¹ Asuma de , bed ta Yacoub albi nadi ma isim Israel, wa ja min haiwan al manawi ta yahusa; Inta albi halifu be isim ta Yahweh wa albizekir fi Allah ta Israel, lakin ma be nesiya wala be suluk alsaa. ² Lianu humon bi nadi nufus tomon nas ta medina mukadas wa wasik fi Allah ta Israel. Yahweh ta jesh yau isimu. ³ “ Ana alinu de min zaman; humon tala min kasma tai, wa ana amulu huwo maruf ; yala tawali ana amulu wa humon ja le nihaya. ⁴ lakin ashan ana arufu intakum anidiin, adalat takum morbut ze hadid, wa wusa takum min nehas, ⁵ Ashan kida ana alinu le intakum ajede bediri ; gabli ma hasil ana kabiru intakum ,yala intakum mabi kelim, Sanam tai yau amulu humon, au sura kashap tai wa hadid tai al sanam yau masahu hajat de. ⁶ Intakum asuma an hajat del; shuf fi kulu delil de ; wa intakum mabi rudu shunu al ana bi kelim hagiga ? Min hasa, Ana bi wori hajat judad, hajad al dusu intakum ma arufu. ⁷ Hasa ma al bediri ,hasa fi waki wa ma gabli alela intakum ma asuma humon, yala intakum mabi akder kelim, Naam , ana bi arufu anum. ⁸ Intakum ma asuma; intakum ma bi arufu; hajat del mafi fi adana takum kan. Lianu ana bi arufu intakum kazabin, wa intakum mudmeridin min fi wilada . ⁹ Ashan isim tai ana bi rija zalan tai, wa ashan iktiram ta isim tai ana mabi demiru intakum. ¹⁰ Shuf ana nedifu intakum lakin wele fida ; ana tahiru intakum fi furun ta taab. ¹¹ katir ana, lianu ashan ana ,ana bi amulu ; keif ana bi sibu isim tai ashan karabu ? Ana mabi wodi mejid ta le aiya wahid. ¹² Asuma le ana, Yacoub wa Israel al ana nadi : Ana al awel wa alakir. ¹³ Naam, Yeden tai yau kutu asas ta ardia, wa yeden yemin tai yau ferisu samawat ; wokit kan ana nadi humon, humon bi wogif fok sawa. ¹⁴ Jemi nefus takum, kulu intakum ,wa asuma ! Munu fi nus takum alinu hajad del? Kalifa ta Yahweh bi kemilu hadaf towo did Babylon. Huwo bi shilu irada ta Yahweh did Chaldeaniin ¹⁵ Ana kelim, naam Ana nadi huwo, ana jibu huwo, wa huwo bi najah. ¹⁶ Taal gerib ma ana, asuma le ana: Min bidaya ana ma kelim fi sir; wokit bi hasil, ana bikun hinak.” Hasa Rabuna Yahweh rasulu ana, wa roho towo. ¹⁷ De shunu Yahweh mukalis taki, alkudus ta Israel “ Ana Yahweh Allah takum, albi derisu intakum kef le najah, albi gedimu intakum fi sika al intakum bi ruah. ¹⁸ Iza kan intakum tii wasaya tai! Yala salam wa isdihar bi jere ze nahar, wa kulasa takum ze amuaj ta bahar. ¹⁹ Jill takum bikun ze ketir ze romula , wa iyal takum min botun takum ketir ze eina romula; wa asami tomon mabi masahu bara min gidam tai. ²⁰ Taalu bara min Babylon! Jere takum min Chaldeaniin ! ma sot ta jeres albi kore alinu, amulu de maruf, wa amulu kede ruah le nihaya ta ardi! Kelim Yahweh kalisu kadam towo Yacoub. ²¹ Humon ma atshaniin wokit huwo gi kudu humon min sahra; Huwo amulu moyo kede jere le humon min hajer; huwo shegegu wa fata hajer , wa moyo dofugu bara . ²² Mafi salam le ashrar- kelim Yahweh.”