¹ Kan wosulu fi sena nimira arba al Yahoyakim weled ta Yoshiya kan melik ta Yahuza, yau kalam de kan ja le Armiya min Yahwa wa kelim, ² Shilu waraga benefsa taki wa katibu fogo kulu kalamat al ana wori le inta be kusus Ourshelim wa Yahuza, wa kulu bilad. Amulu de le kulu hajat al ana kan wori min ayam ta Yoshiya lahadi yom ta alela. ³ Mikin nas ta Yahuza bi asma le kulu karab (kawaris) al ana deir jibu le umon. Mikin ayi zol bi agilibu min sika towo al batal, ashan ana bi agder afi batal wa katiya tomon” ⁴ Baga Armiya kan nadi baruk weled ta naria, wa baruk katibu fi waraga kalamat al Armiya kan gi kelim le huwo, kulu kalamat al Yahwa wonusu le huwo. ⁵ Baad dak Armiya kan wodi amir/taalimat le Baruk gali, ana fi sijn wa mabi agder ruwa fi beit ta Yahwa. ⁶ Bekida, inta bi ruwa wa agara al inta katibu be kalamat al ana wori le inta fi yom ta siyam, inta bi agara kalamat ta Yahwa fi adana ta nas fi beit de, wa Kaman fi adana ta kulu Yahuza al ja min mudun tomon. Alinu kalamant del le umon. ⁷ Mikkin nadi tomon le rahma bi ja gidam Yahwa. Mikin ayi zol bi gilibu min sika towo al batal ze takiyan wa zalan al shedid al Yahwa kan alinu did nas del saa shedid. ⁸ Biga baruk weled ta naria kan amulu kulu haja al Armiya al nebi kan wosi huwo bi amulu. Huwo kan agara kalamant ta Yahwa be sout fok fi beit ta Yahwa. ⁹ Kan wosulu fi sena nimira kamsa wa tisa sahar ta Yahoyakim weled ta Yoshiya melik ta Yahuza, al kulu nas ta Ourshelim wan as al ja min mudun ta Yahuza alinu siyam gidam Yahwa. ¹⁰ Baruk kan agara be sout fok kalamat ta Armiya fi beit ta Yahwa, min gurfa oda ta Germiya weled ta shaban al katib, fi fadaya ta beit al fok al fi bab ta dukul le beit ta Yahwa. Huwo amulu kalam de fi adana ta nas kulu. ¹¹ Hasa mikaya weled ta Gimariya weled ta shaban kan asma kulu kalamat ta Yahwa al fi waraga. ¹² Huwo kan ruwa tehet fi beit ta melik, fi oda ta katib. Ayinu, kulu mouzifin kan gaidin hinak; Alishama al katib, dalaiya weled ta shamaiya, alnatan weled ta Akbor, Gemariya weled ta shaban, wa sedekiya weled ta Hanaiya wa kulu mouzifin. ¹³ Biga mikaya kan wori le umon kulu kalamat al huwo asma baruk agara be sout ali le nas kulu. ¹⁴ Biga mouzifin kulu kan rasulu jihudi weled ta nataniya weled ta shelemiya weled ta Kushi le Baruk. Jihudi kan kelim le Baruk, “shilu waraga fi ida bitak, waraga al inta kan gi agara fi adana ta nas wa taal.” Baruk weled ta Naria shilu waraga fi ida towo wa ruwa le mouzifin. ¹⁵ Biga umon kan kelim le huwo, “geni tehet wa agara le nina ashan bi asma. “baga baruk agara waraga. ¹⁶ Laman umon asma kalamat de kulu, kulu zol kan gilibu be kouf le zol gerib ma huwo wa kelim le Baruk, “nina be hagiga bi wori kalamat de kulu le melik.” ¹⁷ Biga umon asalu baruk, ‘weri le nina, inta agder katibu kelimat del keif min kasma ta Armiya?” ¹⁸ Baruk kelim le umon, “huwo kan gi wonusu kalamat del kulu le ana, wa ana kan gi katibu be hibir fi waraga de.” ¹⁹ Biga mouzifin kelim le Baruk, “Ruwa, dusu nefsa taki wa Armiya Kaman, mata sibi ayizol keli aruf mahal al intum fogo.” ²⁰ Yala umon kutu waraga de fi oda ta Elishama al katib, wa umon ruwa le melik fi Baranda towo, wa umon wodi le huwo kabara kulu, ²¹ Bega melik rasulu jehudi keli jibu waraga, Jehudi kan shilu waraga de min oda ta Elishama al katib, biga huwo agara le melik wa mouzifin kulu al kan wogif Jambu towo. ²² Hasa melik kan gaid fi beit ta shita fi shahar tisa, wa kan majmara/kanun gi wala gidam bitowo. ²³ Kan hasil inuze Jehudi bi agara talata au arba sotur, melik kan gi gata kalam de be matowa wa jada fi nar al fi mabkara kanun lahadi waraga kulu kan haragu karabu. ²⁴ Lakin la melik wala ayi wahid min kudam towo al asma kalamat de kan kafu, wala umon kan sertu malabis tomon. ²⁵ Alnatan, Delaiya, wa Gemariya kan aslu melik keli ma haragu waraga de, lakin huwo kan ma asma le umon. ²⁶ Biga melik kan Amiru/wodi taalimat le Yarhemeel, gerib, seraya weled azriel, wa shelemiya weled ta Abdel ashan bi gobudu Barauk wa Armiya al nebi, lakin Yahwa kan dusu umon. ²⁷ Biga kalam ta Yahwa kan ja le Armiya baad melik harafu waraga al Baruk kan katibi min kalam ta Armiya gali, ²⁸ Rija wara, shilu waraga tani le inta, wa katibu fogo kulu kelimat al kan fi waraga al awel, al Yaho yakim melik ta Yahuza haragu. ²⁹ Biga inta bi kida le Yehoyakim melik ta Yahuza, inta haragu waraga dak gali,” lei inta katibu fogo, melik ta Babel be hagiga bi jaw a karabu arid de, le anu huwo bi karabu kulu kan insan wala hayiwan al bi geni fogo? ³⁰ Ashan kida Yahwa kelim kida be kusus inta, Yahoyakim melik ta Yahuza;” mafi tani jil taki bi geni fi kursi ta Daud. Kan le inta, meyit taki bi jadau bara fi sakana ta nahar, wa berid al bi jemid bilel. ³¹ Leanu ana bi akibu inta, iyal ta iyal wa abiid taki ashan batal takum kulu. Ana bi jibu le inta wale kula sukan ta Ourshelim, wa le ayi zol al fi Yahuza kulu karab al ana kan hadidu ma intum, al intum kan ma kutu bal fogo.” ³² Be de Armiya kan shilu waraga tani wa kan wodi le Baruk weled ta naria al katib. Baruk kan tatibu wara kalam ta Armiya kulu kalamat al kan fi waraga al Yehoyakim melik ta Yahuza kan haragu. Kaman kan fi kalamat ziyada ze kalamat al awel fi waraga de.