¹ Kalam al ja le Armiya min Yahwa, zaman Nebukadnaser melik ta Babel wa kulu jeish bitowo, sawa ma mamalik al fi arid, mahalat al lehet guwa towo, wa kulu nas tomon kan gi jahizu dusuman did Ourshelim wa mudun towo, kelim. ² Yahwa, Rabuna ta Israel kelim kida, ruwa wa kelim le Zediya melik ta Yahuza wa kelim huwo, Yahwa kelim kida Ayinu, ana gi ruwa wodi medina de fi ida ta melik ta Babel, huwo bi haragu medina de. ³ Inta ma bi jere min ida towo leanu be hagiga bi gobudu inta wa selimu inta le huwo. Uyun taki bi ayinu uyun ta melik ta Babel! ⁴ Asma le kalam ta Yahwa, zidkiya melik ta Yahuza! Yahwa kelim kida be sabab taki, inta ma bi mutu be seif. ⁵ Inta bimutu be salam, ze kan fi bika gi haragu judud taki taki, muluk al kan gidam min inta, umon bi haragi jisim bitak. Bi kelim ah, seid umon bikore inta ana hasa kelim, de Yahwa yau kelim” ⁶ Biga Armiya al nebi kan alinu le zedkiya melik ta Yahuza kalamat de kulu fi Ourshelim. ⁷ Jeish ta melik ta Babel bada dusman did Ourshelim wa kulu bagi mudun fi Yahuza; lakis wa azika. Mudun ta Yahuza del kan fadulu ze mudun al gowi. ⁸ Kalam kan ja le Armiya min Yahwa baad melik zidkiya amulu itifagiya ma nas kulu ta Ourshelim ashan bi alinu huriya le umon. ⁹ Bi anu kulu zol bi hariru abid bitowo al min Abranin, kulu kan rajil wala mara mafi zol bi kutu Abrani abid, huwo kan aku towo. ¹⁰ Biga ruasa wan as kulu itifagu inu ayi zol keli hariru abid towo al rajil au mara ashan umon ma bikun abid tani mara. Umon kan ehterim wa hariru abid del. ¹¹ Lakin bad de umon kan geiru afkar tomon. Umon rijau abid al umon kan hariru. Kan asuru umon ashan bikun abid tani. ¹² Biga kalam ta Yahwa kan ja le Armiya gali, ¹³ Yahwa, Rabuna ta Israel kelim kida, ana benefsa tai kan amulu itifagiya ma judud takum yom al ana jibu umon bara min arid ta Masir, bara min beit ta abudiya. Dak zaman al ana kelim ¹⁴ Fi nihaya ta kulu saba sena, kulu zol bifiku aku towo, al abrani al kan biyu nefsa towo le inta wa geni kadam le inta sita sena, rasulu huwo bara be huriya. Lakin judu takum kan ma asma le ana wala wodi adanat tomon le ana. ¹⁵ Hasa intum be nefsa takum kalas tub wa bada amulu al kwes fi uyun tai. Intum alinu huriya, kulu zol le Jeiran towo, wa intum amulu itifagiya gidam tai fi beit al ana nadi ma isim tai. ¹⁶ Lakin Kaman intum agilibu wa karabu isim tai, intum wodi kulu zol rijau abi towo al rajil wala al mara del al intum kan fiku ashan bi ruwa mahal al deir. Intum asuru umon bikun abid takum tani; ¹⁷ Ashan kida Yahwa kelim kida, intum benefsa takum kan ma asma leana, intum mofrud bi alinu huriya, kulu wahid minakum le akwana takum al Israelin. Be kida ayinu ana gerib bi alinu huriya le intum de kalam ta Yahwa, huriya min seif, darba, majaa, leanu ana gi ruwa kufu intum haja ta kowafu fi ena ta mamlaka fi arid. ¹⁸ Baad da kana bi amulu le nas al kasuru itifagiya tai, al ma hafizu kelimat ta itifagiya al umon kan amulu gidam tai, zaman al umon gata bagara le itnen wa dowuru fi nus ta itnen jisim de. ¹⁹ Wa biga ruasa ta Yahuza ma Ourshelim, kasianin, wa khahana, wa kulu nas ta arid kan douru fi nus ta bagara al gesim de. ²⁰ Ana bi wodi umon fi ida ta adaa ajsam tomon bikun akil le tiyur fi sihab wa hayi wanat wa ruasa/kiyadat towo fi ida nas adu tomon wa fi ida ta del al gi fetisu haya tomon. Ajsam tomon bikun akil le tiyur fi sihab wa hayi wanat fi arid. ²¹ Be kida ana bi wodi zidkiya melik ta Yahuza wa ruasa/kiyadat towo fi ida nas adu tomon wa fi ida ta del al gi fetisu haya tomon, wa fi ida ta jeish ta melik ta babel al kalas gum did intum. ²² Ayinu, ana gerib bi wodi awamir de Yahwa yau kelim, wa shilu medina de, haragu huwo. Leanu ana bi gilibu mudun ta Yahuza le mahalat al karban al mafi nas bi geni fogo.”