¹ Asuma le ana, ardi sahil ! wodi le ana intibah takum, intakum beidu nas, Yahweh nadi ana min zaman welada be isim, wokit uma tai jibu ana fi dunia. ² Huwo amulu kasma tai ze sef senin; Huwo dusu ana fi dul ta yeden towo; huwo amulu ana nishap al seninu; fi bag towo huwo dusu ana. ³ Huwo kelimu le ana, “ Inta kadam tai Israel , be wasad towo ana wori mejid tai. ⁴ “Lakin ana juwabu, “Mahma kan ana fekiry ana weledu le kusara, Ana kasran guwa tai le sakit, lakin adala tai ma Yahweh, wa jahiza tai ma Allah tai.” ⁵ Hasa Yahweh kelimu- Al amulu ana min weleda ashan bikun kadam towo, ashan gowumu Yacoub tani mara le huwo, yala Israel bi limu le huwo, lianu iktaramu ana fi eina ta Yahweh ,wa Allah tai ja guwa le ana- ⁶ wa huwo kelim, Huwo haja suker le inta ashan bikun kadam tai ashan bi asisu tani mara gebila ta Yacoub,wa ashan gowumu alnofut ta Israel. Ana bi amulu intakum nur le umam, ashan intakum bikun kulasa tai le nihaya dunia.” ⁷ De yau al yahweh kelim, mukalis ta Israel, al kudus alwahid tomon, le del alhaya tomon alisu, kerehu ma umam, wa abid ta hukam, “ Muluk bi ainu intakum wa bi gum, umara bi shuf kum wa bi dengir tehed, ashan Yahweh al amin, hata wahid alkudus ta Israel, al iktar intakum.” ⁸ De yau shunu al Yahweh kelim, “ fi wokit ana karar ashan wori rahma tai ana bi juwabu intakum, wa fi wokit ta kulasa ana bi saidu intakum; Ana bi hami intakum, wa wodi intakum ze amina le nas, Ashan abinu ardi tani mara, wa rijau tani mara warisa al karabu. ⁹ Intu bi kelim le masajin, “Taalu bara,” le del alfi hufra duluma, ‘Wori nufus takum.’ Humon bi togu fi sika, wa kulu nezila bikun mahal gesh akdar. ¹⁰ Humon mabi kun jaaniin au atshaniin; wala harara au shemis bi dugum, lianu huwo al indu rahma fi humon bi kudu humon; huwo bi gedimum le bir ta moyo. ¹¹ Yala ana bi amulu kulu jubal le sika, wa ana bi amulu shari reisi adil.” ¹² Shuf, de bija min beid, juzu min shimal wa gari; wa taanin min ardi ta Sinim. ¹³ Guna, Samawat bikun farahan,ardi bada guna, intu jubal! Lianu Yahweh bi shejah nas towo, wa bi indu muhaba fi taab tomon ¹⁴ Lakin Zehiun kelim, “ Yahweh kasuru ana, wa Rabuna nesitu ana. ¹⁵ ” Hal mara bi nesitu jenau, albi rada shodur towo, yala hia mabi indu muhaba le jena al hia weledu? Naam humon bi nesitu, lakin ana mabi nesitu intakum. ¹⁶ Shuf, ana katifu isim takum fi mazmir tai; heta takum mustemir gidam tai. ¹⁷ Iyal takum bi alagu wara, wokit del al demiru intakum bi rija wara . ¹⁸ Shuf haulu intakum wa ainu humon kulu bilimu wa jain lekum. Be takid ze ana aish- De karar ta Yahweh – intakum bi libisu humon ze silsila wa intakum bi libisu humon ze arusa. ¹⁹ Mahma kan intakum karban wa madeira, ardi alfi damar, intakum hasa bikun besid kaalis le sukan, wa del albi demiru bikun beid kaalis. ²⁰ Iyal albi weledu fi zaman nedal bikelim fi asuma,” Mahal de deiyik leana, amulu gurfa leana, ashan ena bi geni hini. ²¹ Yala inta bi asalu nefsa, Munu yau weledu iyal de leana ? Ana kan munadil wa ma indu jena fi beled tani wa talagu.Munu yau raba iyal del? Shuf, sibu ana barau ;min ween de ja? ²² “ De yau shunu Rabuna Yahweh kelim, Shuf, Ana bi arfa yeden tai le umam; Ana bi arfa alama ta bered tai le nas. Humon bi jibu aulat takum fi yeden takum ashan arfa wa arfa banad takum fi kidfa tomon. ²³ Muluk bikun abu al adada , wa melkat ta rabau iyal; Humon bi dengiri tehed le intakum ma wusa tehed fi wata wa alasu gubar min kura takum ; wa intakum bi arufu inu ana Yahweh;del albi intozur ana mabi ligo fadiha.” ²⁴ Hal al karabu bi akder shilu min zol takiyan au ashir harib bi shilu min kuwat? ²⁵ Lakin de yau al Yahweh kelimu, “Naam, al asir bi shilu bara min al takian, wa alkarabu bi ankizu; lianu ana bi kun axi adu kalisu iyal takum. ²⁶ Ana bi akilu muasiriin takum ma jutha tomon; wa humon bikun sakraniin ma dom tomon, ze merisa. Biga kulu bashar bi arufu inu ana Yahweh, Ana yau kulasa wa mukalis takum,al aadham ta Yacoub.