¹ Taal takum gereib, Ya Aumam, wa keli intum asuma; Ya Shaab! keli intum kutu bala, Al ardi wa kulu haja al fi al ardi keli asuma, Duniya wa kulu hajat al tala min fogu. ² Yahwah howo zalaan min al aumam kulu, wa qhadab tuo nezil jeash tomon kulu; Howo demiru homon tamaman, Howo selimu homon le al ketil. ³ Nas al meiteen tomon bi jadau bara. Aafana ta jusas bi kun fi ayi mahal; wa jebaal bi asurubu dam tomon. ⁴ Nujuom kulu bi kalasu min sama. wa sama bi lefu zi lafa; wa Nujuom tomon kulu bi waga, zi Awrag al gi waga min al karma, wa Tiin al negitu al gi waga min shejera tuo. ⁵ Ashan seif tai de bi ashrab shedid fi sama; Asuma, hasa howo bi nezil fi Edom, le shaab al ana khasisu homon le damaar. ⁶ Seif ta Y ahwah gi nezil dam wa maliyan shaham, gi nezil dam ta khurfan wa aqhnam, mala maa shaham ta keliya ta khurfan. Leanu Yahwah indu zebiha fi al Basra wa ketil azeam fi Edom. ⁷ Bagarat ta gaba bi waga maa homon, wa bagarat al sukar wa Teiran al kubar. Ardi tomon bi asharb dam, wa turab tomon bi kun samiin min shaham. ⁸ Ashan fii zaman al Yahwah bi integhim wa sina al Howo bi aaqibu homon le sabab ta Sahiyun. ⁹ Majarie ta Edom bi agelibu le malaab, turab ta hiya bi tala kebreit, wa ardi ta hiya kun Malaab al gi haragu. ¹⁰ Howo bi haragu bellel wa nahar; howo bi kun ardi ta kharab; mafi zol bi ruwa min jambu tuo elal aabad al aabadeen. ¹¹ Lakin al teyur ta gaba wa al haiwanat bi iesh hinak; Buma wa al ghrab al asuadbi abeinu beit tomon hinak. Howo bi medu masafa ta kharab wa khat ta damar. ¹² Ma bi sibu le Nubalaa ta hiya haja ashan bi nadi Mamlaka, wa Ruasaa ta hiya kulu ma bi sawi haja. ¹³ Ashuak bi raba fi Ghusur ta hiya, hasak wa ashawak al fi husun ta hiya. Hiya bi kun mahal ta geni ta Saalieb, mahal ta Naeam. ¹⁴ Hiywanat ta gaba wa Marfaenat bi limu hinak, wa ghanamayat ta gaba bi kore ashan homon bi nadi badum. Hiywanat ta bellel bi isteqier hinak wa bi legu le nefsa tomon mahal ta raha. ¹⁵ Buma bi sala juwa tuo bi num wa faga beit tomon, bi faga wa harisu iyal tomon. Naam, Sagur bi limu, ayi wahid maa sabi tuo. ¹⁶ Fetishu takum fi ketab ta Yahwah; Ma keli intum sibu haja.wele wahid min homon; ashan kasma tuo wonusu, wa Ruhu tuo limu homon. ¹⁷ Howo jada le homon Ghuraa wa wodi le homon mahalat. mahalat tomon ellal abad; min jeel ella jeel homon bi iesh hinak.