¹ Wayl le inta, al mudemir al lisa ma demiru howo! Wayl le al khaein al homon ma khunu howo! kan inta biga ma bi demiru, bi demiru inta. kan inta biga ma bi khunu, homon bi khun inta ² Yahwah, keli inta wodi neama le nina; nina bi intezir inta; keli inta kun gowa ta nina fi kulu sabah, khalas ta nina fi zaman ta mashakil. ³ Bi sut al Aali shaab bi jere; kan inta irtafaat, aumam bi shetitu. ⁴ Nas al kharabeen taki limu zi Jarad al limu; zi jarad al gi jere, al nas jere fogu. ⁵ Yahwah howo al Aali. howo bi iesh fi makal al Aali. Howo bi mala Sahiyun bi Aadala wa Biir. ⁶ howo bi kun daiman fi awkat taki, khalas tuo kefaya, hikma wa maarafa; Makhafa ta Yahwah yahu kanz tuo ⁷ Asuma, Marasulat tomon gi kore fi shawarie, Diplomaseen gi kore shedid wa gi itmanaa salam. ⁸ Shawarie al kubar biga fadi; Nas al gi safier biga mafi Itifagiyat kasuru, hagiru nas al shuhudeen, wa Ihtiram biga mafi le nas. ⁹ Al Ardi nashifa wa gi mutu; Lubnan biga khajlan wa karabu sharun biga zi ardi ta Badia; wa Bashan wa Carmal gi hezu awrag ta shejera tomon. ¹⁰ " Hasa keli ana gum," Yahwah kelim, " hasa bi arfau ana fok; hasa ana bi kun fokfi al Aali. ¹¹ Intum bi hamil gesh, wa bi weledu hashish al sukar; arwah ( nefis) takum nar bi akulu intum. ¹² Shuob bi haragu zi kalas, zi khashab al gatau wa haragu. ¹³ Intum al beadeen; asum takum haja al ana amulu; wa intum al geriebeen, keli intum arufu gowa tai." ¹⁴ Al khutaa fi Sahiyun gi kafu; khuf shelu nas alma gi arufu Allah. Munu min nina bi agdeer geni fi nar al gi wala? Munu min nina bi agdeer geni fi haragu abadiya? ¹⁵ Zol al gi iesh fi al biir wa gi wonusu bi kulu saraha; Zol al gi aba rebih al ta zulum, zol al gi rejaa eda tuo ashan ma bi shilu rashwa, zol al gi gufulu adana tuo ashan ma bi asum aan dufugu doom( katulu), wa zol al gi gufulu ena tuo ashan ma bi ainu al shar- ¹⁶ De yahu insan al bi geni fi al amakin al Aali, mahal himaya tuo bi kun Husun wasat al sukhur, Akil tuo bi wodi, wa moyo tuo bi kun mauna al sabit. ¹⁷ Ena taki bi ainu Al melik fi jamal tuo; homon bi ainu ardi al baeid. ¹⁸ Gelba taki bi zekir al khuf; Wenu al katib, Wenu zol al gi hasibu gurush? Wenu zol al gi hasibu al abraj? ¹⁹ Tani Inta ma bi ainu shaab al shujaa, shaab al lisan tomon qharieb al inta ma bi faheim. ²⁰ Asuma Ya Sahiyun, Eyun taki bi ainu Ureshelim zi al ta Sakan al mutmaein, Khima al ma bi agilau, weteed tuo ma bi agdeer talau wele ayi habil bi agdeer gatau. ²¹ Lakin, Yahwah fi Jalala tuo bi kun maa nina, Fii al Bihaar al wasiea wa al Majaarie. safiena al harbiya ma bi safier min fogu, wa sufun al kubar ma bi dowuru min fogu. ²² Yahwah howo yahu Gadie ta nina, Yahwah yahu katibu sheriea ta nina, Yahwah yahu Melik ta nina; Howo bi angizu nina. ²³ Hubal taki biga khafif; homon ma bi agdeer ( Sabitu) amsuku Amud ta Isharat; (Sariya) homon ma bi agdeer ferishu al sheraa Kan nas al kharabeen de gesimu, Abu kuraa bi turudu homon. ²⁴ Nas al sakineen ma bi kelim, " Ana aiyan," wa nas al gi geni hinak Aasam tomon bi afii.