¹ De yau shunu al Yahweh kelimu, “ Wenu shihada ta talak al ana talagu ma uma takum? Le munu al indu maal al nan tebiu intakum? Shuf, tebiu intakum ashan katiya takum,wa ashan tamarud takum, uma takum rasulu bara. ² Le ana ja wa mafi wahid hinak ? Le ana bi nadi lakin mafi zol juwabu? Hal yeden tai guser ashan kalisu intakum? Hal mafi guwa fi ana ashan kalisu intakum? Shuf, fi tobik tai ana bi nashifu bahar; Ana bi kutu nahar sahra; asmak towo bi mutu ashan moyo wa atesh, ³ Ana bi kati sama ma duluma; Ana bi kati ma kumash suwal.” ⁴ Rabuna Yahweh wodi le ana lisan ze del al derisu, ashan ana bi kelim kelima ta haya le del al woduru, Huwo bi gowimu ana saba fi saba; huwo bi gowimu adana tai ashan asuma ze del albi derisu. ⁵ Rabuna Yahweh fatau adana tai, wa ana ma merid, wala gelibu wara. ⁶ Ana wodi dahar tai le del albi dugu ana wa kwangiri tai le del albi juru dikin tai ; Ana ma dusu wusa tai min amael ta fadiha wa tufu buzak. ⁷ Lianu Rabuna Yahweh bi saidu ana; ashan kida ana ma fadihu; yala ana amulu wusa tai sewaan, lianu ana arufu ma bi wodi ana fi fadiha. ⁸ Huwo albi beriru ana gerib mana. Munu yau bi aridu ana? Kede ena wogif wa wajihu baad tena. Munu yau bi isteki ana? Kede huwo ja gerib ma ana. ⁹ Shuf, Rabuna Yahweh bi saidu ana. Munu yau bi alinu ana galtan? Ainu, Humon bi sheretu bara ze jalabia; arda bi akulu humon bara. ¹⁰ Munu fi nus intakum bi kafu Yahweh? Munu yau bi iktaramu sot ta kadam towo? Munu yau bi douru fi duluma al saap budun nur? Huwo keli wasik fi isim ta Yahweh wa teki fi Allah towo. ¹¹ Shuf, kulu del albi wala nar, al bi salau nefusum ma lamba: douru fi nur ta lamba takum wa fi dukhan al intakum walau. De yau al intakum ligo min ana: Intakum bi num tehed fi mahal ta waja.