¹ Fii Arbaatashar sina ta Al melik Hezekiya, Senhareib, Melik ta Ashur, hajemu kulu Mudun ta Yahudiya al muhhasana ( Gowi) wa intesiir le homon. ² Melik ta Ashur rasulu Rabshegie aw (Ghaed) min Lakhish le Ureshelim le Melik Hezekiya maa jesh Aazim. Howo wosulu le Ghanat al hawd al Auliya, wa howo wogif ,fi terig ta zeraa ta ghasar. ³ Kan Musauleen al Israeleen al ruwa maa homon min medina ashan bi wonusu maa homon kan Eliyakim Jena ta Hilghiya, al Musaul fi al Ghasr, Shabna al katib ta melik, Yuakh jena ta Aasaf, al kan gi sejeelu ghararat ta hakuma. ⁴ Al Rabshegi kelim le homon," kelim le Hezikiya gal Al melik al aazim Melik ta Ashur, kelim, ' Shunu yahu masdar ta sigha taki? ⁵ Inta gi wonusu kalam ma indu maana, inu fii mashura wa gowa le al harb. hasa inta wodi sigha taki le munu? Munu yahu wodi le shujaa ashan bi itmarad deed ana? ⁶ Asuma, inta wodi sigha taki fi Masir, fi qasab al inta istakhdimu zi Aasaya ta dowuria, lakin iza insan takie fogu, howo bi lesigu fi eda tuo wa bi gidu eda tuo. De haja al Pharaun melik ta Masir bi amulu le ayi zol al bi wodi sigha tuo fi howo. ⁷ Lakin kan inta kelim le Ana, " Nina gi wodi sigha ta nina fi Yahwah Allah ta nina," De ma Howo al amakin al aali wa Mazabih tuo Hezekiya shelu bara, wa howo kelim le Yahuza wa Ureshelim, " Keli intum abeidu fi mazbaha de fi Ureshelim"? ⁸ Wa ashan keda, Ana deer wodi le inta tegdima al kwes min said tai melik ta Ashur. Ana bi wodi le inta Itniin Alfi Haseen, iza inta bi agdeer ligu nas al bi suwgu le homon ⁹ Keif inta bi aba hata ghaed wahid min asqar khudam ta Said tai? Inta wodi sigha taki fi Masir fi Arabat wa fursan! ¹⁰ Biga hasa, Hal ana safier lahadi hina min qhier Yahwah ashan bi harib deed ardi de wa demiru howo? Yahwah kelim le ana, " Hajeemu Ardi de wa demiru howo."" ¹¹ Wa Eliyakim jena ta Hizkiya, Shibna, wa Yuwakh kelim le al ghaed (Rabishigi) " Min fadlak wonusu le khudam (Aabeid) taki bi luqha ta Aarameen, ashan nina gi fahim. Keli inta ma wonusu maa nina bi luqha ta Yahudeen fi adana ta nas al fii taraf heta." ¹² Lakin Rabishigi ( Al ghaed) kelim, " Hal Said tai rasulu ana le Said taki wa le inta ashan bi wonusu kalam de? Howo ma rasulu an le nas al gi geni fi taraf heta, al homon bi jaa akulu buraz tomon wa bi ashrabu bul tomon maa intum?" ¹³ Biga Rabishigi wogif wa kore bi sut al Aali bi luqha ta Yahudeen, kelim, " Keli intum asuma kalam ta Melik al Azim, Melik ta Ashur. ¹⁴ Melik kelim,' Keli intum ma sibu Hezekiya kabasu intum, Howo ma bi agdeer angizu intum. ¹⁵ Keli Hezekiya ma wodi intum kutu sigha fi Yahwah, Gal, " Yahwah hagigatan bi angizu nina; Medina de ma bi selimu le eda ta Melik ta Ashur." ¹⁶ Keli intum ma asuma le Hezekiya, ashan de yahu haja al melik ta Asur kelim: ' Amulu salam ma ana wa taal le ana. biga ayi zol bi akulu min shejera al karma tuo wa min shejera al tiin tuo, wa bi ashrab moyo min sahrij tuo. ¹⁷ Keli intum amulu keda lahadi ana bi jaa shilu intumle ardi al zi ardi takum, Ardi al fogu gemih ( Dura) wa khamr al jedid, Ardi ta iesh wa mazara ta karma.' ¹⁸ Ma keli intum sibu Hezekiya woduru intum, Gal, ' Yahwah bi angizu nina.' Hal ayi min aliha ta shaab angizu homon min eda ta melik ta Ashur? ¹⁹ Wenu aliha ta Hama wa Arphad? Wenu aliha ta Seuforaim? Hal homon angizu samariya min gowa tai (eda tai)? ²⁰ Min beina aliha kulu ta aradi deel, hal fii ayi allah al angizu ardi tuo min gowa tai (eda tai), wa intum fekir Yahwah bi angizu Ureshelim min gowa tai ( eda tai)?" ²¹ Lakin shaab askut wa homon ma juwabu, ashan garar ta melik kan, " Keli intum ma juwabu howo." ²² Wa Eliakim jena ta Hilghiya, al kan musual min al Beit, Shibna al katib, wa Yuwakh jena ta Aasaf, Al musejeel, homon jaa le Hezekia wa gumashat tomon musharat, wa homon wori le howo kalam ta al Rabishigi( Ghaed).