¹ Kalam ta Yahwah ja le ana, be kelim, ² ''Ruwa wa nadi fi adanat ta Urshelim. Kelim, 'Yahwah kelim kida: Ana zekir ahad ta shukul shabab taki, muhaba taki fi zaman anina kan fi ilaka, zaman inta ruwa wara taki fi sahara, ard al ma zarau. ³ Israel kan kasisu le Yahwah, awel simar ta hasad tuo! Kulu zol al akulu min awel simar de amulu katiya; karisa ja fugu umon- de yao elaan ta Yahwah.''' ⁴ Asuma kalam ta Yahwah, ya bet ta Yagub, wa intakum kulu ya abuwab ta Israel. ⁵ Yahwah bi kelim kida, ''De shunu al abuhatb takum ligu batal min ana, al sibu umon ruwa bait min ana? Al umon ruwa bait le asnam al ma indu faida wa umon be badun tumon tala ma indu faida? ⁶ Umon ma bi kelim, 'Wenu Yahwah, al tala anina bara min ard ta Masir? wenu Yahwah, al gedimu anina fi sahara, le ard ta hufar wa shuguk, le ard al yabis wa duluma, ard al mafi zol mururu fugu wele fi zol be ish fugu?' ⁷ lakin Ana jibu intakum le ard ta zira ashan intakum bi akulu samar tuo wa hajat ta nin al kues! Lisa zaman intakum rija, intakum nejisu miras tai! ⁸ Kahin ma kelim, 'Wenu Yahwah?' Wa nas al arufu ganoon tamam ma fekir kalam tai! Ruwa amulu sher did ana. Ambiya itnaba le Baal wa ruwa wa maksab. ⁹ Ana lisa bi ishreki inta - de elaan ta Yahwah- wa Ana bi ishteki iyal ta iyal takum. ¹⁰ Mururu takum be juzur ta Ketim wa ayinu takum. Rasulu takum nas le Gaidar wa fetishu takum kan fi haja ze de hasil. ¹¹ Hal fi beled badilu rabunat, hata kan umon ma rabunat? Lakin shaab tai badilu mejid tumon be haja al ma bi saidu umon. ¹² Istagrab ya samawat, ashan kalam de! Kede inta istagrab wa tala muhtar- de yao elaaan ta Yahwah. ¹³ Lanu shaab tai amulu sher kalis gidam tai: Umon sibu masdar ta moyo al hai, wa umon hafura le umon abiar le badun tumon, abiar al shegegu shegegu al bi amsuku moyo. ¹⁴ Hal Israel abeed? Hal weledu huwo fi bet ta said tumon? Yala malu huwo biga ganima? ¹⁵ Jena ta assed bi kure did umon. Umon amulu iziaaj kalis wa beled tuo karabu. Mudon tuo demiro bidun ayi sukan. ¹⁶ Kaman, shaab ta Nof wa Tahfanis bi haligu shukul tuwil taki. ¹⁷ Hal inat ma kida le badun takum zaman intakum sibu Yahwah Allah takum, wekit huwo kan bi gedimu intakum fi sika? ¹⁸ Yala hasa, malu shilu asaya le Masir wa ashurub moyo ta Shor? Malu shilu asaya le Ashor wa shurubu moyo ta Nahar al Farat? ¹⁹ Katiya takum bi bekitu intakum, wa adam iman takum bi agibu intakum. Ashan kida fekir takum an kalam de wa fahim takum inu de katiya wa mur zaman inta aba Yahwah Allah takum, wa intakum ma bi kafu Ana- de yao elaan ta Yahwah Rabuna ta junud. ²⁰ Ashan ana kasur hadid al bi rubutu intakum wa gata genzir takum min zaman. Lisa intakum kelim, ''Ana bi akdimu!' min ma intakum biga dengir tihit fi ras kulu murtefe wa tihit ayi shejara akdar inta amulu zinna tihit tuo. ²¹ Ana zara intakum ze karma, min bizira. Kef intakum gairo badun takum le fassad, le karma surak? ²² Hata kan intakum nedifu badun takum fi nahar wele intakum kasulu ma sabon al guwi, wasaka takum lisa gidam tai- de yao elaan ta Yahwah Rabuna. ²³ Kef inta bi wunuso, 'Ana ma nejis! Ana ma duru wara Baal'? Ayinu le haja al inta amulu fi jibal! Fekir fi haja al intakum amulu- ya jemil abu mara al bi jere hini wa hinak, ²⁴ humar al mara ta ta gaba al welif sahara, fi geliba tuo bi juru hawa! munu yao bi amsuku hiya min shahwa tuo? ²⁵ Lazim inta bi amsuku kura taki min duru hafiyan wa halik taki min atash! Lakin inta wunuso, ''Mafi raja! Mafi, Ana hibu ajanib wa ruwa wara tumon!' ²⁶ Ze faddiya ta harami kan gubudu, be nefsa teriga faddiya bi gubudu Israel- umon, ²⁷ wa muluk tumon, wa ruwasa tumon, kahana tumon wa ambiya rumon! De umon yao bo kelim le shelera, 'Inta abu tai,' wele hajer, inta yao weledu ana.' Lanu umon gilibu le ana dahar ma usat. Kaman umon bi wunuso fi zaman ta mashakil, 'Gum wa kalisu nina! ²⁸ Lakin wenu rabunat al intakum amulu le badun takum? Kede umon gum kan umon der kalisu intakum min mashakil takum, lanu asnam takum adad tumon sawa ma mudon takum, ya Yahuza! ²⁹ Yala malu intakum bi ishteki ana be amulu galat? Intakum kulu amulu katiya did ana- de yao elaan ta Yahwah. ³⁰ Ana wedi igab le shaab sakit. Umon ma bi rudu tadeeb. Sef takum katulu ambiya takum ze assed al bi demiro! ³¹ Intakum al min jiel de! Kutu takum bala takum le kilima, kelima Yahweh! hal ana kun zahara le Israel? au ardi al ta duluma sedid? Lee nas tai bi keliemu gal, keli nina wodu, nina ma bi ruah lekum tani? ³² Hal biniya al azra bi nisito hajat ta zeena tuo, wa Arusa bi nisito gumash tuo? Lakin shaab tai nisito Ana le ayamat bido adad! ³³ Malu inta bi sala sika taki ashan bi asalu muhaba. Wa inta kaman derisu sikat taki le mara ta sher. ³⁴ Dom al kan haya ta nas al abriya, ta nas masakin ligu fi gumashat taki. Inta ma gubudu nas al bi seregu. ³⁵ Lisa inta bi kelim, 'Ana beri: hagiga zalan tuo ruwa bait min ana.' Lakin ayinu! Ana bi nezilu hukum fugu inta ashan inta kelim, 'Ana ma amulu katiya.' ³⁶ Malu inta be jere ashan inta bi gairo sikat taki? Kaman bi karabu geliba taki be Masir, bes ze kan amulu be Ashur. ³⁷ Inta kaman bi tala min hinak ma iden taki fi ras, Lanu Yahwah aba de al inta kutu sikha taki fugu, ashan umon ma bi saidu inta.''