¹ Wa Melik Hezikiya asuma khabara tomon,howo shiritu gumashattuo, kati nefsa tuo maa shawal, wa ruwa fi Beit ta Yahwah. ² Howo rasulu Eliyakim, al kan musaul min Beit, wa shina al katib, wa kahana al kubar, homon kulu kati maa shawal, rasulu homon le Ishaiya jena ta Amos, al Nebie. ³ homon kelim le howo, "Hezikiya kelim, 'De yom ta Taab, tuwbikh, wa shetima, zi jena al biga jahiz ashan bi weledu, lakin Auma tuo ma indu gowa ashan bi asuru jena de. ⁴ Yemkin Yahwah Allah taki yahu bi asuma kalam ta Rabishighi (Ghaaed ta jesh), Al melik ta Ashur said tuo rasulu howo ashan bi amulu tahadie le Allah al hai, wa bi ithadaa kalam ta Yahwah Allah taki bi asuma. hasa keli inta arfa salawat taki min ajili bagi nas al lisa fii hina."' ⁵ Wa khudam ta melik Hezikiya jaa le Ishaiya, ⁶ wa Ishaiya kelim le homon,"Kelim le said takum: 'ayhwah kelim, "Keli intum ma kafu kalam al intum asuma de, min kalam al khudam ta melik ta Ashur setimu maa Ana. ⁷ Asuma, Ana bi wodi ruhu le howo, wa howo bi asuma khabar wa bi rejaa wara le ardi tuo. Ana bi sibu howo waga maa seif fi ardi tuo."'" ⁸ Biga Rabishighi(Ghaaed ta jesh) rejaa wa howo ligu melik ta Ashur fi harib maa Libna, ashan howo asum gal al melik jere bara min Lakhshi. ⁹ Sinharieb asuma inu Tirhakah melik ta Kush wa Masir jahizeen ashan bi shakil deed howo, biga howo rasulu nas tani mara le Hezikiya maa resala: ¹⁰ " Kelim le Hezikiya, melik ta Yahuza, 'Keli inta ma fekir gal Allah taki al inta amin fi howo bi kabasu inta, kelim, Ureshelim ma bi wodi le eda ta melik ta Ashur." ¹¹ Asuma, inta asuma aan haja al Muluk ta Ashur amulu le aradi kulu al homon demiru. wa hal inta yahu bi najah? ¹² Hal aliha ta aumam angizu homon, aumam al Abuhat tai demiru: Juozan, Haran, Rasif, wa nas ta Eden al fi Telsar? ¹³ Wenu melik Hamat, melik Arfad, Melik ta mudun ta sefurayim, melik ta Henaa wa Aauwa?"" ¹⁴ Hezikiya shilu resala de min nas al rasulu deel wa howo agarau. wa howo ruwa fi Beit ta Yahwah wa kubu rasala de gedam ta Howo. ¹⁵ Hezikiya seli le Yahwah: ¹⁶ " Ya Rab al Junud,Allah ta Israel, inta al geni fok ta kerubim, Inta yahu Allah fok kulu mamalik al ardi. inta sanaata al samawat wa al ardi. ¹⁷ Keli inta fata adana taki, Ya Yahwah, wa asuma . Fata eiyun taki, Yahwah, wa ainu, wa asuma kalam ta Sinharieb, al howo rasulu ashan bi hagiru Allah al hai. ¹⁸ Hagiga, Yahwah, Muluk ta Ashur demiru kulu al aumam wa ardi tomon. ¹⁹ Homon kutu aliha tomon fi nar, ashan homon kan ma aliha lakin de shukul ta eda ta insan, amulu min khashab wa hajer. biga Ashureen demiru homon. ²⁰ Wa hasa, Ya Yahwah Allah ta nina, angizu nina min gowa tuo, ashan mamalik ta ardi kulu bi arufu inu inta Yahwah barau." ²¹ Wa Ishaiya jena ta Amos rasulu resala le Hezikiya, kelim," Yahwah, Alla ta Israel kelim, ' Ashan inta seli le Ana ashan kalam ta Sinharieb melik ta Ashur, ²² De yahu kalam al Yahwah kelim aan howo: "Al Aazraa ibna ta Sahiyun hagieru wa ataku inta; Ibna ta Ureshelim hezu shaar ta hiya le inta. ²³ Inta hagieru wa shetimu munu? Inta arfau sut taki le munu wa arfau ena taki bi kebriya le unu? Le Ghudus ta Israel. ²⁴ Bi wasat khudam taki inta hagieru Al Rab wa kelim, 'Bimerkibat tai al ketier ana tala fok fi murtafaat ta Jebal, Le Aalaa Irtefaat ta Lubnan. Ana bi gata atuwal ashajr ta Aurz wa ashjar ta Sunwbar al ghali hinak, wa ana bi ruwa lahadi abaad mahalat al Aali, le afdal al qhbat tuo. ²⁵ Ana hafiru Abaar wa ashrab moyo; wa ana nashifu Bihar ta Masir kulu bi batna kura tai.' ²⁶ Hal inta ma asum haja al Ana samimu min zaman wa amulu howo min zaman al gedim? Hasa ana bi jebu hini. Inta bi karabu mudun al gowi wa bi hawilu le akuwam ta karaba. ²⁷ Sukkan tomon, al deifeen bi kafu wa bi kun maa fadiya. Homon zi ashjar fi mazarie, gish akhdar, gish al fi ras juwa aw fi al haghli, gebli hawa ta al qharib. ²⁸ Lakin Ana bi arufu guad taki, khuruj taki, Dukhul taki, wa qhadab taki le Ana. ²⁹ Ashan qhqdab taki le Ana, wa ashan qhurur( Kebriyaa) taki wosulu fi adana tai, Ana bi kutu shabaka tai fi anafa taki, wa shama tai fi kasma taki; Ana bi juru inta wara le mahal al inta jaa min fogu." ³⁰ De yahu bi kun Aalama le inta: Intum bi akulu akilat ta qhaba fi sina de. wa fi sina al tani intum bi akulu min nefsu. Lakin fi sina al talit keli intum zara wa amulu hasad, keli intum zara al karma wa akulu simar tuo. ³¹ Bagi nas al Beit ta Yahuza al naja homon kaman bi zara wa bi hasiedu simar. ³² Leanu min fi bagi ta nas bi jaa min Ureshelim; Min jebel ta Sahiyun nas al naja bi jaa. Qhiera ta Rab al Junud bi amulu keda."' ³³ Ashan keda Yahwah kelim aan Melik ta Ashur: "Howo ma bi jaa fi medina de wa howo ma bi durubu saham hina. Howo ma bi jaa gedam maa daraga aw abinu sur hawili howo. ³⁴ Terig al howo jaa maa howo bi kun nefsu terig al howo bi ruwa maa howo; Howo ma bi dakalu fi medina de-De Yahwah yahu kelim ³⁵ Ashan Ana bi ahmi medina de wa bi angizu howo, Min ajil Ana wa min ajili Daud khadim tai." ³⁶ Biga Malaika ta Yahwah ruwa hajimu muaskar ta Ashureen, katulu Miya wa Khamsa Tamaniin Alfi 185,000 Asakier. Zaman nas gum fi sabah bedri, kan nas mieteen fi kulu mahal. ³⁷ Wa Sinharib Melik ta Ashur sibu Israel wa ruwa fi Beit wa howo geni fi Neniwe. ³⁸ Wa, fi wokit howo gi Aabidu fi beit ta Nisrokh allah tuo, Iyal tuo Adramelek wa Sharasier katulu howo maa seif. wa homon jere le Ararat. biga Esarhdon jena tuo hukumu fi mahal tuo.