¹ ''Kan rajil talagu mara tuo wa hiya ruwa min huwo wa biga mara ta rajil tani, hal huwo bi rija le mara de tani? Hal ard de ma bi kun nejis najasa? Inta ish zaiya al indu mahbubin ketir; wa hala inta bi rija le ana? De yao elaan ta Yahwah. ² Arfa uyon taki le murtafaat wa ayinu! Hal fi mahal al inta ma num ma rujal fugu? Inta geni taraf sika bi isytena nas al bi hibu inta, ze Arab fi sahara. Inta nejisu ard de be sher wa shukul zina taki. ³ Yala sihab aba wa biga mafi moyo al bi ja mutuakir; lisa inta indu jabha ta mara al zaniya; inta aba faddiya. ⁴ Hal inta ma nadi ana hasa; 'Abu tai! Sabi tai al gerib hata min shabab tai! ⁵ Hal huwo daimen bi kun zalan? Hal huwo bi sibu gadab tuo le nihaya?' Ainu! De kalam al inta wunuso, lakin inta sher gudur guwa taki!'' ⁶ Yala Yahwah wunuso le ana fi ayamat ta Yushiah al melik, ''Hal inta de yatu adam amana al Israel amulu? Huwo arkab fi ayi wadi wa tihit ayi shejera akdar, wa huwo amulu zina hinak. ⁷ Ana kelim, 'Baad ma hiaya amulu hajat de kulu, hiya bi rija le ana,' lakin hiya ma rija. Yala ukut tuo al ma amin ayinu hajat de. ⁸ Yala ayinu inu be nefsa teriga al Israel al ma amin amulu zina Ana turuju hiya wa wedi le hiya waraga ta talak, ukut tuo al ma amin Yahuza ma kafu; hiya kaman tala bara wa amulu zina. ⁹ Shukul zina tuo de kan ma haja le hiya, hiya nejisu wata, wa amulu zina ma hujar wa ashjar. ¹⁰ Yala baad hajat de kulu, Yahuza ukut tuo al ma amin de rija le ana, ma be geliba tuo kulu, lakin be kizib- de yao elaan ta Yahwah.'' ¹¹ Yala Yahwah kelim le ana, ''Israel al ma amin kan indu bir aktar min Yahuza! ¹² Ruwa wa beshiru kelimat de le shamal. Wunuso, 'Rija ya Israel al ma amin!- de yao elaan ta Yahwah- Ana ma bi kun zalan min inta daimen. Ze ma Ana ameen- de yao elaan ta Yahwah- Ana ma bi geni zalan lel abad. ¹³ Rudu katiya taki, ashan inta amulu katiya did Yahwah Allah taki; inta shariku sikat taki ma ashrar fi tihit ayi shejera al akdar! Lanu inta ma asuma le sout tai- de yao elaan ta Yahwah. ¹⁴ Rija takum, ya shaab al am umana- de yao elaan ta Yahwah- Ana rajil taki! Ana bi shilu inta, wahid min medina, wa itnin min usura, wa Ana bi jibu inta le Sahiun! ¹⁵ Ana bi wedi le itakum ruaa hasab geliba tai, wa umon bi ayinu intakum be marifa wa hikima. ¹⁶ Yala itakum bi zidu wa weledu samar fi ard fi ayamat dak- de yao elaan ta Yahwah-umon tani ma bi kelim, ''Taboot ta ahad ta Yahwah!'' Muodu de tani ma bi ja fi gulub tumon wele bi zekiru; ma bi fagidu, wele bi amulu wahid tani.' ¹⁷ Fi zaman dak umon bi beshirh an Urshelim, ''De yao kursi ta Yahwah; wa kulu duwal tanin bi limu fi Urshelim fi isim ta Yahwah. Tani umon ma bi duru fi giladab ta gulub tumon ta sher. ¹⁸ Fi ayamat dak, bet ta Yahuza bi duru ma bet ta Israel. Umon bi ja sawa min ard ta shamal le ard al Ana wedi le abuhat takum ze werisa. ¹⁹ Ze le Ana, Ana kelim, 'Kef Ana der amulu intakum ze weled tai wa bi wedi le intakum ard al kues, miras al giafa kalis min al fi fi ayi beled tani!' Ana mumkin kan bi kelim inu intakum ma bi rija min duru wara tai. ²⁰ Lakin ze mara al ma amin le rajil tuo, inta tebiyu ana, ya bet ta Israe- se yao elaan ta Yahwah.'' ²¹ Sout asumau fi sahara, kure ta wa shukul miskin ta shaab Israel! Lanu umon gairo sikat tumon; umon mesto Yahwah Allah tumon. ²² Rija takum, ya shaab al ma umana! Ana bi aliju intakum min guwi ras takum!'' ''Ayinu! Anina bi ja le inta! lanu inta Yahwah Allah tanina! ²³ Hagiga akazib bi ja min murtafaat, izaaj ta tushwish bi ja min jibal; be takid Yahwah Allah ta nina yao kulasa ta Israel. ²⁴ Lakin asnam ta faddiya akulu haja al judud ta nina ishtakalu le mawashi wa bahaimtumon, awlad wa banat tumon! ²⁵ Kede anina num tihit be faddiya. Kede faddiya ta nina kati nina, lanu anina amulu katiya did Yahwah Allah ta nina! Anina be badun ta nina ma judud ta nina, min zaman ta shabab ta nina lahadi yom ta aleela, ma asuma le sout ta Yahwah Allah ta nina!''