaniin. ¹⁴ “Lakin Armiya kan kelim, “de ma hagiga. Ana ma gi jere le kaldaniin’ lakin irija kan ma asma le huwo. Huwo kan shilu Armiya wa jibu huwo le roasaa. ¹⁵ Roasaa kan zalanin ma Armiya. Umon dugu huwo wa kutu fi sijin, al kan yau beit ta Yonathan al katib, leanu umon gilibu beit de le sijin. ¹⁶ Biga Armiya kan kutu fi sijin tehet wata, huwo kan geni hinak ayam towil. ¹⁷ Biga melik zidkiya kan rasulu zol wahid al jibu huwo le kaser. Fi beit towo, melik kan aslu huwo barau, “seyi fi ayi kalam min Yahwa? “Armiya kan juwabu, “bi selimu inta fi ida ta melik ta Babel.” ¹⁸ Biga Armiya kan kelim le melik zidkiya, “ana amulu katiya keif gidam taki kudam taki, awu nas de al kutu inta wodi ana fi sijin? ¹⁹ Wenu anbiya taki, del al kan gi nabaa le inta wag i kelim melik ta Babel ma bi ja did inta wala did beled de? ²⁰ Lakin asma hasa, seyid bitai al melik! Keli asadu tai de wosulu gidam bitak, mata rija ana le beit ta Yonathan al katib, awu ana bimutu hinak.” ²¹ Be kida melik zidkiya kan wodi karar, keli kudam towo hafizu Armiya fi saha ta beit ta haris. Kubz min rekeif kan gi wodi huwo kulu yom min souk ta kabazin, lahadi rekeif kan kalasu fi medina kulu. Be kida Armiya kan geni fi saha ta beit ta haris.